Nte Abasi Enyịme Kpukpru Orụk Utuakibuot?
Se ẹsiwakde ndibọrọ:
▪ “Kpukpru ido ukpono ẹda ẹka afan̄ kiet.”
▪ “Idịghe se ẹkpepde edi akpan n̄kpọ, ama akam anam n̄kpọ Abasi ke ofụri esịt.”
Jesus ọkọdọhọ didie?
▪ “Ẹbe ke mfafaha inuaotop ẹdụk; koro usụn̄ emi adade owo esịm nsobo atatara onyụn̄ an̄wan̄a, mme andidụk ke esịt esie ẹnyụn̄ ẹwak; edi inuaotop emi adade owo esịm uwem afafaha usụn̄ esie onyụn̄ esịre, mme andikụt enye inyụn̄ iwakke.” (Matthew 7:13, 14) Jesus ikenịmke ke kpukpru ido ukpono ẹda ẹka afan̄ kiet.
▪ “Ediwak owo ẹyedọhọ mi ke usen oro ẹte, ‘Ọbọn̄, Ọbọn̄, nte nnyịn ikadaha enyịn̄ fo itịn̄ ntịn̄nnịm ikọ, inyụn̄ ida enyịn̄ fo ibịn mme demon iduọn̄ọ, inyụn̄ ida enyịn̄ fo inam ediwak utom odudu?’ Ndien adan̄aoro nyọdọhọ mmọ nte: Akananam ndiọn̄ọke mbufo! Ẹdianade mi ke idem, mbufo mme abiatibet.” (Matthew 7:22, 23) Jesus inyịmeke kpukpru mbon oro ẹdọhọde ke itiene enye.
EDIWAK mbon oro ẹsikade ido ukpono ẹnen̄ede ẹma ukpepn̄kpọ ye mme edinam mmọ. Edi nso ke mmọ ẹsinam edieke mme ukpepn̄kpọ emi mîkemke ye Ikọ Abasi, kpa Bible? Jesus ama owụt nte ọdiọkde nditiene item owo ke ini enye ọkọdọhọde mme adaiso ido ukpono eyo esie ete: “Mbufo ẹmenam ikọ Abasi akabade edi ikpîkpu ke ntak ido eset mbufo.” Ekem enye ama etịn̄ ikọ emi Abasi eketịn̄de mi, ete: “Mbio emi ẹkpono mi ke n̄kpọkinua mmọ, edi esịt mmọ ẹda nsannsan ye ami. Mmọ ẹka iso ndikpono mi ke ikpîkpu, koro mmọ ẹkpepde mme ewụhọ owo ke mme ukpepn̄kpọ mmọ.”—Matthew 15:1-9; Isaiah 29:13.
Edu uwem n̄ko edi akpan n̄kpọ kpa nte mme ukpepn̄kpọ ẹdide akpan n̄kpọ. Bible etịn̄ ntem aban̄a ndusụk owo oro ẹdọhọde ke ituak ibuot inọ Abasi, ete: “Mmọ ẹtan̄a an̄wan̄wa ẹte mmimọ imọfiọk Abasi, edi mmọ ẹkan̄ enye ke mme utom mmọ.” (Titus 1:16) Ke akpanikọ, Bible etịn̄ aban̄a ediwak owo ke eyo nnyịn ete: “Mmọ ẹma inemesịt utu ke ndima Abasi. Okposụkedi emi mmọ ẹdinamde nte imeten̄e Abasi, ido ukpono mmọ ididịghe ata ido ukpono. Ẹkûbuana n̄kpọ ndomokiet ye mme utọ owo oro.”—2 Timothy 3:4, 5, Contemporary English Version.
Oyom ẹnam n̄kpọ ke ofụri esịt, edi idịghe oro kpọt ke ẹyom. Ntak-a? Koro owo ekeme ndinam se mînenke ke ofụri esịt. Ke ntre, enen̄ede oyom ẹnyene nnennen ifiọk oro aban̄ade Abasi. (Rome 10:2, 3) Ndinyene ifiọk emi nnyụn̄ nnam n̄kpọ ekekem ye se Bible etịn̄de ayanam nnyịn inam se inemde Abasi esịt. (Matthew 7:21) Ntem, nnennen ido ukpono abuana eti esịt, nnennen ukpepn̄kpọ, ye nnennen edinam. Ndien nnennen edinam ọwọrọ ndinam uduak Abasi kpukpru usen!—1 John 2:17.
Edieke edimade ndifiọk n̄kpọ efen efen mban̄a se Bible etịn̄de ọnọ nnyịn aban̄a Abasi, sobo ye Mme Ntiense Jehovah man mmọ ẹkpenịm ukpepn̄kpọ Bible mfọn ye afo.
[Se ẹwetde ke ikpọ abisi ke page 9]
Nnennen ido ukpono abuana eti esịt, nnennen ukpepn̄kpọ, ye nnennen edinam