Buọt Idem ke Jehovah nte Utịt Asan̄ade Ekpere

“Mbufo ẹbuọt idem ke Jehovah kpukpru ini.”—ISA. 26:4.

1. Didie ke ikọt Abasi ẹdi isio ye mbon ererimbot?

NNYỊN idu uwem ke ererimbot emi ediwak owo mîdiọn̄ọke n̄kpọ m̀mê owo emi mmọ ẹkpebuọtde idem, ndusụk edi sia ẹnamde se iyatde mmọ m̀mê ẹkpude mmọ ata ediwak ini. Emi edi ata isio ye mme asan̄autom Jehovah! Ọniọn̄ Abasi ada mmọ usụn̄, ntre mmọ ẹdiọn̄ọ ke ifọnke ndibuọt idem ke ererimbot emi m̀mê ke “mbọn̄” esie. (Ps. 146:3) Utu ke oro, mmọ ẹyak uwem ye ini iso mmọ ẹsịn Jehovah ke ubọk, sia ẹdiọn̄ọde ke enye ama mmimọ ye nte ke enye esinam Ikọ esie kpukpru ini.—Rome 3:4; 8:38, 39.

2. Didie ke Joshua ọkọsọn̄ọ ke ẹkeme ndiberi edem ke Abasi?

² Ke eset, Joshua ama owụt ke ẹkeme ndiberi edem ke Abasi. Ke ekperede ini n̄kpa esie, enye ama asian ekemmọ nditọ Israel ete: “Mbufo ẹmetịm ẹfiọk ke ofụri esịt mbufo ye ke ofụri ukpọn̄ mbufo ẹte ke baba ikọ kiet ke otu kpukpru nti ikọ emi Jehovah Abasi mbufo eketịn̄de ọnọ mbufo ikpụhu. Kpukpru ẹmesu ẹnọ mbufo.”—Josh. 23:14.

3. Nso ke Enyịn̄ Abasi ayarade aban̄a enye?

³ Jehovah esisu un̄wọn̄ọ esie ke ntak emi enye amade mme asan̄autom esie, edi akpan akpan n̄ko ke ntak enyịn̄ esie. (Ex. 3:14; 1 Sam. 12:22) Ntọn̄ọikọ ke The Emphasized Bible emi J. B. Rotherham ewetde etịn̄ ntem aban̄a enyịn̄ Abasi: “[Enye] edi akakan un̄wọn̄ọ; Abasi ndikeme ndikpụhọde ntiene idaha ekededi, mfịna ekededi, n̄kpọ ekededi oro etịbede . . . [Enye] edi en̄wọn̄ọ, . . . ediyarade, n̄kpọ editi, ye ubiọn̄ oro ẹnọde. Abasi ayanam se Enyịn̄ emi adade aban̄a; tutu amama bụt idinamke enye iban̄a enyịn̄ emi.”

4. (a) Nso ke Isaiah 26:4 ọdọhọ nnyịn inam? (b) Nso ke idineme ke ibuotikọ emi?

⁴ Bụp idemfo ete: ‘Ndi mmetịm ndiọn̄ọ Jehovah n̄kem ndibuọt idem ye enye? Ndi mmenyene mbuọtidem mban̄a ini iso, sia ndiọn̄ọde nte ke Abasi akara kpukpru n̄kpọ?’ Isaiah 26:4 ọdọhọ ete: “Mbufo ẹbuọt idem ke Jehovah kpukpru ini, koro Jah Jehovah edi nsinsi Akwa Itiat.” Edi akpanikọ ke Abasi inamke n̄kpọ ye mme owo ke utịbe utịbe usụn̄ idahaemi nte ekesinamde ke eyo Bible. Nte ededi, sia enye edide “nsinsi Akwa Itiat,” imekeme ndibuọt idem ke enye “kpukpru ini.” Didie ke Abasi nnyịn oro ẹkemede ndiberi edem esin̄wam mme anam-akpanikọ asan̄autom esie mfịn? Ẹyak ineme usụn̄ ita: Enye esisọn̄ọ nnyịn idem ke ini iyomde un̄wam esie man ikan idomo, enye esin̄wam nnyịn ke ini mme owo mînyeneke udọn̄ ke etop nnyịn m̀mê ke ini ẹbiọn̄ọde nnyịn, ndien enye esisọn̄ọ nnyịn idem ke ini esịt ọduọde nnyịn. Nte idụn̄ọrede mme ikpehe emi, kere ban̄a nte ekemede ndinen̄ede mbuọt idem ke Jehovah.

Buọt Idem ke Abasi ke Ini Ẹdomode Fi man Anam Idiọkn̄kpọ

5. M̀mọ̀n̄ ke ikeme ndisobo akamba idomo iban̄a mbuọtidem nnyịn ke Abasi?

⁵ Emem utom ndibuọt idem ke Jehovah oyosu se enye ọn̄wọn̄ọde aban̄a Paradise isọn̄ m̀mê ediset ke n̄kpa—kpa mme n̄kpọ emi ẹnen̄erede ẹdọn̄ nnyịn ndikụt. Edi ekeme ndisọn̄ ndibuọt idem ye enye ke mme n̄kpọ oro ẹban̄ade ido uwem, nditịm nnịm ke esịt nnyịn nte ke enen ndinam se enye oyomde ye nte ke emi ayanam inyene akakan idatesịt. Edidem Solomon ekewet item emi: “Buọt idem ye Jehovah ke ofụri esịt fo kûnyụn̄ uberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” (N̄ke 3:5, 6) Kop nte ẹsiakde “usụn̄” nnyịn do. Ke akpanikọ, ofụri usụn̄ nnyịn—idịghe sụk se nnyịn mme Christian idoride enyịn iban̄a—ẹkpenyene ndiwụt ke imọbuọt idem ke Abasi. Didie ke ikeme ndiwụt mbuọtidem oro ke mme ini idomo?

6. Didie ke ikeme ndisọn̄ọ ubiere nnyịn ndisọn ndiọi ekikere?

⁶ Nnyịn ndiwọn̄ọde n̄kpọn̄ idiọk ọtọn̄ọ ke se ikerede. (Kot Rome 8:5; Ephesus 2:3.) Didie ndien ke afo ekeme ndisọn̄ọ ubiere fo ndisọn idiọk ekikere? Kere ban̄a usụn̄ ition emi: 1. Bọn̄ akam ben̄e un̄wam Abasi. (Matt. 6:9, 13) 2. Tie kere mme uwụtn̄kpọ Bible oro ẹban̄ade mbon oro mîkakpan̄ke utọn̄ inọ Jehovah ye mbon oro ẹkekpan̄de. Ekem kere ban̄a se ikọwọrọde mmọ.a (1 Cor. 10:8-11) 3. Kere ban̄a ọkpọsọn̄ ubiak oro idiọkn̄kpọ edidade isọk fi ye mbon oro ẹmade fi. 4. Kere nte esitiede Abasi ke idem ke ini asan̄autom esie kiet anamde akwa idiọkn̄kpọ. (Kot Psalm 78:40, 41.) 5. Kere nte esinemde Jehovah esịt ndikụt anam-akpanikọ andituak ibuot nnọ enye ọsọnde idiọk edinam onyụn̄ anam se inende, edide ke ndịbe m̀mê ke eferife. (Ps. 15:1, 2; N̄ke 27:11) Afo n̄ko emekeme ndiwụt ke imọbuọt idem ke Jehovah.

Buọt Idem ke Abasi ke Ini Ubiọn̄ọ ye Unana Udọn̄

7. Mme idomo ewe ke Jeremiah okosobo, ndien ekesitie enye didie ke idem ndusụk ini?

⁷ Ediwak nditọete nnyịn ẹnam utom ke efakutom emi enen̄erede ọsọn̄ ndiyọ. Prọfet Jeremiah akanam utom ke utọ itie oro—ke mme akpatre usen oro ndutịme ọkọyọhọde obio ubọn̄ Judah. Enye ama esisobo ediwak idomo mbuọtidem ke usen ke usen sia enye okokopde uyo Abasi onyụn̄ atan̄ade ubiereikpe esie. Idem Baruch, ewetn̄wed Jeremiah, ama eseme ke imakpa mba ini kiet. (Jer. 45:2, 3) Ndi Jeremiah ama etre utom ukwọrọikọ ke ntak unana udọn̄? Edi akpanikọ ke ama odu ini emi idem ekememde enye. Enye okofiori ete: “Ọdọdiọk ọnọ usen oro n̄kamanade! Ntak emi n̄kọwọrọde ke itie eyen man ndikụt ọkpọsọn̄ utom ye mfụhọ, mme usen mi ẹkpenyụn̄ ẹsịm utịt ke bụt?”—Jer. 20:14, 15, 18.

8, 9. Jeremiah 17:7, 8 ye Psalm 1:1-3 ẹdọhọ ke nnyịn inyene ndinam nso man ika iso in̄wụm nti mfri?

⁸ Edi Jeremiah ikakpaha mba. Enye ama aka iso ọbuọt idem ye Jehovah. Nte utịp, anam-akpanikọ prọfet emi ama okụt nte ikọ Jehovah emi ẹwetde ke Jeremiah 17:7, 8 osude: “Ọfọfọn ọnọ owo oro ọbuọtde idem ye Jehovah, emi Jehovah edide ibetedem esie. Ndien enye ayakabade etie nte eto eke ẹtọde ke mben ediwak mmọn̄, oro ọdọn̄de orụn̄ esie ke mben akpa mmọn̄; ndien enye idikwe ini emi ufiop edide, edi ikọn̄ esie eyesehe. Ndien enye iditịmekede esịt ke isua unana edịm, enye idinyụn̄ itreke ndin̄wụm mfri.”

⁹ Ukem nte edisehe eto emi “ẹtọde ke mben ediwak mmọn̄,” m̀mê ke in̄wan̄ emi ẹsiduọkde mmọn̄, Jeremiah ‘iketreke ndin̄wụm mfri.’ Enye ikayakke ndiọi mbon nsahi oro ẹkedude ẹkan enye ẹkụk ẹtụn enye usụn̄. Utu ke oro, enye ama ọsọn̄ọ ada ye Andinọ “mmọn̄” uwem onyụn̄ ekere aban̄a kpukpru se Jehovah ọkọdọhọde enye. (Kot Psalm 1:1-3; Jer. 20:9) Nso eti uwụtn̄kpọ ke Jeremiah enịm ntem ọnọ nnyịn, akpan akpan nnyịn oro inamde n̄kpọ Abasi ke efakutom oro mîmemke! Edieke afo odude ke utọ ebiet oro, ka iso beri edem ke Jehovah, sia enye ayanam fi ekeme ndiyọ nte afo ‘atan̄ade enyịn̄ esie an̄wan̄wa.’—Heb. 13:15.

10. Mme edidiọn̄ ewe ke nnyịn ibọ, ndien nso mbụme ke ikpobụp idem nnyịn?

¹⁰ Jehovah ọnọ nnyịn ata ediye paradise eke spirit man an̄wam nnyịn iyọ ke mme akpatre usen emi. Enye anam ekese, esịnede edinọ nnyịn ofụri Ikọ Abasi emi ẹkabarede nte enende ẹdọn̄ ke ata ediwak usem. Enye amada otu ofụn emi anamde akpanikọ onyụn̄ enyenede ọniọn̄ ọnọ akpakịp udia eke spirit ke edikem ini. Enye onyụn̄ ọnọ nnyịn akwa otu nditọete ke mme mbono esop ye mme mbono nnyịn. Ndi afo emenen̄ede adia ufọn mme n̄kpọ emi? Kpukpru mbon emi ẹnamde ntre “ẹyesio n̄kpo idara ke ntak idatesịt.” Edi mbon oro mîkpan̄ke utọn̄ inọ Abasi “ẹyetuan̄a ke ntak ubiak esịt ẹyenyụn̄ ẹfiori n̄kpo ke ntak emi ẹfụhọde ke spirit.”—Isa. 65:13, 14.

Buọt Idem ke Abasi ke Ini Okopde Editịmede Esịt

11, 12. Sia afanikọn̄ ẹdude ke ererimbot emi, nso idi n̄kpọ oro owụtde ọniọn̄ ndinam?

¹¹ Nte ẹma ẹkebem iso ẹtịn̄, ubonowo ke osobo akpakịp n̄kpọ mbọm. (Matt. 24:6-8; Edi. 12:12) Ke ini ata ukwọ ọtọde emen ebiet, mme owo ẹsiwak ndifehe n̄ka enyọn̄ obot m̀mê ndidọk ọkọm n̄kodoro—ẹsika ebiet ekededi oro okon̄de. Ukem ntre, nte mme mfịna ererimbot osụk ọtọtde, ediwak miliọn owo ẹsiyom ubọhọ ẹto ikpọ ndutịm unyene okụk, n̄ka ukaraidem m̀mê eke ido ukpono, ye ke ifiọk ntaifiọk ye ifiọk ubotn̄kpọ. Edi ndomokiet ke otu n̄kpọ emi inen̄ekede ikpeme owo. (Jer. 17:5, 6) Edi mme asan̄autom Jehovah ẹnyene ọkpọsọn̄ ebiet ubọhọ—kpa “nsinsi Akwa Itiat.” (Isa. 26:4) Andiwet psalm ọkọdọhọ ete: “[Jehovah] edi akwa itiat mi ye edinyan̄a mi, kpa edikon̄ ebiet ubọhọ mi.” (Kot Psalm 62:6-9.) Didie ke ikeme ndinam Akwa Itiat emi edi ebiet ubọhọ nnyịn?

¹² Nnyịn isọn̄ọ iyịre ye Jehovah ke ini inamde Ikọ esie, emi esiwakde ndidi isio ye ọniọn̄ owo. (Ps. 73:23, 24) Ke uwụtn̄kpọ, mbon emi ẹtienede ọniọn̄ ererimbot ẹkeme ndidọhọ: ‘Uwem okụre ke se okụtde emi-o; nọ uwem se uwem oyomde.’ ‘Yom eti utom nam.’ ‘Nen̄ede n̄wana okụk.’ ‘Dep emi ye oko.’ ‘Ka isan̄; dia ererimbot.’ Edi ọniọn̄ Abasi odu ke n̄kemuyo ye item emi: “[Yak] mmọ eke ẹdade ererimbot ẹnam n̄kpọ ẹdu uwem nte mmọ eke mîdaha enye inam n̄kpọ ọyọhọ ọyọhọ; koro idaha ererimbot emi ke okpụhọde.” (1 Cor. 7:31) Kpasụk ntre ke Jesus esịn udọn̄ ọnọ nnyịn ete ibem iso iyom mme n̄kpọ Obio Ubọn̄ inyụn̄ ibon ‘n̄kpọuto nnyịn ke heaven,’ emi n̄kpọ ndomokiet mîdinamke.—Matt. 6:19, 20.

13. Ke ikerede iban̄a 1 John 2:15-17, nso ke ikpobụp idem nnyịn?

¹³ Ndi nte afo adade “ererimbot” ye “se idude ke ererimbot” owụt ke emenen̄ede ọbuọt idem ke Abasi? (1 John 2:15-17) Nte amama inyene eke spirit ye ifet edinam utom Obio Ubọn̄ akan se ererimbot ekemede ndinọ? (Phil. 3:8) Ndi omodomo ndinam ‘enyịn fo enen̄ede ese’? (Matt. 6:22) Edi akpanikọ ke Abasi iyomke nnyịn inana ibuot m̀mê idi ifu, akpan akpan edieke inyenede ubon ndise mban̄a. (1 Tim. 5:8) Edi enye oyom mme asan̄autom esie ẹnen̄ede ẹbuọt idem ke imọ—idịghe ke n̄kpakpa ererimbot Satan.—Heb. 13:5.

14-16. Didie ke ndusụk owo ẹbọ ufọn ‘edinam enyịn mmọ enen̄ede ese’ nnyụn̄ mbem iso nyom Obio Ubọn̄?

¹⁴ Kere ban̄a Richard ye Ruth emi ẹnyenede nditọ ita. Richard ọdọhọ ete: “Mma nnen̄ede ndiọn̄ọ ke mmekeme ndinam ekese nnọ Jehovah. Mma n̄kop uyụhọ ke uwem, edi n̄kekere ke n̄kọnọ Abasi nyọhọ-nsụhọ. Ke ima ikọbọn̄ akam inyụn̄ itie ibat se iditakde, ami ye Ruth n̄wan mi ima inyịme ke nyọdọhọ eteutom mi enyịme mi nsinam utom usen inan̄ ke urua—kpa ye oro n̄kpọ ọkọsọn̄de ke idụt nnyịn. Ẹma ẹnyịme eben̄e mi, ndien mma ntọn̄ọ ndinam utom ntem ke ọfiọn̄ kiet.” Etie Richard didie ke idem idahaemi?

¹⁵ Enye ọdọhọ ete: “Owo ikpehe mi okụk awak aba nte ẹkesikpede, edi mmenyene usen 50 en̄wen ke isua ndida ndu ye ubon mi nnyụn̄ n̄kpep nditọ mi n̄kpọ. Mmọkwọrọ ikọ utịm ikaba n̄kan nte n̄kesikwọrọde, ukpepn̄kpọ Bible mi awak utịm ikata akan akpa, mmenen̄ede nda usụn̄ n̄ko ke esop. Ndien sia n̄kemede ndise mban̄a nditọ nnyịn idahaemi, Ruth ekeme ndinam usiakusụn̄ unọ un̄wam ke ini ke ini. Mmebiere ndika iso nnam emi adan̄a nte n̄kekeme.”

¹⁶ Roy ye Petina emi adiaha mmọ osụk odude ye mmọ ẹma ẹsụhọde ibat ini emi mmọ ẹsidade ẹnam utom mbakara man ẹkeme ndinam utom uyọhọ ini. Roy ọdọhọ ete: “Nsinam utom usen ita kpukpru urua, ndien Petina anam usen iba. Ima iwọrọ n̄ko ke akamba ufọk ika ekpri ufọk emi ememde utom ndise mban̄a. Nnyịn ikedi mme asiakusụn̄ mbemiso inyenede akpan ye adiaha nnyịn, ndien nnyịn ikosụk inyenyene udọn̄ ndisiak usụn̄. Ntem ke nditọ nnyịn ẹma ẹkekponi, nnyịn ima ifiak itọn̄ọ utom uyọhọ ini. Okụk ndomokiet imenke udomo ye mme edidiọn̄ oro ibọde.”

Yak “Emem Abasi” Ekpeme Fi Esịt

17. Sia mûdiọn̄ọke se n̄kpọn̄ edimande, didie ke N̄wed Abasi esidọn̄ fi esịt?

¹⁷ Owo nnyịn ndomokiet idiọn̄ọke se n̄kpọn̄ edimande, koro “ini ye n̄kpọntịbe unana idotenyịn” ẹsisịmde nnyịn kpukpru. (Eccl. 9:11) Edi nditre ndidiọn̄ọ se n̄kpọn̄ edimande ikpanamke nnyịn itịmede esịt nte esinamde mbon oro mînyeneke ukpeme emi Abasi esikpemede mme ufan esie. (Matt. 6:34) Apostle Paul ekewet ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde; ndien emem Abasi emi akande kpukpru ekikere eyekpeme mbufo esịt ye ekikere.”—Phil. 4:6, 7.

18, 19. Mme usụn̄ ewe ke Abasi esida ọdọn̄ nnyịn esịt? Nọ uwụtn̄kpọ.

¹⁸ Jehovah esidọn̄ ediwak nditọete nnyịn emi ẹnyenede mfịna esịt, onyụn̄ anam esịt mmọ ana sụn̄. Eyenete an̄wan kiet ọdọhọ ete: “Abiausọbọ ama odomo ediwak ini ndisịn mi ndịk ke idem man nnyịme ẹsịn mi iyịp. Akpa ikọ emi ọkọwọrọde enye ke inua ekedi, ‘Nso ndisịme ke ẹtịn̄ emi ẹban̄a iyịp?’ Kpa idaha oro ye ke mme ini eken, mma nsibọn̄ akam ke esịt mi nnọ Jehovah ndien emem esie ama ọdọn̄ mi esịt. Idem ama ọsọn̄ mi nte ukwak. Kpa ye oro idem ekememde mi sia iyịp mîkawakke mi ke idem, mma n̄keme ndida N̄wed Abasi ntịn̄ se nyomde.”

¹⁹ Ke ndusụk idaha Abasi ekeme ndida eyenete nnyịn m̀mê udia eke edikem ini nnọ ibetedem oro ẹyomde. Ekeme ndidi omokop eyenete ọdọhọde ete: “Mmenen̄ede mma ibuotikọ emi. Etie nte ẹkewet ẹnọ mi!” Ke akpanikọ, edieke ibuọtde idem ke Jehovah, enye oyodu ye nnyịn inamke n̄kpọ m̀mê nso ke nnyịn isobo. N̄kọ nnyịn idi mme “erọn̄” esie, enye onyụn̄ osio nnyịn enyịn̄ esie.—Ps. 100:3; John 10:16; Utom 15:14, 17.

20. Ntak emi mme asan̄autom Jehovah ẹdidụn̄de ke ifụre ke ini ẹdisobode ererimbot Satan-a?

²⁰ Nte “usen ifụtesịt Jehovah” asan̄ade ekpere, kpukpru n̄kpọ oro ererimbot Satan ọbuọtde idem ẹyewụre. Gold, silver, ye mme ọsọn̄urua n̄kpọ eken idikpemeke mme owo. (Zeph. 1:18; N̄ke 11:4) “Nsinsi Akwa Itiat” nnyịn edidi n̄kukụre ebiet ubọhọ. (Isa. 26:4) Ntem ẹyak iwụt ọyọhọ mbuọtidem nnyịn ke Jehovah ke ndikop uyo nsan̄a ke ndinen usụn̄ esie, ke nditan̄a etop Obio Ubọn̄ esie kpa ye oro mme owo mînyeneke udọn̄ m̀mê ke ini isobode ubiọn̄ọ, ye ke ndikpat kpukpru se itịmerede nnyịn esịt nnọ enye. Nte inamde mme n̄kpọ emi, ke akpanikọ, nnyịn ‘iyodụn̄ ke ifụre, idinyụn̄ ikopke ndịk afanikọn̄.’—N̄ke 1:33.

[Ikọ Idakisọn̄]

Nte Afo Emekeme Ndinam An̄wan̄a?

Didie ke nnyịn ikeme ndibuọt idem ke Abasi

• ke ini ẹdomode nnyịn man inam idiọk n̄kpọ?

• ke ini isobode ubiọn̄ọ m̀mê unana udọn̄?

• ke ini ikopde editịmede esịt?

[Ndise ke page 13]

Ndinịm mme edumbet Abasi anam ẹkop inemesịt

[Ndise ke page 15]

“Jehovah edi nsinsi Akwa Itiat”