Ndi Kpukpru Christian Ẹnen̄ede Ẹdi Christian?
MME Christian ẹdi ifan̄ ke ererimbot? N̄wed kiet [Atlas of Global Christianity] ọdọhọ ke n̄kpọ nte owo biliọn iba ye ubak ẹkedọhọ ke idi Christian ke 2010. N̄wed oro onyụn̄ ọdọhọ ke mmọ ẹka nsio nsio ufọkabasi 41,000, ke ufọkabasi emi kiet kiet ẹkpep nsio nsio n̄kpọ ẹnyụn̄ ẹnyene nsio nsio ibet emi mmọ ẹdade ẹdu uwem. Emi iyakke ndusụk owo ẹfiọk m̀mê mmanie ẹnen̄ede ẹdi Christian. Ntre, mmọ ẹsikere m̀mê kpukpru mbon emi ẹdọhọde ke idi Christian ẹnen̄ede ẹdi Christian.
Ẹyak inọ uwụtn̄kpọ ise m̀mê emi ayanam n̄kpọ emi afiak an̄wan̄a. Ke ini owo oyomde ndika idụt en̄wen, ẹsiyom enye etịn̄ idụt emi enye otode ọnọ mme anamutom ke adan̄a idụt oro. Enye esinyene n̄ko ndiwụt n̄wed emi ọsọn̄ọde ke enye oto idụt oro. Kpasụk ntre, ana ata Christian ananam n̄kpọ owụt ke imọ idi Christian, idịghe nditetịn̄ ke inua kpọt. Nso ke enye edinam iwụt?
Ẹketọn̄ọ ndikot mme mbet Jesus “mme Christian” ke isua 44 E.N. ama ekebe. Bible ọdọhọ ete: “Ke Antioch ke ẹkebem iso ẹkot mme mbet mme Christian ke ndausụn̄ Abasi.” (Utom 11:26) Omokụt do ke mme mbet Christ ke ẹkekot Christian. Nso inam owo edi mbet Jesus Christ? N̄wed oro The New International Dictionary of New Testament Theology ọdọhọ ete: “Owo ndidi mbet Jesus ọwọrọ ndinam se Jesus eketemede ke ofụri eyouwem esie.” Ke ntem, ata Christian edi owo emi anamde kpukpru se Jesus Christ ekekpepde onyụn̄ enịmde mme ewụhọ esie ketket kpukpru usen.
Ndi ẹkeme ndikụt utọ mbon oro ke otu ediwak mbon oro ẹdọhọde ke idi Christian mfịn? Nso ke Jesus ke idemesie ọkọdọhọ ke ẹdida ẹdiọn̄ọ ata mbet imọ? Iyom fi ese nte Bible ọbọrọde mme mbụme emi. Imọn̄ ida ibuotikọ ifan̄ oro ẹtienede idụn̄ọde n̄kpọ ition emi Jesus eketịn̄de, emi ẹdade ẹdiọn̄ọ ata mbet esie. Iyese nte akpa mme Christian ẹkenamde mme n̄kpọ emi. Iyonyụn̄ ikụt mbon oro ẹnamde emi ke otu mbon oro ẹdọhọde ke idi mme Christian mfịn.