Mmọ Ẹma Ẹnọ Idemmọ Unyịme Unyịme Micronesia—Ke Micronesia

KATHERINE okokpon ke United States. Enye ama ana baptism onyụn̄ akabade Ntiense Jehovah ke ini ekedide isua 16. Enye ama esisịn idem ọkwọrọ ikọ, edi ediwak owo ke efakutom mmọ ikamaha etop Obio Ubọn̄ Abasi. Enye ọdọhọ ete: “Mma nsikot ifiọkutom mme owo emi ẹkeben̄ede Abasi ẹte ọdọn̄ owo edin̄wam mmimọ idiọn̄ọ enye. Ama esinyụn̄ ọdọn̄ mi ndisobo utọ mbon emi, edi akanam n̄kwe mmọ.”

Ke Katherine ama ọkọkwọrọ ikọ ke efakutom emi ke ediwak isua, enye ama ọtọn̄ọ ndikere ke akpana iwọrọ ika ebiet emi mme owo ẹnen̄erede ẹma etop Obio Ubọn̄ Abasi. Edi enye ama ekere m̀mê imọ iyekeme. Ini kiet kpọt ke enye ọwọrọ ọkpọn̄ ufọk tọn̄ọ enye akamamana. Ọkọwọrọ urua iba kpọt, edi ufọk ekesidọn̄ enye kpukpru usen. Kpa ye oro, sia ekenen̄erede ọdọn̄ enye ndin̄wam mbon oro ẹyomde ndifiọk Jehovah, enye ama ebiere ndiwọrọ n̄ka ebiet oro ẹnen̄erede ẹyom mme ọkwọrọikọ. Ke enye ama ekekere nsio nsio ebiet emi enye ọkpọwọrọde aka, enye ama ewet n̄kọk itieutom Guam, ndien mmọ ẹma ẹsian enye se enye okoyomde ndifiọk. Ke July 2007, ke ini Katherine ekedide isua 26, enye ama ọwọrọ aka Saipan, isuo emi odude ke Inyan̄ibom Pacific. Tọn̄ọ ke ufọk mmọ sịm do edi n̄kpọ nte kilomita 10,000. N̄kpọ eketie didie ye enye do?

ABASI ỌBỌRỌ AKAM IBA

Esisịt ini ke Katherine ama ekesịm obufa efakutom esie, enye ama osobo Doris emi ekedide n̄kpọ nte isua 45. Doris ama enyịme ndikpep Bible. Edi esịt ama ọtọn̄ọ nditịmede Katherine ke mmọ ẹma ẹkekpep n̄wed Bible Ekpep ẹsịm ibuot ita. Katherine ọdọhọ ete: “Doris ama enen̄ede ama ndikpep Bible, ntre n̄koyomke ndinam n̄kpọ ndomokiet emi edinamde enye etre. Akanam n̄kpepke owo n̄kpọ mbịghi ntem, ntre n̄kekere ke akpana nyak Doris nnọ eyenete an̄wan emi enen̄erede ọfiọk ndikpep owo n̄kpọ, emi onyụn̄ edide n̄ka esie.” Katherine ama ọbọn̄ akam eben̄e Jehovah ete an̄wam imọ ikụt eyenete an̄wan emi ikpayakde Doris inọ. Ekem, enye ebiere nditịn̄ nnọ Doris ke imọn̄ idọhọ owo en̄wen edikpep enye n̄kpọ.

Katherine ọdọhọ ete: “Mbemiso nnemede n̄kpọ emi ye Doris, enye ama ọdọhọ mi ke enyene mfịna emi iyomde ndineme ye ami. Ke enye ama eketịn̄ mfịna esie ama, mma ntịn̄ nnọ enye nte Jehovah akan̄wamde mi nyọ ukem mfịna oro. Enye ama ọkọm mi.” Ekem Doris ama ọdọhọ Katherine ete: “Jehovah ada fi an̄wam mi. Mma n̄kot Bible ke ediwak hour mbemiso ekedide ufọk mi akpa usen oro. Mma ntua eyet n̄kpe Abasi ubọk nte ọdọn̄ owo edikpep mi Bible. Ini oro ke afo ọkọkọn̄ usụn̄. Jehovah ama eyere akam mi!” Mmọn̄eyet ama asiaha Katherine ke ini enye okobụkde ifiọkutom emi. Enye ọdọhọ ete: “Ikọ Doris ekedi ibọrọ akam mi. Jehovah ama owụt mi ke mmekeme ndika iso n̄kpep Doris n̄kpọ.”

Doris ama ana baptism ke 2010, ke onyụn̄ ekpep mme owo Bible. Katherine ọdọhọ ete: “Esịt enen̄ede enem mi ndin̄wam owo edikpono Jehovah—n̄kpọ emi n̄kọbọn̄de-bọn̄ akam nyom ke anyan ini.” Katherine edi akpan asiakusụn̄ idahaemi ke isuo Pacific emi ekerede Kosrae.

NTE ẸKPESEDE ẸBAN̄A MFỊNA ITA EMI ẸSISOBODE

N̄kpọ nte nditọete iren ye iban ikie (ọtọn̄ọde ke isua 19 esịm isua 79) ẹto nsio nsio idụt ẹkenam utom ke Micronesia. Mmọ ẹda didie utom mmọ? Se Erica etịn̄de anam idiọn̄ọ nte mmọ ẹdade utom mmọ. Enye ekedi isua 19 ke ini ọkọwọrọde ọkọkwọrọ ikọ ke Guam ke 2006. Enye ọdọhọ ete: “Enem mi tutu ndinam utom usiakusụn̄ ke ebiet emi mme owo ẹnen̄erede ẹyom ndifiọk akpanikọ. Mmọkọm Jehovah etieti nte enye an̄wamde mi ntiene nnam utom emi. Idụhe utom eke ọfọnde ntem!” Erica edi akpan asiakusụn̄ ke Ebeye ke Marshall Islands. Edi ndiwọrọ n̄kanam utom ke idụt en̄wen asan̄a ye mfịna esiemmọ. Ẹyak ineme ita ke otu mfịna emi, inyụn̄ ise nte mbon oro ẹkewọrọde ẹkekwọrọ ikọ ke Micronesia ẹyọde mmọ.

Nte mme owo ẹdude uwem. Simon ekedi isua 22 ke ini enye okotode England aka isuo Palau ke 2007. Okụk oro enye akan̄wanade do ikedịghe n̄kpọ ndomokiet ke ẹmende ẹdomo ye se enye ekesin̄wanade ke obio mmọ. Enye ọdọhọ ete: “Mma n̄kpep nditre ndidep n̄kpọ ntịme ntịme. Idahaemi, ntetịn̄ enyịn nse n̄kpọ udia mbemiso ndepde, nsinyụn̄ nsasan̄a nyom ebiet emi ẹnyamde n̄kpọ afiak emem urua. N̄kpọ mi ama abiara, nsidepke ata obufa n̄kpọ nnọ ẹdiọn̄, nsidep akani, nnyụn̄ nyom owo emi edin̄wamde mi idiọn̄.” Didie ke ndidu mmemmem uwem an̄wam enye? Simon ọdọhọ ete: “Utọ uwem emi an̄wam mi mfiọk se inen̄erede idi akpan n̄kpọ, ye nte n̄kpadade ekpri okụk emi nnyenede ndu uwem. Mmokụt nte Jehovah an̄wamde mi ke nsio nsio usụn̄. Ke ofụri isua itiaba oro ndude mi, akanam nnanake se ndiade ye ebiet emi nnịmde ibuot.” Omokụt do ke Jehovah isikpọn̄ke mbon oro ẹdude mmemmem uwem man ẹbem iso ẹyom Obio Ubọn̄ esie!—Matt. 6:32, 33.

Ufọk esidọn̄ owo. Erica ọdọhọ ete: “Mmama mbonufọk nnyịn etieti, n̄konyụn̄ n̄kere ke mmọ ẹyedọn̄ mi itọn̄ tutu n̄kemeke ndisịn idem n̄kwọrọ ikọ.” Nso ke enye akanam mbak emi editịbe? Enye ọdọhọ ete: “Mbemiso n̄kọkpọn̄de ufọk, mma n̄kot mme ibuotikọ Enyọn̄-Ukpeme emi aban̄ade mbon emi itọn̄ ufọk ọkọdọn̄de. Emi ke n̄kada ntịm idem. Mma n̄kot nte mma kiet ọdọhọde eyen esie ete: ‘Jehovah eyese fi enyịn akan nte nsede.’ Ikọ oro ama enen̄ede ọsọn̄ọ mi idem.” Hannah ye Patrick ebe esie ẹkwọrọ ikọ ke Majuro ke Marshall Islands. Ufọk esidọn̄ Hannah, edi nte enye adiande idem ye nditọete ke esop mmọ iyakke emi afịna enye. Enye ọdọhọ ete: “Mmesikọm Jehovah kpukpru ini ke ndinam nnyene nditọete ke ofụri ererimbot; nda mmọ nte nditọeka mi. Mîkpedịghe mmọ, n̄kpekemeke ndinam utom ke ebiet emi ẹnen̄erede ẹyom mme ọkwọrọikọ.”

Esisọn̄ ndinyene ufan. Simon ọdọhọ ete: “Obio owo itiehe nte ufọk, kpukpru n̄kpọ ẹsitie owo esen esen. Ndusụk ini esidọn̄ mi ndinam mbubru ye mme owo, edi nsikemeke sia idin̄wan̄ake mmọ.” Erica ọdọhọ ete: “Ke nsonso oro, eketie nte ndinyeneke ufan, edi mma mfiak n̄kere se ikanamde n̄wọrọ ndi mi. N̄kọwọrọ ndi man nnam ekese nnọ Jehovah, n̄kedịghe ke ntak idemmi.” Enye adian do ete: “Nte ini akakade, mma ndinyene nti ufan oro mmade etieti.” Simon ama esịn idem ekpep usem Palauan. Emi ama anam enye ‘atat esịt esie’ ama nditọete ke esop mmọ. (2 Cor. 6:13) Enye ndikesịn idem n̄kpep usem emi ama anam nditọete ẹkpere enye. Ke ini nditọete oro ẹtode ebiet en̄wen ẹdianade kiet ẹnam n̄kpọ Abasi ye nditọete ke esop emi mmọ ẹwọrọde ẹka, mmọ ẹsikabade ufan ẹnyụn̄ ẹtetịm ẹkpere kiet eken. Nso ufọn en̄wen ke mbon emi ẹwọrọde ẹka ebiet emi ẹyomde un̄wam ẹsibọ?

‘DỌK UWAK UWAK’

Apostle Paul ọkọdọhọ ete: “Owo eke ọtọde ke ntatubọk ọyọdọk uwak uwak.” (2 Cor. 9:6) Mbon emi ẹwọrọde ẹka ebiet en̄wen ẹkekwọrọ ikọ ẹsibọ uwak edidiọn̄ emi ẹtịn̄de ẹban̄a ke itie N̄wed Abasi emi. Mme edidiọn̄ ewe ke mbon oro ẹwọrọde ẹka Micronesia ẹbọ?

Ediwak owo ke Micronesia ke ẹsụk ẹyoyom ndikpep Bible. Ntre imenyene ifet ndikpep mmọ n̄kpọ nnyụn̄ n̄kụt nte mmọ ẹdade se mmọ ẹkpepde ẹdu uwem ẹnyụn̄ ẹdide ẹdituak ibuot ẹnọ Abasi. Patrick ye Hannah n̄ko ẹma ẹkwọrọ ikọ ke Angaur, ekpri isuo emi owo 320 ẹdụn̄de. Ke mmọ ẹma ẹkedu do ọfiọn̄ iba, mmọ ẹma ẹsobo mma kiet emi ọbọkde nditọ ikpọn̄. Enye ama ọsọsọp enyịme ndikpep Bible, enịm se ẹkekpepde enye, onyụn̄ enen̄ede okpụhọde. Hannah ọdọhọ ete: “Kpukpru usen emi iwatde enan̄ukwak iwọrọ ke ufọk mma emi ke ima ikekpep enye n̄kpọ ima, imesise kiet eken inyụn̄ idọhọ ite: ‘Jehovah sọsọn̄ọ!’” Hannah ọdọhọ n̄ko ete: “Mmọfiọk ke Jehovah okpokosụk adada usụn̄ en̄wen an̄wam mma emi edifiọk enye, edi ima ikeme ndin̄wam owo emi enyenede eti esịt mi edifiọk Jehovah ke ntak emi ikọwọrọde idi ebiet emi ẹyomde mme ọkwọrọikọ. Kiet ke otu nti edidiọn̄ emi ibọde edi emi!” Erica ọdọhọ ke “nnyịn ikemeke nditịn̄ nte esịt esinemde owo ke ini enye an̄wamde owo en̄wen edifiọk Jehovah.” Se enye etịn̄de emi edi akpanikọ.

NDI EMEKEME NDITIENE N̄KAN̄WAM?

Ẹyom mme ọkwọrọikọ etieti ke ediwak ebiet. Ndi emekeme ndika n̄kan̄wam ke mme ebiet emi? Ben̄e Jehovah ete anam aka iso ọdọn̄ fi ndika n̄kan̄wam. Neme n̄kpọ emi ye mbiowo esop mbufo, esenyịn circuit, m̀mê mbon oro ẹkewọrọde ẹken̄wam ke ebiet oro ẹnen̄erede ẹyom mme ọkwọrọikọ. Ama emek ebiet emi edikade, wet leta nọ n̄kọk itieutom emi ẹsede ẹban̄a ebiet oro bụp n̄kpọ ban̄a ebiet oro.a Imenịm ke afo n̄ko emekeme ndisịne ke otu nditọete nnyịn—n̄kpri ye ikpọ, mbon emi ẹdọde ndọ ye mbon emi mîdọhọ—emi ẹbọde uwak edidiọn̄ ke ntak emi ẹwọrọde ẹka ebiet emi ẹyomde mme ọkwọrọikọ.