Nso Ufọn ke Ukpepn̄kpọ Christ Enyene ke Idem Mme Owo?
IMENENEME ntak emi ata mme Christian mîsibreke mbre ukara. Edi didie ke mme Christian ẹkpewụt ke imoyom ufọn obio mmimọ? Usụn̄ kiet edi ndinam ewụhọ Jesus emi: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.
Ndikwọrọ ikọ nnọ mme owo nte Jesus okowụkde enyene ebuana ye nditie nte inụn̄ isọn̄ ye un̄wana ererimbot. (Matthew 5:13, 14) Didie? N̄ko, nso ufọn ke utom ukwọrọikọ enyene ke idem mme owo?
Ukpepn̄kpọ Christ Etie nte Inụn̄ ye Un̄wana
Kpa nte inụn̄ mîsiyakke udia ọsọp abiara, etop oro Jesus ọkọdọhọde mme mbet esie ẹkwọrọ isiyakke owo abiara. Mbon oro ẹmade ndida etop emi ndu uwem idibiarake kpa ye oro ererimbot emi ama akabiara ama. Didie? Etop oro ikwọrọde anam mmọ ẹfiọk ke akpana itre ndiọi uwem nte edin̄wọn̄ sika. Mmọ n̄ko ẹdikụt ke akpana itọn̄ọ ndima kiet eken, itie ke emem, ime ime, ifọn ido, inyụn̄ inyene eti ido. (Galatia 5:22, 23) Utọ uwem emi esinam obio ọfọn. Mbon oro ẹkwọrọde etop Christ emi anamde mme owo ẹtọn̄ọ ndidu eti uwem ntem ẹnam ata akamba ufọn ẹnọ obio mmọ.
Ntak emi Jesus okonyụn̄ adade mme mbet esie odomo ye un̄wana? Kpa nte un̄wana esinamde owo okụt usụn̄, ntre n̄ko ke mme mbet Christ ẹnam mme owo ẹkụt usụn̄ Abasi. Mmọ ẹnam emi didie? Ke ndikwọrọ Ikọ Abasi nnyụn̄ ndu eti uwem.—1 Peter 2:12.
Jesus ama etịn̄ n̄ko nte mme Christian ẹbietde un̄wana, ete: “Owo isidomoke utuenikan̄ ida aban̄ ifụk, edi ẹsidori ke uwụk utuenikan̄, ndien enye ayama ọnọ kpukpru mbon emi ẹdude ke ufọk. Kpasụk ntre ẹyak un̄wana mbufo ayama ke iso owo.” Edieke ẹdomode utuenikan̄ ẹnịm ke ufọk, kpukpru owo oro ẹdude do ẹyekụt usụn̄. Ntre n̄ko, ana ata mme Christian ẹkwọrọ ikọ ẹnyụn̄ ẹdu eti uwem man kpukpru mbon oro ẹdụn̄de ẹkpere mmọ ẹkụt emi. Ntak-a? Jesus ọkọdọhọ ke emi ayanam mme owo ẹnọ Abasi ubọn̄.—Matthew 5:14-16.
Utom Ofụri Owo
Ke ini Jesus ọkọdọhọde ete, “Mbufo ẹdi un̄wana ererimbot . . . ẹyak un̄wana mbufo ayama,” enye eketịn̄ ikọ emi ọnọ kpukpru mme mbet esie. N̄kpasịp owo ifan̄ kpọt ikpekemeke ndinam un̄wana mmọ ayama ke ofụri ererimbot. Utu ke oro, kpukpru mme mbet Christ ẹdi un̄wana emi. Mme Ntiense Jehovah emi ẹwakde ẹbe miliọn itiaba ke se ibede idụt 235 ẹnịm ke kpukpru mmimọ inyene ndika ufọk mme owo n̄kọkwọrọ se Christ ọkọdọhọde mme anditiene enye ẹkwọrọ.
Nso ke Mme Ntiense Jehovah ẹsikwọrọ ẹban̄a? Ke ini Jesus okosiode mbet esie ọdọn̄ ukwọrọikọ, enye ikọdọhọke mmọ ẹkekpụhọde n̄kpọ ke obio m̀mê ke ukara, ẹmen ufọkabasi ye ukara ẹdian kiet, m̀mê mme n̄kpọ ntre, edi ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt.” (Matthew 24:14) Mmọdo, ata mme Christian ẹnyụn̄ ẹnam se Jesus ọkọdọhọde—oro edi, ndinam mme owo ẹkop eti mbụk Obio Ubọn̄ Abasi—kpa n̄kukụre ukara emi edisiode idiọk ukara Satan emi ifep inyụn̄ inam ererimbot emi ọfọn.
Ke ini okotde mme Gospel, oyokụt akpan n̄kpọ iba emi Jesus akanamde, emi ata mme Christian ẹnyụn̄ ẹnamde mfịn. Imọn̄ ineme n̄kpọ iba emi ke ibuotikọ oro etienede.
[Se ẹwetde ke ikpọ abisi ke page 8]
Didie ke etop emi mme Christian ẹkwọrọde etie nte inụn̄?
[Se ẹwetde ke ikpọ abisi ke page 9]
Didie ke etop Christ ebiet un̄wana?