Esopikpe Europe Ọdọhọ ke Idiọkke Ndisịn Ndidụk Utom Ekọn̄ ke Ntak Ubieresịt

KE OFỤRI ererimbot, ẹdiọn̄ọ ke Mme Ntiense Jehovah isibreke mbre ukara isinyụn̄ idụkke utom ekọn̄ ke idụt ekededi. Mmọ ẹnen̄ede ẹnịm ke ana ‘ida akan̄kan̄ mmimọ idom n̄kpọ ufụn̄isọn̄,’ ke inyụn̄ inaha ‘ikpep aba ekọn̄.’ (Isaiah 2:4) Mmọ ikpanke mbon oro ẹmekde ndinam utom ekọn̄ ite ẹkûnam. Nso edieke esịt mîyakke Ntiense anam utom ekọn̄ edi ukara idụt emi enye odụn̄de ọdọhọ ke ana enye anam? Se ikọwọrọde akparawa emi ekerede Vahan Bayatan edi oro.

Se Ikanamde Ẹda Ikpe Ẹka Esopikpe Europe

Vahan akamana ke Armenia ke April 1983. Ke 1996, enye ye mbon eken ke ubon mmọ ẹma ẹtọn̄ọ ndikpep Bible ye Mme Ntiense Jehovah, ndien ke ini enye ekedide isua 16, enye ama ana baptism. Se enye ekekpepde ke Bible ama anam enye enen̄ede ama se Jesus ekekpepde, utọ nte item oro Jesus ọkọnọde mme anditiene enye ete ẹkûn̄wana ekọn̄. (Matthew 26:52) Esisịt ini ke Vahan ama akana baptism, ama enyene akpan ubiere oro akanade enye anam.

Ke ibet Armenia, ndidụk utom ekọn̄ edi amama ye mûmaha ọnọ kpukpru irenowo emi ẹsịmde isua 18. Edieke mmọ ẹsịnde ndinam emi, ẹkeme ndinọ mmọ ufen ke ndibiere n̄kpọkọbi oro awakde esịm n̄kpọ nte isua ita nnọ mmọ. Ama ọdọn̄ Vahan ndinam utom nnọ idụt mmọ. Edi enye ikoyomke ndinam n̄kpọ oro atuahade ye ubieresịt esie oro Bible ọnọde ukpep. Nso ke enye akanam?

Ke ndondo oro Vahan ekesịmde isua emi ẹsidade owo ke utom ekọn̄, ke 2001, enye ama ọtọn̄ọ ndiwet leta nnọ ukara Armenia. Enye ama etịn̄ ke leta esie ete ke ubieresịt ye se imọ ikpepde ke ido ukpono imọ idiyakke imọ inam utom ekọn̄. Edi enye ama ọdọhọ ke imọ imeben̄e idem ndinam utom efen oro ukara edinọde imọ utu ke ndinam utom ekọn̄.

Vahan ama ada se ibede isua kiet ewet n̄wed ọnọ ukara ete ke imọ idikemeke ndinam utom ekọn̄ ke ntak ubieresịt imọ. Edi ke September 2002, ẹma ẹmụm Vahan ẹnyụn̄ ẹdọhọ ke enye esịn nditiene nnam utom ekọn̄. Ẹma ẹbiere n̄kpọkọbi ọfiọn̄ 18 ẹnọ enye. Edi okot-ikpe oro ikoyụhọke ye ufen oro ẹkenọde Vahan. Ọfiọn̄ kiet kpọt ke ẹma ẹkebiere ikpe oro, okot-ikpe oro ama esịn eben̄e ke esop usion̄o ikpe ete ẹnọ Vahan ufen emi ọsọn̄de akan oro. Enye ọkọdọhọ ke Vahan ndidọhọ ke ubieresịt imọ iyakke inam utom ekọn̄ “ikemke ye ibet onyụn̄ ekeme ndida mfịna ndi.” Esop usion̄o ikpe ama anam se okot-ikpe oro okoyomde onyụn̄ anam n̄kpọkọbi Vahan akabade edi ọfiọn̄ 30.

Vahan ama osion̄o ikpe oro aka N̄kponn̄kan Esopikpe ke Armenia. Ke January 2003, N̄kponn̄kan Esop oro ama ọsọn̄ọ ubiereikpe oro esop usion̄o ikpe ọkọnọde. Ẹma ẹsọsọp ẹsio Vahan ẹka ufọk-n̄kpọkọbi emi ẹsidọn̄de mme owotowo ye mme anyam n̄kpọsọn̄ ibọk ye mme adan̄ owo ke n̄kanubọk.

Se Iketịbede ke Esopikpe Europe

Ọtọn̄ọde ke 2001, Armenia ama esịn enyịn̄ ke N̄ka Europe. Oro anam mbon Armenia ẹnyene unen ndision̄o ikpe n̄ka Esopikpe Europe Oro Esede Aban̄a Unen Owo ke ẹma ẹkenam kpukpru n̄kpọ ke idụt mmọ ndinyene unenikpe edi ikemeke. Se Vahan akanamde edi oro. Ke ikpe emi enye okosion̄ode, enye ọkọdọhọ ke ubiereikpe oro ẹkenọde imọ ke ndisịn ndinam utom ekọn̄ atuaha ye Ọyọhọ Ibet 9 ke Ediomi Europe Oro Aban̄ade Unen Owo. Enye okoyom esop emi ada se idude ke ibet oro owụt ukara idụt mmimọ ke imọ imenyene unen ndisịn ndinam utom ekọn̄ ke ntak ubieresịt imọ—kpa ikpe emi akanam owo mîkanke.

Esopikpe Europe Oro Esede Aban̄a Unen Owo ama ebiere ikpe oro ke October 27, 2009. Esopikpe oro ọkọdọhọ ke Ọyọhọ Ibet 9 ke Ediomi Europe oro enyịmede ke owo enyene unen ndinam ubiere ke idemesie, inọhọ owo unen ndisịn ndinam utom ekọn̄ ke ntak ubieresịt esie.

Etisịm ini emi, ẹma ẹsosio Vahan ke ufọk-n̄kpọkọbi, ndien enye ama ọdọ n̄wan onyụn̄ obon ekpri eyeneren. Vahan ikamaha ubiereikpe oro. Akana enye ebiere m̀mê ikpefefre enyịn iban̄a ikpe oro m̀mê ikpososion̄o ika N̄kponn̄kan Ikpehe ke Esopikpe Europe Oro Esede Aban̄a Unen Owo. Enye ama emek ndision̄o ikpe oro. Sia enyenede-nyene utọ ikpe oro N̄kponn̄kan Ikpehe Esopikpe emi esikpede, esịt ama enem Vahan ke ini ẹkenyịmede ndikpe ikpe esie.

Ke akpatre, ke July 7, 2011, N̄kponn̄kan Ikpehe ke Esopikpe Europe Oro Esede Aban̄a Unen Owo ama ebiere ikpe oro ke Strasbourg ke France. Mme ebiereikpe 16 ke otu 17 ẹma ẹnyịme ke Armenia ama abiat unen oro Vahan Bayatyan enyenede ndibiere n̄kpọ nnọ idemesie ke ini ẹkebierede n̄kpọkọbi ẹnọ enye ke ntak emi ubieresịt esie mîkayakke enye anam utom ekọn̄. N̄kukụre ebiereikpe emi mîkenyịmeke ye ubiereikpe oro ekedi owo Armenia.

Ntak emi ubiereikpe oro edide akpan n̄kpọ? Sia oro ekedi akpa ini emi Esopikpe Europe Oro Esede Aban̄a Unen Owo ọkọdọhọ ke Ọyọhọ Ibet 9 ke Ediomi Europe enyịme owo esịn ndinam utom ekọn̄ ke ntak ubieresịt esie. Esopikpe oro ọkọdọhọ ke ndibiere n̄kpọkọbi nnọ owo emi esịnde ndinam utom ekọn̄ ke ntak ubieresịt esie atuaha ye ibet ukara mbio obio oro ọnọde owo unen ndimek n̄kpọ ke idemesie.

Esopikpe oro ama etịn̄ n̄kpọ aban̄a idaha oro Mme Ntiense Jehovah ẹdade, ete: “Esopikpe emi inyeneke ntak ndomokiet ndiyịk nte ke se owo emi ekpepde ke ido ukpono esie anam enye esịn ndinam utom ekọn̄; se enye enịmde ke akpanikọ akpan enye ndinam utom ekọn̄ emi ẹdọhọ enye anam.”

Se Ẹkenamde Eban̄a Ubiere Oro

Ke n̄kpọ nte isua 20 emi ẹbede, ẹbiere ikpe ẹnọ se ibede Mme Ntiense Jehovah 450 ke Armenia, ke ntak emi ẹsịnde ndinam utom ekọn̄. Ke ini ẹkesụk ẹwetde ibuotikọ emi, n̄kparawa 58 emi ẹkesịnde ndinam utom ekọn̄ ke ntak ido ukpono ẹkedu ke ufọk-n̄kpọkọbi ke idụt oro. Ẹkebiere n̄kpọkọbi ẹnọ owo ition ke otu mmọ ke ẹma ẹkebiere enịm-mbụk ikpe Bayatyan ye ukara Armenia.a Ke ini kiet ke otu n̄kparawa oro ekesịnde eben̄e ete okot-ikpe idụt oro abiat ikpe oro enye okokokotde imọ nte abiatibet ke ntak emi imọ isịnde ndinam utom ekọn̄ efep, okot-ikpe oro ama esịn eben̄e oro. Okot-ikpe oro ekewet ke ibọrọ esie ete: “Ubiere oro Esopikpe Europe ọkọnọde ke ikpe Bayatyan ye ukara Armenia ke July 7, 2011, isan̄ake n̄kpọ ye ikpe enye emi, koro ikpe mbiba emi idịghe ukem.”

Ntak emi okot-ikpe oro ekekerede ntre? Ke ini ẹkedade Vahan Bayatyan ẹka esop, utom efen emi mîdịghe utom ekọn̄ ikodụhe. Ukara Armenia ọdọhọ ke ọtọn̄ọde ke ini oro ke ẹbọp ibet emi anamde utom emi mîdịghe utom ekọn̄ odu, ntre mbon oro ẹsịnde ndinam utom ekọn̄ ẹkeme ndinam utom oro. Edi, ibet oro enyịmede ẹnam utom emi mîdịghe utom ekọn̄ mi esịne mbonekọn̄ ke ubọk, ke ntre inyeneke ufọn inọ ediwak mbon oro ubieresịt mmọ mînyịmeke ẹnam utom ekọn̄ oro ẹdọhọde mmọ ẹnam idahaemi.

Vahan Bayatyan okop inemesịt ke akpan ubiere oro ẹkenamde ke ufọn esie. Ubiereikpe emi eyenyịk Armenia etre ndika iso nda mbon oro ukpepn̄kpọ ido ukpono mmọ anamde ẹsịn ndinam utom ekọn̄ n̄ka esop, ẹnyụn̄ ẹtre ndisịn mmọ ke ufọk-n̄kpọkọbi.

Idịghe uduak Mme Ntiense Jehovah ndikpụhọde ibet idụt ekededi. Edi ukem nte Vahan Bayatyan, mmọ ẹsida ibet idụt oro mmọ ẹdụn̄de ke esịt ẹyom unen mmọ. Ntak-a? Man mmọ ẹdu ke emem ẹnyụn̄ ẹnyene ifụre ndinam kpukpru n̄kpọ oro Adausụn̄ mmọ, Jesus Christ, ọdọhọ mmọ ẹnam.

[Ikọ Idakisọn̄]

[Ndise ke page 30]

Vahan Bayatyan ke iso Ufọk-N̄kpọkọbi Nubarashen ke Armenia

[Ndise ke page 30]

Bayatyan ye ekpeibet esie ke Esopikpe Europe Oro Esede Aban̄a Unen Owo, ke November 24, 2010

[Ndise ke page 31]

Bayatyan ye Tsovinar an̄wan esie, ye eyen mmọ, Vahe