Men Se Afo Enịmde Domo Ye Se Bible Ekpepde

NDI afo edi Christian? Edieke edide ntre, ọwọrọ esịne ke otu owo biliọn iba ye ubak emi ẹdọhọde ke idi mme anditiene Christ. Emi ọwọrọ ke n̄kpọ nte owo kiet ke otu kpukpru owo ita ke ererimbot ẹdọhọ ke idi Christian. Ata ediwak ufọkabasi mfịn ẹdọhọ ke idi Christian. Kpa ye oro, ukpepn̄kpọ ye edinam mmọ idịghe ukem. Se afo enịmde ke akpanikọ ekeme ndikpụhọde ye se mbon en̄wen emi ẹdọhọde ke idi Christian ẹnịmde. Ndi ufọn odu ndibiat ini ndụn̄ọde m̀mê se afo enịmde enen? Ufọn odu, edieke afo oyomde ndidi ata Christian.

Ẹkekot mme mbet Jesus “mme Christian.” (Utom 11:26) Ufọn ikodụhe ndidian enyịn̄ en̄wen nnọ mmọ sia otu mme Christian kiet kpọt okodu. Kpukpru mme Christian ẹketiene ukpepn̄kpọ ye item Jesus Christ emi edide Etubom mmọ. Nso kaban̄a ufọkabasi mbufo? Ndi ekere ke ufọkabasi mbufo ẹkpep se Christ ekekpepde ẹnyụn̄ ẹnịm se mme mbet Christ ẹkenịmde? Didie ke afo ekeme ndifiọk? N̄kukụre usụn̄ emi afo ekemede ndifiọk m̀mê se mbufo ẹkpepde enen edi ndise se Bible ọdọhọde.

Kere ise: Jesus Christ ikadaha N̄wed Abasi ibre mbre; akada enye nte Ikọ Abasi. Enye ikenemke esịt ye mbon oro ẹkesiakde mmọn̄ ke Ikọ Abasi man ekem ye se mmọ ẹkpepde. (Mark 7:9-13) Emi ọwọrọ ke ana ata mme anditiene Jesus ẹda kpukpru se mmọ ẹkpepde ẹto Bible. Ntre, akpana owo kiet kiet emi ọdọhọde ke idi Christian obụp idemesie ete, ‘Ndi se ẹkpepde ke ufọkabasi nnyịn ekem ye se Bible ekpepde?’ Man etịm ọbọrọ mbụme oro, da se ẹkpepde ke ufọkabasi mbufo ndomo ye se Bible ekpepde.

Jesus ọkọdọhọ ke ana ituak ibuot inọ Abasi ke akpanikọ, ndien akpanikọ oro odu ke Bible. (John 4:24; 17:17) Apostle Paul ọkọdọhọ ke nnyịn ndinyene “nnennen ifiọk akpanikọ” edinam ẹnyan̄a nnyịn. (1 Timothy 2:4) Ntre, ana se inịmde ekem ye akpanikọ emi Bible ekpepde sia se ẹdidade inyan̄a nnyịn edi oro.

NTE EKPEMENDE SE ENỊMDE ODOMO YE SE BIBLE EKPEPDE

Mbọk kot mbụme itiokiet oro ẹdude ke ibuotikọ emi nyụn̄ se nte Bible ọbọrọde mmọ. Kot mme itie N̄wed Abasi oro ẹsiakde ẹsịn, nyụn̄ tie kere ibọrọ mbụme emi kiet kiet. Bụp idemfo ete, ‘Ndi se ufọkabasi nnyịn ẹsikpepde edi ukem ye se Bible etịn̄de emi?’

Mbụme ye ibọrọ oro ẹdude ke ekebe emi ekeme ndinam ọfiọk m̀mê se ẹkpepde ke ufọkabasi mbufo enen. Ndi akpama ndimen mme n̄kpọ eken oro ẹsikpepde ke ufọkabasi mbufo ndomo ye se Bible ekpepde? Mme Ntiense Jehovah ẹyema ndin̄wam fi ọfiọk se Bible ekpepde. Emekeme ndidọhọ Mme Ntiense Jehovah ke ikpama ndikpep Bible. Omonyụn̄ ekeme ndika ikpehe Intanet nnyịn, jw.org/efi.

1 MBỤME: Anie edi Abasi?

IBỌRỌ: Jehovah, Ete Jesus, edi Abasi ke nsinsi, enye okobot kpukpru n̄kpọ, enye onyụn̄ okpon akan ke enyọn̄ ye ke isọn̄.

SE BIBLE ỌDỌHỌDE:

“Nnyịn imesikọm Abasi kpa Ete Ọbọn̄ nnyịn Jesus Christ kpukpru ini ke ini ibọn̄de akam iban̄a mbufo.”—Colossae 1:3.

“Jehovah, Abasi nnyịn, afo omodot ndibọ ubọn̄ ye ukpono ye odudu, koro afo okobotde kpukpru n̄kpọ.”—Ediyarade 4:11.

Se n̄ko Rome 10:13; 1 Timothy 1:17.

2 MBỤME: Anie edi Jesus Christ?

IBỌRỌ: Jesus edi Eyen Abasi. Ẹkebobot enye, ntre enye enyene ntọn̄ọ. Enye esikop uyo Abasi sia Abasi okpon akan enye.

SE BIBLE ỌDỌHỌDE:

“Ete omokpon akan mi.”—John 14:28.

“[Jesus] edi mbiet Abasi oro enyịn mîkwe, kpa akpan ke otu kpukpru edibotn̄kpọ.”—Colossae 1:15.

Se n̄ko Matthew 26:39; 1 Corinth 15:28.

3 MBỤME: Nso idi edisana spirit?

IBỌRỌ: Edisana spirit edi odudu emi Abasi esidade anam uduak esie. Enye idịghe owo. Bible etịn̄ aban̄a mbon emi ẹkeyọhọde ye edisana spirit. Abasi esinọ owo edisana spirit man ekeme ndinam uduak esie.

SE BIBLE ỌDỌHỌDE:

“Nte Elizabeth okopde ekọm Mary, nsekeyen ọfrọ ke idịbi esie; ndien Elizabeth ọyọhọ ye edisana spirit.”—Luke 1:41.

“Mbufo ẹyebọ odudu ke ini edisana spirit edide edidoro mbufo ke idem.”—Utom 1:8.

Se n̄ko Genesis 1:2; Utom 2:1-4; 10:38.

4 MBỤME: Nso idi Obio Ubọn̄ Abasi?

IBỌRỌ: Obio Ubọn̄ Abasi edi ukara Abasi ke heaven. Jesus edi Edidem Obio Ubọn̄ Abasi. Ibịghike, Obio Ubọn̄ emi ayanam ẹnam uduak Abasi mi ke isọn̄.

SE BIBLE ỌDỌHỌDE:

“Ekem ọyọhọ angel itiaba efri obukpon̄. Ndien n̄kpọsọn̄ uyo ẹwọrọ ke heaven, ẹdọhọ ẹte: ‘Obio ubọn̄ ererimbot emi amakabade edi obio ubọn̄ Ọbọn̄ nnyịn ye eke Christ esie, ndien enye ayakara nte edidem ke nsinsi nsinsi.’”—Ediyarade 11:15.

Se n̄ko Daniel 2:44; Matthew 6:9, 10.

5 MBỤME: Ndi kpukpru nti owo ẹdika heaven?

IBỌRỌ: Baba. Ibat ibat owo, emi Bible okotde “ekpri otuerọn̄,” ke Abasi emek ete ẹka heaven. Mmọ ẹyetiene Jesus ẹkara.

SE BIBLE ỌDỌHỌDE:

“Ẹkûfehe ndịk, ekpri otuerọn̄, koro Ete mbufo emenyịme ndida obio ubọn̄ oro nnọ mbufo.”—Luke 12:32.

“Mmọ ẹyedi mme oku Abasi ye Christ, ẹyenyụn̄ ẹkara nte ndidem ye enye.”—Ediyarade 20:6.

Se n̄ko Ediyarade 14:1, 3.

6 MBỤME: Nso ke Abasi aduak ndinam nnọ mme owo ke isọn̄ emi?

IBỌRỌ: Ke ini Jesus edikarade nnyịn, isọn̄ ayakabade edi Paradise, udọn̄ọ ye n̄kpa ididụhe aba, emem oyonyụn̄ odu ke ofụri isọn̄.

SE BIBLE ỌDỌHỌDE:

“Mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—Psalm 37:10, 11.

“Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.”—Ediyarade 21:3, 4.

Se n̄ko Psalm 37:29; 2 Peter 3:13.