Ka Iso Nyene “Edisana Esịt” ke Ndiọkeyo Emi
“IDỤHE eke mîfiọkke ke owo idụhe aba edisana uwem ke Ufọkabasi.” Vittorio Messori, emi edide ọkọmbụk n̄kpọntịbe Ufọkabasi Catholic eketịn̄ ikọ emi ke ntak oburobụt ido oro ẹnamde ndondo emi ke Ufọkabasi Catholic ke Italy. N̄wedmbụk n̄kpọntịbe oro ẹkotde La Stampa ọdọhọ ke “ekpededi ẹdọhọ mme oku ẹdọ iban ndien, ke oro idikpanke n̄kpọ ndomokiet sia n̄kpọ nte oku itiaita ke otu oku duop ẹsinam mbubiam ido emi ye ekemmọ irenowo—edide ye nditọwọn̄ m̀mê ye ikpọ owo.”
Idiọkido ndiyọhọ kpukpru ebiet, owụt ke idu ke “mme akpatre usen” editịm n̄kpọ emi. (2 Tim. 3:1-5) Mbụk owụt ke ata ekese owo, esịnede mbon oro ẹdọhọde ke idi mme oku Abasi, ẹdidu oburobụt uwem idahaemi. Mmọ ẹdu obukpo uwem emi sia esịt mmọ ama abiara fap. (Eph. 2:2) Ntak edi oro Jesus ọkọdọhọde ke “ndiọi ekikere, uwotowo, efịbe, use, inọ, ikọ ntiense nsu, ikọ isụn̄i, ẹto owo ke esịt ẹwọn̄ọ.” (Matt. 15:19) Edi Jehovah Abasi oyom mme asan̄autom esie ẹma “edisana esịt.” (N̄ke 22:11) Ntre, nso ke Christian akpanam man enyene edisana esịt ke ndiọkeyo emi?
Nso ke Ndinyene “Edisana Esịt” Ọwọrọ?
Bible esiwak nditịn̄ mban̄a esịt ke ndamban̄a usụn̄. N̄wed kiet ọdọhọ ke se Bible okotde esịt, edi “se owo enen̄erede edi ke esịtidem” ye “se Abasi esinen̄erede ese ke idem owo; se isinamde owo edi ufan Abasi, ye se isinamde owo odu uwem nte enye odude.” Esịt nnyịn ada aban̄a ata ata owo emi idide. N̄wed emi owụt ke se Jehovah esidụn̄ọrede edi oro, se isinyụn̄ inamde enye ama mme asan̄autom esie edi oro.—1 Pet. 3:4.
Ke ini Bible ọdọhọde ke n̄kpọ “asana” onyụn̄ “eden̄i”, emi ekeme ndiwọrọ ke n̄kpọ oro asana ke enyịn owo. Emi n̄ko ekeme ndida mban̄a n̄kpọ emi owo mîsabakede, oro edi, n̄kpọ emi mîbiarake, mîdeheke, emi onyụn̄ ọfọnde, ke ido uwem ye ke enyịn Abasi. Jesus ọkọdọhọ ke Ukwọrọikọ esie ke Obot ete: “Inemesịt edi eke mmọ oro esịt asanade.” Enye eketịn̄ aban̄a mbon emi ndamban̄a esịt mmọ asanade. (Matt. 5:8) Oro edi, mbon emi ẹnyenede ata ima, ẹkerede nti n̄kpọ, ẹnyụn̄ ẹduakde nti uduak. Mmọ ẹma Jehovah ke ofụri esịt, inyụn̄ idịghe mbon esịt iba. (Luke 10:27) Ndi ọdọn̄ fi ndisana ntem?
Esisọn̄ Ndinyene “Edisana Esịt”
Akpana ubọk ye esịt asan̄autom Jehovah ẹsana. (Ps. 24:3, 4) Edi, nte eyo esesiere ntre ke etetịm ọsọn̄ mme asan̄autom Abasi ndinyene “edisana esịt.” Satan ye ererimbot esie emi, ye unana mfọnmma nnyịn ẹnen̄ede ẹyom ndidian̄ade nnyịn n̄kpọn̄ Jehovah. Ana ima “edisana esịt” inyụn̄ ibiere ndika iso nnyene enye man ikeme ndikan ndiọi odudu emi. “Edisana esịt” eyekpeme nnyịn onyụn̄ anam ika iso idi ufan Abasi. Didie ke ikeme ndika iso nnyene “edisana esịt”?
Mme Hebrew 3:12 ọdọhọ ete: “Ẹkpeme idem, nditọete, mbak owo mbufo ekededi edinyene esịt eke ọdiọkde onyụn̄ ananade mbuọtidem ke ndiwọn̄ọde n̄kpọn̄ Abasi uwem.” Ima itọtọn̄ọ ‘ndinana mbuọtidem,’ nnyịn idikemeke aba ndika iso nnyene “edisana esịt.” Mme nsu ewe ke Satan kpa Devil osu man anam nnyịn itre ndibuọt idem ye Abasi? Nsu emi esịne ukpepn̄kpọ edito ke unam mforo owo, ye ndidọhọ ke mme owo ẹkpedu uwem ẹnyụn̄ ẹkpono Abasi nte ẹkponode ke ebiet emi mmọ ẹdụn̄ọde, ye nte ke idịghe edisana spirit ke ẹkeda ẹwet Bible. Ikpanaha inịm utọ ndiọi ekikere emi ke akpanikọ. (Col. 2:8) Ndikot Bible kpukpru usen nnyụn̄ ntie n̄kere, ayanam ikeme ndibiọn̄ọ ndiọi ekikere emi. Ndifiọk akpanikọ emi odude ke Bible ayanam inen̄ede ima Jehovah inyụn̄ idara nte enye anamde n̄kpọ ye nnyịn. Ana inyene orụk ima emi edieke iyomde ndisịn ndiọi ekikere nnyụn̄ nnen̄ede mbuọt idem ye Jehovah, ndien emi ayanam ikeme ndika iso nnyene edisana esịt.—1 Tim. 1:3-5.
Ke Ini Ọdọn̄de Nnyịn Ndinam Se Mîfọnke
N̄kpọ en̄wen emi ekemede ndinam ọsọn̄ nnyịn ndika iso nnyene “edisana esịt” edi idiọk udọn̄ ye uma inyene. (1 John 2:15, 16) Ndima okụk m̀mê ndiyom ndinyene uwouwo inyene ekeme ndibiat esịt nnyịn, onyụn̄ ekeme ndinam inam se Abasi mîmaha. Ndusụk owo ẹsisu nsu, ẹdia inọ, mîdịghe ẹyịp okụk m̀mê mme n̄kpọ eken ke itieutom.—1 Tim. 6:9, 10.
Edi, iwụt ke imama ‘edisana esịt’ edieke ifehede ndiyat Jehovah esịt, imade se inende, inyụn̄ ibierede ndinyene eti esịt. Ima emi ayanam ika iso ‘inam akpanikọ ke kpukpru n̄kpọ.’ (Heb. 13:18) Edieke idude eti uwem, edinam akpanikọ nnyịn ayanam ẹtịn̄ eti n̄kpọ ẹban̄a Jehovah. Emilio eyenete nnyịn emi otode Italy esiwat ubomisọn̄ ọnọ ufọkutom emi ẹsimende mme owo ke obio mmọ ẹka isan̄. Usen kiet enye ama okụt ekpri ekpatokụk emi esịnede euro 470 (n̄kpọ nte ₦100,000.00). Idem ama akpa mbon itieutom mmọ ndikụt enye ọkpọn̄de okụk emi ọnọ akwaowo mmọ, ndien akwaowo emi ama ọkpọn̄ ọnọ andinyene. Se enye akanamde emi ama enem ndusụk mbon itieutom mmọ esịt tutu mmọ ẹnyịme ndikpep Bible. Ndien owo itiaba emi ẹtode ubon iba ẹma ẹkabade ẹdi mme asan̄autom Jehovah. Ndida edisana esịt nnam akpanikọ ekeme ndinam mbon en̄wen ẹditiene ẹtoro Abasi.—Titus 2:10.
N̄kpọ en̄wen emi ekemede ndinam esịt Christian edehe edi ndinyene idiọk ekikere mban̄a idan̄. Christian ekeme ndibiat esịt esie edieke enye etienede mbon ererimbot ekere ke idan̄ mbemiso ndọ, efịbe, idan̄ an̄wan ye n̄wan m̀mê eke erenowo ye erenowo idiọkke. Owo emi odude utọ oburobụt uwem emi ekeme ndikabade ndu uwem esịt iba, ededịp idiọkn̄kpọ esie. Utọ uwem emi iwụtke ke owo enyene “edisana esịt.”
Gabriele akana baptism ke ini enye ekedide isua 15, ndien ekedi anana baptism enye ọtọn̄ọ usiakusụn̄. Nte ini akakade, enye ama ọtọn̄ọ ndidụk idiọk ndụk, onyụn̄ esitiene mme ufan esie aka mme itie udia uwem. (Ps. 26:4) Ntem ke enye ọkọtọn̄ọ ndidu oburobụt uwem ye uwem esịt iba, ndien emi ama anam ẹbịn enye ẹsio ke esop Abasi. Ntụnọ emi ama anam enye afiak etie ekere n̄kpọ. Gabriele ọdọhọ ete: “Mma ntọn̄ọ ndinam mme n̄kpọ emi mmen̄kesidaha nte akpan n̄kpọ. Nsikot Bible kpukpru usen man se Jehovah etịn̄de enen̄ede an̄wan̄a mi, nsinyụn̄ mbiat ini n̄kot mme n̄wed esop Abasi. Mma ndikụt ufọn ukpep Bible, nnyụn̄ ndikụt nte ke ndikot Bible nnyụn̄ mbọn̄ akam ẹkeme ndisọn̄ọ owo idem.” N̄kpọ emi ama an̄wam enye ọkpọn̄ oburobụt uwem onyụn̄ afiak edi ufan Jehovah.
Gabriele ye n̄wan esie ẹdi mme asiakusụn̄ idahaemi. Se iketịbede inọ enye enen̄ede owụt ke ndikpep Bible ye mme n̄wed oro “ofụn emi anamde akpanikọ onyụn̄ enyenede ọniọn̄” osiode, ekeme ndinam owo enyene edisana esịt okûnyụn̄ odu oburobụt uwem.—Matt. 24:45; Ps. 143:10.
Nyene ‘Edisana Esịt’ ke Ini Idomo
Ukọbọ otode mme asua, nsọn̄ọn̄kpọ, ye idiọk udọn̄ọ, ẹsinam idem emem ediwak asan̄autom Abasi. Idiọk ekikere esidụk mmọ esịt ndusụk ini. N̄kpọ emi ama etịbe ọnọ Edidem David. Enye ọkọdọhọ ete: “Spirit mi ọmọfụhọ mi ke idem; esịt akpa mi ke idem.” (Ps. 143:4) Nso ikan̄wam enye ke utọ ini oro? David ama etie ekere mme n̄kpọ emi Jehovah akanamde ọnọ mme asan̄autom esie ye nte enye akanyan̄ade imọ. Enye ama ekere aban̄a mme n̄kpọ emi Jehovah akanamde ke ntak enyịn̄ Esie. David eketie ekere n̄kpọ Abasi. (Ps. 143:5) Ukem ntre, edieke ikerede iban̄a Andibot nnyịn, se enye akanamde ye se enye osụk anamde ọnọ nnyịn idahaemi, oro ayan̄wam nnyịn ke ini idomo.
Esịt esiyat nnyịn ke ini owo eduede nnyịn. Ndisitie n̄kere nte n̄kpọ emi eketịbede ekeme ndinam isua nditọete nnyịn. N̄kpọ emi ekeme ndinam itie nsannsan, inyeneke aba ini inọ nditọete nnyịn. Ndi ndinam ntem owụt ke omoyom ndinyene “edisana esịt”? Nnyịn ndinyene “edisana esịt” abuana nte isinamde n̄kpọ ye nditọete nnyịn ye nte isinamde n̄kpọ ke ini n̄kpọ etịbede.
Ndima “edisana esịt,” anam nnyịn emi idide ata mme Christian inen̄ede ikpụhọde ye mbon ererimbot emi akade-aka iso abiara mi. Esịt nnyịn ana sụn̄-n̄ ke ntak emi inamde n̄kpọ Abasi, ndien emi anam idu eti uwem. Ke akande oro, idi ufan Andibot ekondo, kpa Jehovah, emi amade mbon emi “esịt mmọ asanade.” (Ps. 73:1) Ih, nnyịn imekeme nditiene nsịne ke otu mbon oro ẹkopde inemesịt, koro ‘iyokụt Abasi’ nte enye edinyan̄ade mbon emi ẹmade “edisana esịt,” kpa nte Jesus ọkọn̄wọn̄ọde.—Matt. 5:8.