Christmas ke Edem Usiahautịn
• N̄KPỌ NTE ISUA IKIE IBA ẸMI ẸKEBEDE, ọwọrọiso eyen ukpepn̄kpọ emi otode Korea ama aka ndise Peking, China. Ke owụkde enyịn ese mbuwed emi okodude ke dek ọkọm akwa ufọkederi, enye ama okụt ndise Mary emi akamade eyen oro Jesus ke ubọk. Enye eketịn̄ aban̄a akpa-owo-idem mbuwed emi ete:
“Eyenan̄wan kiet akakama eyen emi etiede udọn̄ọ udọn̄ọ, edide n̄kpọ nte isua ition m̀mê itiokiet ke emana, ke ifụhi esie. Eketie nte ke enye ikemeke ndimenede ibuot ke enyọn̄, nte n̄kpọ eke mbọm eyen anamde enye owụk enyịn ese eyen esie. Ndien ediwak ekpo ye nseknditọ ẹmi ẹnyenede mba oro ẹkefede ẹkanade ẹma ẹdu mmọ ke ata edem edem. Nte mmenerede enyịn nse mmọ ke enyọn̄, eketie nte ke mmọ ẹyeduọ ẹtọ mi ini ekededi. Ke ntak n̄kpaidem, mma nsio ubọk n̄ka ndimụm mmọ.”
ORO eketịbe anyan ini ke Edinam Ukpụhọde ama ọkọtọn̄ọ ke Europe, anyan ini ke n̄kịmn̄kịm ini Ntọn̄ọ Ntọn̄ọ Eyo Ntatenyịn ama ekebe. Edi ye ekese mbon Edem Usiahautịn, Ido Ukpono Christ ekedi esen n̄kpọ ukem nte mbuwed oro ke idemesie. Idaha oro okpụhọde didie ntem! Ke kpukpru ini Christmas, ẹsiwụt mme ndise nsekeyen oro Jesus. Edem Usiahautịn amakabade emehe ye mme utọ ndise oro, ndien idahaemi ediwak efak do ẹdibiet mmọ oro ẹdude ke Europe.
Ke mbubịteyo November 25, 1998, ọfiọn̄ kiet mbemiso Christmas, se ibede bulb ikan̄ 100,000 ke eto 300 ẹdude ke usụn̄ Champs Élysées ke Paris ẹyama ọwọrọetop usụn̄ oro. Ke ẹmende ẹdomo, ke efak kiet ke ikpehe mbubehe ke Seoul, Korea, ata akamba ufọkurua kiet osio akamba eto Christmas kiet owụt ndien emi ọtọn̄ọ ndisịn un̄wana ke okoneyo ke ibuot obio oro. Ibịghike ẹda mme n̄kpọmbana Christmas ẹbana mme efak esie.
Ekebe ndise, ekebe ukopikọ, ye mme n̄wedmbụk n̄kpọntịbe ẹwụt mme ndutịm ẹnyenede n̄kpọ ndinam ye Christmas ke usen ke usen. Ke edu ini Christmas edemerede, ofụri idụt oro akabade esịn idem ke ndidara utịtisua. Ẹsisọsọp ẹbana mme ufọkabasi ke Seoul, emi ibat mmọ akpade ediwak isenowo idem. Ntem, Korea ye idụt eken ke Edem Usiahautịn ke ẹdia usọrọ Christmas ke n̄kpọ nte ukem ini emi United States esịnde idem ke usọrọ Usen Ekọm esie ke utịt utịt November.
Owo idaha ekese idụt ke Edem Usiahautịn nte ubak Christendom. Ke uwụtn̄kpọ, mbahade 26.3 eke ikie kpọt ke otu ibatowo ẹdude ke Korea ẹdọhọ ke idi mme Christian. Ke Hong Kong edi mbahade 7.9 eke ikie, ke Taiwan edi mbahade 7.4 eke ikie, ndien ke Japan edi mbahade 1.2 eke ikie kpọt. Nte an̄wan̄ade, ekese mbon Edem Usiahautịn inamke Ido Ukpono Christ, edi etie nte ke mmọ isuaha edidia Christmas. Ke akpanikọ, etie nte ke mmọ ẹsiwak ndikop nduaidem mban̄a enye n̄kan nsan̄a mmọ ke n̄kan̄ Edem Usoputịn. Ke uwụtn̄kpọ, ẹtịm ẹdiọn̄ọ Hong Kong kaban̄a ọkpọmiọk ọkpọmiọk usọrọ Christmas esie, idem okposụkedi ekese ke otu mme andidụn̄ do ẹdide mbon Buddha m̀mê mbon Tao. Idem ke China, emi mbahade 0.1 eke ikie kpọt ẹdọhọde ke idi mme Christian, Christmas ke ọdọdiọn̄ ọwọrọ etop.
Ntak emi ẹdiade Christmas ntatara ntatara ntre ke Edem Usiahautịn? Ntak emi mme owo ẹmi mînyịmeke Jesus nte Messiah ẹtienede ẹdia Christmas, emi ekese mme andidọhọ ke idi mme Christian ẹsede nte usen emana esie? Nte mme ata Christian ẹkpenyene ndikpebe ekikere mmọ kaban̄a Christmas? Nnyịn iyokụt mme ibọrọ nte nnyịn idụn̄ọrede nte ẹkesan̄ade ẹnam Christmas ọwọrọ etop ke Korea, idụt eset emi odude ke Edem Usiahautịn.