Buọt Idem ye Jehovah Abasi Emi Enịmde “Mme Ini ye Mme Eyo”

“Enye onyụn̄ okpụhọde mme ini ye mme eyo, odorode ndidem onyụn̄ odori ndidem ke itie.”—DAN. 2:21.

DIDIE KE AFO ỌKPỌBỌRỌ?

Didie ke mme n̄kpọ-obot ye mme ntịn̄nnịm ikọ oro ẹsude ẹwụt ke Jehovah edi Akwa Ekpeme Ini?

Nso ke ndifiọk ke Jehovah edi Abasi emi enịmde “mme ini ye mme eyo” esịn udọn̄ ọnọ nnyịn ndinam?

Ntak emi mme n̄kpọntịbe ererimbot ye mme uduak owo mîkpanke Jehovah ndinam se enye aduakde?

1, 2. Nso iwụt ke Jehovah enen̄ede ọfiọk se ini edide?

JEHOVAH ABASI ọkọnọ se ẹdade ẹfiọk ini ata anyan ini ko mbemiso enye okobotde owo. Ke ọyọhọ usen edibotn̄kpọ inan̄, Abasi ọkọdọhọ ete: “Yak se inọde un̄wana ẹdu ke ikpaenyọn̄ man mmọ ẹbahade uwemeyo ye okoneyo; yak mmọ ẹnyụn̄ ẹdi idiọn̄ọ ndida mfiọk mme ini ye mme usen ye mme isua.” (Gen. 1:14, 19, 26) Nte ekemde ye uduak Jehovah, se ikonyụn̄ itịbede edi oro.

² Nte ededi, tutu esịm emi, ntaifiọk isụk ifiọkke nte ini etiede. N̄wed ofụri orụk ifiọk kiet ọdọhọ ete: “Ini edi kiet ke otu n̄kpọ oro ẹyan̄ade owo ifiọk ẹkan. Idụhe owo emi enen̄erede ọfiọk se enye edide.” Edi Jehovah enen̄ede ọfiọk se ini edide. N̄kọ enye edi “Andibot enyọn̄, . . . kpa Andibot isọn̄ ye Andinam enye.” Enye Jehovah n̄ko edi “Enye emi etịn̄de akpatre ke ntọn̄ọ, ndien ke eset enye etịn̄ mme n̄kpọ oro owo mînamke.” (Isa. 45:18; 46:10) Man isọn̄ọ mbuọtidem oro inyenede ke enye ye ke Ikọ esie, kpa Bible, ẹyak ineme nte n̄kpọ-obot ye mme ntịn̄nnịm ikọ ẹwụtde ke Jehovah edi Akwa Ekpeme Ini.

N̄KPỌ-OBOT ANAM INYENE MBUỌTIDEM KE AKWA EKPEME INI

3. Didie ke ẹkụt nte ini edide ata nnennen ke mme n̄kpọ-obot?

³ Imekeme ndikụt nte ini edide ata nnennen ke mme nịn̄inịn̄i ye mme akaka n̄kpọ ke ekondo. Ke uwụtn̄kpọ, nte ekondo ye mme ntantaọfiọn̄ ẹsisan̄ade anam mme owo ẹfiọk ata nnennen ebiet emi mmọ ẹdidade ke ini kiet kiet ke ikpaenyọn̄. Ndifiọk mme ebiet emi an̄wam mme owo ẹfiọk ndaeyo ye ukwọedịm ẹnyụn̄ ẹfiọk usụn̄ ke ini ẹkade isan̄. Ke akpanikọ, Jehovah—Andinam se ẹdade ẹfiọk ini emi ẹkemede ndiberi edem mi—‘ọsọn̄ odudu’ onyụn̄ odot itoro.—Kot Isaiah 40:26.

4. Didie ke ndammana ini ke mme odu-uwem n̄kpọ owụt ke Abasi enyene ọniọn̄?

⁴ Imekeme ndikụt nte ini edide ata nnennen ke mme odu-uwem n̄kpọ ke ererimbot. Ediwak eto ye mme unam ẹnyene ndammana ini oro ẹsinamde n̄kpọ. Ediwak inuen ẹsifiọk ini emi mmọ ẹkpewọrọde idụn̄. (Jer. 8:7) Mme owo n̄ko ẹnyene ndammana ini oro ẹsinamde n̄kpọ, oro esịn idem nnyịn esinam nnyịn ifiọk ini emi edide uwemeyo ye ini emi edide okoneyo. Edieke isan̄ade ke ubomofụm ika ebiet en̄wen ke ererimbot emi ini edide ata isio, idem nnyịn ekeme ndiyom usen ifan̄ ẹbe mbemiso okpụhọde ekekem ye obufa ini oro. Ntem, ediwak n̄kpọ ẹdu ke mme n̄kpọ oro Jehovah obotde ndiwụt ke enye edi Abasi emi enịmde “mme ini ye mme eyo” ye nte ke enye okop odudu onyụn̄ enyene ọniọn̄. (Kot Psalm 104:24.) Ndien sia Jehovah enyenede akaka ọniọn̄ ye odudu, imekeme ndibuọt idem nte ke enye ekeme ndinam uduak esie!

MME NTỊN̄NNỊM IKỌ ORO ẸSUDE KE INI ẸNAM INYENE MBUỌTIDEM

5. (a) Nso idi n̄kukụre usụn̄ emi ikemede ndifiọk ini iso ubonowo? (b) Ntak emi Jehovah ekemede nditịn̄ se iditịbede ye ini emi editịbede?

⁵ Mme n̄kpọ-obot ẹkpep nnyịn ekese ẹban̄a “mme edu [Abasi] oro enyịn mîkwe,” edi mmọ ibọrọke mme utọ akpan mbụme nte, Nso iditịbe inọ nnyịn ke ini iso? (Rome 1:20) Man inyene ibọrọ, ana ikot se Abasi ayararede ke Ikọ esie, kpa Bible. Ke ini ikotde enye, iyokụt mme ntịn̄nnịm ikọ emi ẹsisude kpukpru ini ke nnennen ini! Jehovah ekeme ndiyarade se mîtịbeke kan̄a sia enye ekeme ndida n̄kụt se iditịbede ke ini iso ata nnennen nnennen. Akan oro, se N̄wed Abasi etịn̄de enịm esisu ke nnennen ini sia Jehovah Abasi ekeme ndinam n̄kpọ etịbe nte enye akaduakde ye ke ini Esie.

6. Nso iwụt ke Jehovah oyom nnyịn ifiọk nte mme ntịn̄nnịm ikọ Bible ẹsude?

⁶ Jehovah oyom mme andituak ibuot nnọ enye ẹfiọk mme ntịn̄nnịm ikọ emi ẹdude ke N̄wed Abasi ẹnyụn̄ ẹbọ ufọn. Okposụkedi emi Abasi mîdaha ini nte nnyịn idade, ke ini enye etịn̄de ke n̄kpọ eyetịbe ke akpan ini, imekeme ndifiọk se enye etịn̄de aban̄a. (Kot Psalm 90:4.) Ke uwụtn̄kpọ, n̄wed Ediyarade etịn̄ aban̄a “angel inan̄” emi “ẹkeben̄ede mmọ idem ẹnịm ẹnọ hour ye usen ye ọfiọn̄ ye isua”—kpa ubatini emi nnyịn ikemede ndifiọk. (Edi. 9:14, 15) Ke ini ikụtde nte mme ntịn̄nnịm ikọ ẹsude ke mme akpan ini, emi ekpenyene ndinam nnyịn inyene mbuọtidem ke Abasi emi enịmde “mme ini ye mme eyo” ye ke Ikọ esie. Ẹyak ineme uwụtn̄kpọ ifan̄.

7. Didie ke ntịn̄nnịm ikọ Jeremiah emi aban̄ade Jerusalem ye Judah ndisu owụt ke Jehovah edi Akwa Ekpeme Ini?

⁷ Akpa kan̄a, yak ikere iban̄a se iketịbede ke n̄kpọ nte isua 2,700 emi ẹkebede. “Ke ọyọhọ isua inan̄ emi Jehoiakim eyen Josiah, edidem Judah, [akakarade],” uyo Akwa Ekpeme Ini “[ama esịm] Jeremiah aban̄a kpukpru mbon Judah.” (Jer. 25:1) Jehovah ọkọdọhọ ke ẹyesobo Jerusalem ẹnyụn̄ ẹtan̄ mme Jew ke Judah ẹka Babylon. Ke mmọ ẹyenam “n̄kpọ edidem Babylon ke isua ata ye duop.” Mbonekọn̄ Babylon ẹma ẹsobo Jerusalem ke isua 607 M.E.N., ẹnyụn̄ ẹtan̄ mme Jew ke Judah ẹka Babylon. Edi nso ikenyene nditịbe ke utịt isua 70? Jeremiah ọkọdọhọ ete: “Koro ntem ke Jehovah ọdọhọ ete, ‘Ke ini esịmde isua ata ye duop ke Babylon, ami nyọwọn̄ọde ntịn̄enyịn mi nnọ mbufo, nyonyụn̄ nnam eti ikọ mi kaban̄a mbufo osu ke ndida mbufo mfiak ndi ebiet emi.’” (Jer. 25:11, 12; 29:10) Ntịn̄nnịm ikọ emi ama osu ke ata nnennen ini—ke 537 M.E.N., ke ini mbon Media ye Persia ẹkeyakde mme Jew ẹnyọn̄ ke Babylon.

8, 9. Didie ke mme ntịn̄nnịm ikọ Daniel emi ẹban̄ade edidi Messiah ye editọn̄ọ ukara Obio Ubọn̄ heaven ẹwụt ke Jehovah edi Abasi emi enịmde “mme ini ye mme eyo”?

⁸ Kere ban̄a ntịn̄nnịm ikọ en̄wen emi aban̄ade ikọt Abasi ke eset. N̄kpọ nte isua iba mbemiso mme Jew ẹkekpọn̄de Babylon, Abasi ama anam Daniel etịn̄ enịm nte ke Messiah ọyọwọrọ owụt idem ke isua 483 ẹma ẹbe tọn̄ọ ke ini ẹdinọde uyo ẹte ẹfiak ẹbọp Jerusalem. Edidem Media ye Persia ọkọnọ uyo emi ke 455 M.E.N. Ndien ke ata nnennen ini—oro edi, ke isua 29 E.N.—isua 483 tọn̄ọ ẹkenọ uyo oro, ẹma ẹda edisana spirit ẹyet Jesus eyen Nazareth aran ke ini enye akanade baptism, enye onyụn̄ akabade edi Messiah.a—Neh. 2:1, 5-8; Dan. 9:24, 25; Luke 3:1, 2, 21, 22.

⁹ Idahaemi, se se N̄wed Abasi eketịn̄de enịm aban̄a Obio Ubọn̄. Ntịn̄nnịm ikọ Bible okowụt ke Obio Ubọn̄ Messiah ekenyene nditọn̄ọ ndikara ke heaven ke 1914. Ke uwụtn̄kpọ, Bible ama ọnọ “idiọn̄ọ” edidu Jesus emi owụtde ini oro ẹdisiode Satan ke heaven iduọk ke isọn̄, ndien ke ikpọ mfịna ẹyedu ke isọn̄. (Matt. 24:3-14; Edi. 12:9, 12) Akan oro, ntịn̄nnịm ikọ Bible ama owụt nnennen ini—1914—emi “edimek ini mme idụt [ediyọhọde],” Obio Ubọn̄ edinyụn̄ itọn̄ọde ndikara ke heaven.—Luke 21:24; Dan. 4:10-17.b

10. Nso ye nso mîditreke-tre nditịbe ke nnennen ini?

¹⁰ Ibịghike, “akwa ukụt” emi Jesus eketịn̄de aban̄a ọmọn̄ ọtọn̄ọ. Ndien ke oro ebede, Tọsịn Isua Ukara esie ọyọtọn̄ọ. Ke akpanikọ, mme n̄kpọ emi iditreke-tre nditịbe ke nnennen ini mmọ. Jehovah ama enenịm “usen ye hour” emi mme n̄kpọ emi ẹditịbede idem ke ini Jesus okodude mi ke isọn̄.—Matt. 24:21, 36; Edi. 20:6.

“ẸDEDEP IFET”

11. Nso ke ikpanam sia ifiọkde ke idu ke utịt ini?

¹¹ Nso ke ikpanam ke emi ima ikọfiọk ke Obio Ubọn̄ heaven ama ọtọn̄ọ ndikara, ndien ke nnyịn idu ke “utịt ini”? (Dan. 12:4) Ediwak owo ẹkụt nte n̄kpọ akade-ka iso ndidiọk ke ererimbot, edi imaha ndinyịme ke kpukpru emi ẹsu ntịn̄nnịm ikọ Bible emi aban̄ade mme akpatre usen. Ndusụk mmọ ẹkere ke usen kiet ke ererimbot ayabiara ama, ke ini ndusụk owo ẹkerede ke mme owo ẹyesịn “emem ye ifụre” ke isọn̄ emi. (1 Thess. 5:3) Edi nso kaban̄a nnyịn? Edieke nnyịn idiọn̄ọde ke idu ke ata utịt mme akpatre usen ererimbot Satan, ndi nnyịn ikpesịnke ukeme ndida ini oro osụhọde nnam n̄kpọ Abasi emi enịmde “mme ini ye mme eyo” nnyụn̄ n̄n̄wam mme owo ẹdifiọk enye? (2 Tim. 3:1) Ikpenyene ndinam nti ubiere ke nte idade ini nnyịn inam n̄kpọ.—Kot Ephesus 5:15-17.

12. Nso ke ikeme ndikpep nto se Jesus eketịn̄de aban̄a eyo Noah?

¹² Imemke utom ‘ndidep ifet’ ke ererimbot emi ekese n̄kpọ ẹsitịmerede owo mi. Jesus ama odụri nnyịn utọn̄ ete: “Kpa nte mme usen Noah ẹkedide, kpasụk ntre ke edidu Eyen owo edidi.” Mme usen Noah ẹketie didie? Ẹma ẹtịn̄ ẹnịm ke ererimbot ini oro eyesịm utịt. Ẹte ke Ukwọ ofụri ererimbot oyosobo mme idiọkowo. Sia Noah ekedide “ọkwọrọ edinen ido,” enye ama ọsọn̄ọ ada atan̄a etop Abasi ọnọ mbon eyo esie. (Matt. 24:37; 2 Pet. 2:5) Edi mmọ ẹma “ẹdia ẹnyụn̄ ẹn̄wọn̄, irenowo ẹdọ ndọ ẹnyụn̄ ẹda iban ẹnọ ke ndọ, . . . mmọ inyụn̄ ifiọkke tutu ukwọ edi edikpọri mmọ kpukpru efep.” Mmọdo, Jesus ama odụri mme anditiene enye utọn̄ ete: “Ẹdu ke mben̄eidem, koro ke hour emi mbufo mîkereke, Eyen owo eyedi.” (Matt. 24:38, 39, 44) Ana itie nte Noah, idịghe nte mbon eyo esie. Nso idin̄wam nnyịn idu ke mben̄eidem?

13, 14. Ke adan̄aemi itiede ibet edidi Eyen owo, nso ke ana iti iban̄a Jehovah emi edin̄wamde nnyịn ika iso inam n̄kpọ esie?

¹³ Okposụkedi emi Eyen owo edidide ke hour emi nnyịn mîkereke, ana iti ke Jehovah edi Akwa Ekpeme Ini. Mme n̄kpọntịbe ererimbot ye mme uduak owo ikpanke Jehovah ndinam se aduakde. Jehovah esikpụhọde mme n̄kpọ ye ini man osu uduak esie. (Kot Daniel 2:21.) Ke nditịm ntịn̄, Mme N̄ke 21:1 asian nnyịn ete: “Esịt edidem etie nte idịm mmọn̄ ke ubọk Jehovah. Enye ọwọn̄ọde enye aka kpukpru ebiet eke enye amama.”

¹⁴ Jehovah ekeme ndiwọn̄ọde mme n̄kpọ man osu uduak esie onyụn̄ anam ntre ke ini. Ediwak ikpọ ukpụhọde oro ẹdade itie ke ererimbot ẹsu ntịn̄nnịm ikọ, akpan akpan enye emi aban̄ade edikwọrọ eti mbụk Obio Ubọn̄ Abasi ke ofụri ererimbot. Ke uwụtn̄kpọ, kere ban̄a se iketịbede ke ini Soviet Union ọkọduọde. Iwakke-wak mbon emi ẹkpekenịmde ke utọ ikpọ ukpụhọde oro ke ukara ẹkpeda itie usọp usọp ntre. Nte ededi, mme ukpụhọde emi ẹnam ẹkeme ndikwọrọ ikọ ke ediwak idụt oro ẹkekpande utom nnyịn. Do, ẹyak ika iso idep ifet ke adan̄a nte ikekeme ida inam n̄kpọ Abasi emi enịmde “mme ini ye mme eyo.”

NYENE MBUỌTIDEM KE INI EMI JEHOVAH ENỊMDE

15. Didie ke ikeme ndiwụt ke imenyene mbuọtidem ke ini esop Abasi anamde ukpụhọde?

¹⁵ Man ika iso inam utom edikwọrọ Obio Ubọn̄ ke mme akpatre usen emi, oyom inyene mbuọtidem ke Jehovah oyosu uduak esie ke ini emi enye enịmde. Nte mme idaha ererimbot ẹkpụhọrede ekeme ndiyom ikpụhọde nte isinamde utom edinam mbet. Esop Abasi ekeme ndinam ukpụhọde ke ini ke ini man ẹse ẹban̄a se iyomde nte mme anditan̄a Obio Ubọn̄. Nnyịn idiwụt ke imenyene mbuọtidem ke Abasi emi enịmde “mme ini ye mme eyo” edieke inyịmede kpukpru ukpụhọde oro ẹnamde nte isọn̄ọde ida inam n̄kpọ Abasi ke idak Eyen esie, emi edide “ibuot ọnọ esop.”—Eph. 5:23.

16. Ntak emi ikpenyenede mbuọtidem ke Jehovah ayanyan̄a nnyịn ke nnennen ini?

¹⁶ Jehovah oyom nnyịn ibọn̄ akam inọ enye ke ofụri esịt inyụn̄ inyene mbuọtidem nte ke enye ọyọnọ se iben̄ede ke “nnennen ini oro nnyịn iyomde un̄wam.” (Heb. 4:16) Ndi emi iwụtke nte enye amade owo nnyịn kiet kiet? (Matt. 6:8; 10:29-31) Nnyịn iwụt ke imọbuọt idem ye Jehovah Abasi ke ndibọn̄ akam nnọ enye kpukpru ini, nnam n̄kpọ ntiene se iben̄ede Abasi ke akam, nnyụn̄ ntiene ndausụn̄ esie. Ke adianade do, nnyịn itreke ndisịn nditọete nnyịn ke akam.

17, 18. (a) Nso ke Jehovah aduak ndinam mme asua esie ke mîbịghike? (b) Nso ke nnyịn mîkpededei ikere?

¹⁷ Idịghe ini ‘ndiyok ke unana mbuọtidem’ edi emi, edi edi ini ndikop odudu ke mbuọtidem. (Rome 4:20) Mme asua Abasi—Satan ye mbon emi ẹdude ke idak esie—ke ẹdomo nditre utom emi Jesus ọkọnọde nnyịn. (Matt. 28:19, 20) Kpa ye oro Devil an̄wanade ye nnyịn, nnyịn imọfiọk ke Jehovah edi “odu-uwem Abasi, emi edide Andinyan̄a kpukpru orụk owo, akpan akpan mme anam-akpanikọ.” Enye “ọfiọk nte anyan̄ade mbon oro ẹten̄ede Enye osio ke idomo.”—1 Tim. 4:10; 2 Pet. 2:9.

¹⁸ Ibịghike, Jehovah ọmọn̄ osobo idiọk editịm n̄kpọ emi. Kpa ye emi nnyịn mîdiọn̄ọke ata nnennen ini emi utịt edidide, imọdiọn̄ọ ke ama ekem nnennen ini, ke Christ oyosobo mme asua Abasi, ndien ẹyewụt ke Jehovah enyene unen ndikara ofụri ekondo. Ke ntre, ọkpọdiọk etieti edieke nnyịn mîdiọn̄ọke ‘ini ye eyo’ emi nnyịn idude! Akpakam nnyịn idehedei ikere ke “n̄kpọ ẹtie kpa nte ẹketiede toto ke editọn̄ọ emi ẹkebotde mme n̄kpọ.”—1 Thess. 5:1; 2 Pet. 3:3, 4.

‘NYENE EDU EDITIE MBET’

19, 20. Ntak emi nnyịn ikpenyenede edu editie mbet Jehovah?

¹⁹ Kiet ke otu mme n̄kpọ emi Jehovah Abasi akaduakde ọnọ ubonowo edi ndidu ke nsinsi n̄kpep n̄kpọ mban̄a enye ye ndiye n̄kpọ-obot esie. Ecclesiastes 3:11 ọdọhọ ete: “Enye [Jehovah] amanam kpukpru n̄kpọ ẹye ke ini mmọ. Enye omonyụn̄ esịn mmọ nsinsi ini ke esịt man ubonowo okûfiọk utom oro ata Abasi anamde ọtọn̄ọde ke ntọn̄ọ tutu esịm utịt.”

²⁰ Esịt enen̄ede enem nnyịn ndifiọk ke Jehovah ikpụhọkede se enye aduakde aban̄a ubonowo! (Mal. 3:6) Abasi “ikemeke ndikpụhọde nte emi mbukpọn̄ okpụhọrede.” (Jas. 1:17) Enye ibatke ini nte owo abatde, utọ nte ndibat uwemeyo ye okoneyo. Jehovah edi “nsinsi Edidem.” (1 Tim. 1:17) Ke ntre, ẹyak nnyịn “[inyene] edu editie mbet Abasi edinyan̄a [nnyịn].” (Mic. 7:7) Ih, “ẹnyene uko, ẹnyụn̄ ẹsọn̄ esịt, kpukpru mbufo emi ẹbetde Jehovah.”—Ps. 31:24.

[Mme Ikọ Idakisọn̄]

[Ndise ke page 19]

Daniel ama ọbuọt idem ke ntịn̄nnịm ikọ Abasi oyosu

[Ndise ke page 21]

Ndi ke ada ini fo anam uduak Jehovah?