Ndi Odu Owo Emi Esikopde Akam?

“Mma nsikere m̀mê Abasi odu. Kpa ye oro, mma nsisụk mbọn̄ akam ndusụk ini. N̄kọdiọn̄ọke m̀mê odu owo emi esikopde akam emi. Edi mma nnịm ke akpana utọ owo oro odu. N̄kesikopke inemesịt, n̄konyụn̄ ndiọn̄ọke ntak emi idude uwem. N̄kamaha ndinịm ke Abasi odu sia n̄kekere ke mbon oro mîfiọkke n̄wed kpọt ẹsinịm ke Abasi odu.”​—PATRICIAa KE IRELAND.

NDI emesikere n̄kpọ nte Patricia ekekerede? Ndi emesibọn̄ akam kpa ye oro mûdiọn̄ọke m̀mê Abasi odu? Edieke edide ntre, ọwọrọ idịghe afo ikpọn̄ esikere n̄kpọ ntem. Kere ban̄a emi ise:

◼ Ndụn̄ọde oro ẹkenamde ye mbon Britain 2,200 okowụt ke owo 484 kpọt ẹkenịm ke Abasi odu; ke enye okobot ererimbot emi, ndien ke enye esikop akam. Edi owo 1,210 ke otu mmọ ẹsibọn̄ akam ke ini ke ini.

◼ Ke ndụn̄ọde oro ẹkenamde ye owo 10,000 ke nsio nsio idụt, n̄kpọ nte owo 3,000 oro ẹkedọhọde ke mmimọ inịmke ke Abasi odu ẹkedọhọ ke imesibọn̄ akam.

Ntak Emi Mmọ Ẹyịkde?

Ete kiet emi ekerede Allan ke England ọdọhọ ete: “N̄kesidọhọ ke nnịmke nte ke Abasi odu sia n̄kekere ke ẹkesiak ido ukpono man ẹda ẹn̄wana okụk ẹnyụn̄ ẹkara mme owo. N̄ko, mma nsikere nte edieke Abasi okpodude, kpukpru utụk ye ufịk emi ikpodụhe. Edi ndusụk ini mma nsitie ikpọn̄ mbọn̄ akam. Mma nsibụp idem mi nte, ‘N̄koto m̀mọ̀n̄ ndimana?’”

Owo kiet kiet emi ekerede n̄kpọ ntem enyene se inamde enye eyịk m̀mê akam odu Owo emi esibọrọde akam nnyịn. Ndusụk ini, se isinen̄erede inam mme owo ẹkere n̄kpọ ntem esidi sia mmọ mîdiọn̄ọke ibọrọ mbụme emi:

◼ Ndi Andibot odu?

◼ Ntak emi ido ukpono anamde-nam mme owo ẹdiọk?

◼ Ntak emi Abasi ayakde ibọ ufen?

Edieke ọkpọdiọn̄ọde ibọrọ mbụme emi, ndi oro akpanam enịm ke odu owo emi esikopde akam?

[Ikọ Idakisọn̄]