Ndi Ufọkabasi Anam Owo Odu Eti Uwem?

Sylvia emi edide nurse ọdọhọ ete: “Ediwak mbon oro ikakade n̄wed ntre ẹma ẹsika ufọkabasi. Edi mmọ ẹma ẹsiyịp udomo ẹnyụn̄ ẹda n̄kpọsọn̄ ibọk ke idiọk usụn̄. Ufọkabasi ikanamke mmọ ẹdu uwem nte nditọ Abasi.”

Ete kiet emi ekerede Lionel ọdọhọ ete: “Mbon itieutom nnyịn ẹsisu nsu ẹnyụn̄ ẹdọhọ ke idọdọn̄ọ ke ini n̄kpọ ndomokiet mînamke mmọ. Mmọ ẹnyụn̄ ẹkaka ufọkabasi, edi inamke se Bible ekpepde.”

Omokụt do ke ndika ufọkabasi inamke ediwak owo odu eti uwem. Ediwak owo “ẹnyene enyọn̄ enyọn̄ ido uten̄e Abasi edi idụhe uwem ekekem ye odudu esie.” (2 Timothy 3:5) Ikpọ owo ufọkabasi mmọ inịmke eti uwụtn̄kpọ inọ mmọ, inyụn̄ ikpepke mmọ ata Ikọ Abasi emi akpanamde mmọ ẹdu eti uwem. Ntak edi oro ediwak owo ẹkerede ke nte mmimọ idude uwem ibeheke Abasi.

NSO KE BIBLE EKPEP?

Bible ekpep nnyịn nte ke n̄kpọ esitụk Abasi ye nte ke nte nnyịn idude uwem enen̄ede ebehe enye. Ke ini nditọ Israel ẹkesọn̄de ibuot ye Abasi, mmọ ẹma “ẹnam enye ayat esịt.” (Psalm 78:40) Edi ‘idatesịt esidu ke heaven’ ke ini owo akabarede esịt etre ndidu idiọk uwem. (Luke 15:7) Ke ini owo edide edifiọk nte Ete nnyịn eke heaven ọfọnde, emi esinam enye enen̄ede ama Abasi, ama se Abasi amade, onyụn̄ asua se Abasi asuade.—Amos 5:15.

MME NTIENSE JEHOVAH ẸSIDU UWEM DIDIE?

N̄wedmbụk n̄kpọntịbe kiet ọdọhọ ke Mme Ntiense Jehovah “ẹsinam mme ubon ẹdiana kiet ẹnyụn̄ ẹnam mme owo ẹdu eti uwem.” N̄wedmbụk emi aka iso ete: “Mmọ ẹsidu ata eti uwem. Mmọ ẹdiọn̄ọ ke ndin̄wọn̄ sika ye ikọn̄ekpo, ndin̄wọn̄ mmịn mbe ubọk, ndida n̄kpọsọn̄ ibọk ke idiọk usụn̄, ndibre mbre mfọniso, ndinam obụrobụt ido idan̄, iyakke owo asan̄a ekpere Abasi.”—Deseret News ke Salt Lake City, Utah, U.S.A.

Didie ke ndifiọk utọ owo emi Abasi edide an̄wam Mme Ntiense Jehovah? Sylvia emi iketịn̄de iban̄a ọdọhọ ete: “Mme anyam ibọk ẹsidia inọ etieti. Esidọn̄ mi nditiene ndia. Edi ndidiọn̄ọ nte Jehovaha adade utọ uwem emi isiyakke ntiene ndia. Esịt ibiomke mi, edi akam enenem mi.” Sylvia okụt ke ndinam se Bible ekpepde anam imọ idu eti uwem.