Ntọt Mme Anditan̄a Obio Ubọn̄

India—“Edidianakiet ke Ufọt Nsio Nsio Orụk”

“EDIDIANAKIET ke Ufọt Nsio Nsio Orụk” edi ọwọrọetop ufiet oro ẹdade nditịn̄ mban̄a edidianakiet ofụri idụt ke India. Ndinyene edidianakiet ke akamba idụt emi akwa ukpụhọde odude ke ido, usem, ido ukpono, ekpụk, usịnen̄kpọ, ye udia idịghe ekpri n̄kpọ. Nte ededi, utọ edidianakiet oro odu ke ọfis utịm utom Mme Ntiense Jehovah ke India, idem okposụkedi mme anamutom unyịmesịt oro ẹdụn̄ọde ẹnyụn̄ ẹnamde utom do ẹtode nsio nsio stet ye ikpehe ẹnyụn̄ ẹsemde ediwak nsio nsio usem.

• Kere ban̄a Rajrani—n̄kaiferi emi otode Punjab, ke ata utịt utịt n̄kan̄ ufọt edem edere ye edem usoputịn India. Ke ini Rajrani okodude ke ufọkn̄wed, kiet ke otu nsan̄a ubet ukpepn̄kpọ esie ama ọtọn̄ọ ndikpep Bible ye Mme Ntiense Jehovah. N̄kaiferi emi ama odomo ndinam Rajrani enyene udọn̄ ke Bible. Sia nsan̄a ubet ukpepn̄kpọ oro mîketịmke ifiọk Ikọmbakara Enyọn̄-Ukpeme mîkonyụn̄ idụhe ke usem Punjabi ke ini oro, enye ama eben̄e Rajrani ete an̄wam imọ ndikabade se isịnede ke Enyọn̄-Ukpeme. Se Rajrani okokotde ke Enyọn̄-Ukpeme ama ọtọn̄ọ ndinen̄ede ntụk enye tutu kpa ye ubiọn̄ọ ete ye eka esie, enye ama anam n̄kọri ekesịm idaha ediyak uwem esie nnọ Jehovah Abasi. Ke anamde utom ke Bethel India mfịn, enye anam ata ukem n̄kpọ oro akatatde enye enyịn man okụt akpanikọ. Enye akabade mme n̄wed Christian esịn ke usem Punjabi!

• Kere n̄ko ban̄a Bijoe, emi otode ikpehe efen ke India—Kerala Stet emi odude ke n̄kan̄ ufọt edem usụk ye edem usoputịn. Ẹma ẹbịn Bijoe ke ufọkn̄wed sekọndri ke ntak edida san̄asan̄a ke mme ini edinam ufreidụt. Ke etienede ikpe anyan ini oro okosụn̄ọde ke n̄wọrọnda edikan ọnọ edisana utuakibuot, Bijoe ama afiak ọtọn̄ọ ufọkn̄wed.a Enye n̄ko ama ebe odụk akamba ufọkn̄wed. Nte ededi, oburobụt idaha oro okodude do ama afịna ubieresịt esie, ntre enye ama ọkpọn̄ ufọkn̄wed ke akpa ikpehe ini ufọkn̄wed. Idahaemi ke ama okodu isua duop ke Bethel, enye ọdọhọ ke imọ imọbọ ekese ufọn ito ndidi owo ubon Bethel oro adianade kiet oro mme andibuana ẹtode nsio nsio idụt akan nte imọ ikpọbọde ke ndika akamba ufọkn̄wed.

• Norma ye Lily ẹbe isua 70 ke emana ẹnyụn̄ ẹdi mme ebeakpa ke ediwak isua. Owo mmọ kiet kiet okụre se iwakde ibe isua 40 ke utom uyọhọ ini. Lily amanam utom ke n̄kọk itieutom ke n̄kpọ nte isua 20 nte akabade n̄wed usem Tamil. Norma ekedi Bethel isua 13 emi ẹkebede ke ebe esie ama akakpa. Ke ẹsiode mmọ ndidi nti uwụtn̄kpọ ke edinam utom ifịk ifịk ye ke ofụri esịt ẹfep, mmọ ẹdi odudu oro anamde mme owo ẹdiana kiet ẹnọ ofụri ubon Bethel oro. Mmọ ẹma ndikama isenowo, ndien mmọ ẹdara nsan̄a ye mbonubon oro ẹdide n̄kparawa, ẹbuanade idatesịt ediwak isua uwem Christian. Ndien n̄kparawa oro ke usiene ẹsikot mmọ ubet kaban̄a ebuana ẹsinyụn̄ ẹnọ un̄wam ke ini ẹyomde. Mmọ ẹdi nti uwụtn̄kpọ ke akpanikọ!

Sia ẹma ẹkekan asari oro edemerede en̄wan ye utọk ke ediwak ebiet, mme anamutom unyịmesịt emi ẹnam utom ọtọkiet ye inemesịt ke ndinam n̄kpọ nnọ mbon en̄wen nte mbonubon Bethel oro adianade kiet ke India.—Psalm 133:1.

[Ikọ idakisọn̄]

[Ebiet Ẹdade Ndise Ẹto ke page 8]

Edem Edem: Mountain High Maps® Copyright © 1997 Digital Wisdom, Inc.