Ndi Amada Mbonusọn̄ Ẹdide Ekemmọ Mme Andinịm ke Akpanikọ ke Ọsọn̄urua?
KE INI Israel eset okodude ke itie ebuana ediomi ye Abasi, ẹma ẹnọ mmọ ẹwụhọ ẹte: “Daha da ke iso owo iwat, nyụn̄ kpono ebio-owo iso, nyụn̄ bak Abasi fo.” (Leviticus 19:32) Ntem, edikpono mbonusọn̄ ekedi ewụhọ Abasi, ndien ndinịm ewụhọ emi ekedi edisụk ibuot nnọ Abasi. Okposụkedi mme Christian mfịn mîdụhe aba ke idak Ibet Moses, ewụhọ emi eti nnyịn nte ke Jehovah ada mme asan̄autom esie oro ẹdide mbonusọn̄ ke ọsọn̄urua. (Mme N̄ke 16:31; Mme Hebrew 7:18) Nte nnyịn imada mmọ nte Jehovah adade? Nte nnyịn imada nditọete Christian nnyịn oro ẹdide mbonusọn̄ ke ọsọn̄urua?
Enye Ama Ada Akanieren Ufan Esie ke Ọsọn̄urua
Mbụk Bible kiet oro owụtde nte ẹkpekponode mbonusọn̄ odu ke 2 Ndidem. Enye obụk aban̄a akparawa prọfet oro ekerede Elisha emi akadade itie prọfet Elijah. Kere ban̄a se ikadade itie ke akpatre usen oro Elijah akanamde utom nte prọfet ke obio ubọn̄ esien Israel duop.
Usen oro, Jehovah ama ọdọhọ akanieren prọfet oro ete ọkpọn̄ Gilgal aka Bethel, ekem oto Bethel aka Jericho, onyụn̄ oto Jericho aka Akpa Jordan. (2 Ndidem 2:1, 2, 4, 6) Ke ofụri isan̄ oro ekekperede ndisịm kilomita 50, Elijah ama ọdọhọ Elisha utịm ikata ete okûtiene imọ. Nte ededi, kpa nte n̄kaiferi oro ekerede Ruth emi ke ediwak isua ikie ke mbemiso ọkọsọn̄ọde esịn ndikpọn̄ Naomi, kpasụk ntre, Elisha ikamaha ndikpọn̄ akanieren ufan esie. (Ruth 1:16, 17) Elisha ama ọdọhọ utịm ikata ete: “Ma uwem Jehovah, ye uwem ukpọn̄ fo, ndikpọn̄ke fi.” (2 Ndidem 2:2, 4, 6) Etisịm ini oro, Elisha ama ededi asan̄autom Elijah ke n̄kpọ nte isua itiokiet. Kpa ye oro, enye okosụk oyoyom ndika iso nnam utom ye Elijah mbịghi nte enye ekekeme. Ke akpanikọ, mbụk oro adian do ete: “Edikem ke mmọ ẹsan̄ade ẹka iso, ẹneme nneme, sese, . . . Elijah ọdọk ke heaven ke idio.” (Ufan̄ikọ 11) Elijah ye Elisha ẹkesụk ẹneme nneme tutu esịm akpatre ini oro Elijah okokụrede utom esie ke Israel. Ama enen̄ede ọdọn̄ akparawa prọfet oro ndibọ ekese item ye nsịnudọn̄ nte enye ekekeme nto akanieren prọfet oro ekenen̄erede enyene mbufiọk mi. Ana in̄wan̄-in̄wan̄ nte ke enye ama ada akanieren ufan esie emi ke ọsọn̄urua.
‘Nte Mme Ete ye Eka’
Idịghe ọkpọsọn̄ n̄kpọ ndikụt ntak emi Elisha akamade akanieren ufan esie oro ekedide prọfet—idem adade enye nte ete eke spirit. (2 Ndidem 2:12) Esisịt ini mbemiso Elijah okokụrede utom esie ke Israel, enye ama ọdọhọ Elisha ete: “Siak se ndinamde nnọ fi, ke mîka-imenke mi kan̄a ibọ fi.” (Ufan̄ikọ 9) Ntre, tutu esịm akpatre, Elijah ama ekere aban̄a idaha eke spirit owo oro edidade itie esie ye nte utom Abasi edikade iso.
Mfịn, edi n̄kpọ inemesịt ndikụt nte nditọete Christian nnyịn oro ẹdide mbonusọn̄ ẹwụtde ukem edu edikere mban̄a oro mme ete ye eka ẹsiwụtde, ke ndinyịme ndibuana ye n̄kparawa owo ifiọk ye ọniọn̄ oro mmọ ẹnyenede. Ke uwụtn̄kpọ, mme anam utom unyịmesịt oro ẹma ẹkenam utom ke anyan ini ke mme ọfis n̄kọk itieutom Mme Ntiense Jehovah ẹsinyịme ndin̄wam mbufa mbonubon Bethel ndinyene usọ oro ẹyomde man ẹnam utom mmọ. Kpasụk ntre, mme esenyịn oro ẹsan̄ade-san̄a ye iban mmọ oro ẹma ẹkesan̄a ẹse mme esop ke ediwak isua ẹsikop inemesịt ndibuana ekese ifiọkutom oro mmọ ẹnyenede ye mbon oro ẹbọde ukpep ndinam utom nte mme asan̄autom oro ẹsan̄ade-san̄a. N̄ko n̄ko, ke mme esop Mme Ntiense Jehovah ke ofụri ererimbot, nditọete nnyịn iren ye iban emi ẹdide mbonusọn̄ oro ẹsọn̄ọde ẹda ẹnam utom Jehovah ke ediwak isua ẹsikop inemesịt ndibuana ata ọniọn̄ ye ifiọkutom oro mmọ ẹnyenede ye mbufa owo oro ẹdude ke esop.—Mme N̄ke 8:14; Philippi 3: 17; Titus 2: 3-5.
Ata edikere mban̄a oro mme ima ima Christian ẹdide mbonusọn̄ ẹsiwụtde anam enen̄ede emem ndinọ mmọ ukpono. Mmọdo, oyom nnyịn ikpebe uwụtn̄kpọ Elisha ke ndinen̄ede n̄kpono mbonusọn̄ oro ẹdide ekemmọ mme andinịm ke akpanikọ. Nte apostle Paul etide nnyịn, ẹyak nnyịn ika iso inam n̄kpọ ye ‘n̄kani iren nte mme ete,’ inyụn̄ ida “n̄kani iban nte mme eka.” (1 Timothy 5:1, 2) Ke ndinam ntre, nnyịn imenen̄ede itịp isịn ke esop ke ofụri ererimbot ndikọri nnyụn̄ nsan̄a nte ọfọnde.
[Ndise ke page 30]
Ama ọdọn̄ Elisha ndinam utom ye Elijah mbịghi nte enye ekekeme
[Ndise ke page 31]
N̄kparawa owo ẹsibọ ufọn akamba akamba ẹto mme Christian oro ẹdide mbonusọn̄