NDI AMA ỌFIỌK?
Ntak emi Joseph akakwatde ntan̄ebek mbemiso odụkde okokụt Pharaoh?
Ndise Emi Ke Ibibene Mbon Egypt Eset Owụt Nte Ẹkwatde Owo Idet
N̄wed Genesis anam idiọn̄ọ ke Pharaoh ama ọdọhọ ẹsọsọp ẹkesio Joseph eyen Hebrew ke ufọk-n̄kpọkọbi edi man enye editịn̄ se ndap imọ ọwọrọde sia ndap emi ama afịna enye etieti. Etisịm ini emi, Joseph ama ododu ke ufọk-n̄kpọkọbi ke ediwak isua. Okposụkedi emi Pharaoh okoyomde Joseph ọsọsọp edi, Joseph ama ada akwat ntan̄ebek. (Genesis 39:20-23; 41:1, 14) Ndiwet ikọ ntan̄ebek emi n̄ko nsịn ke Bible owụt ke andiwet Genesis ama enen̄ede ọdiọn̄ọ nte mbon Egypt ẹkesinamde n̄kpọ.
Ediwak mbon eset, esịnede nditọ Hebrew, ẹma ẹsiyak ntan̄ebek mmọ ọkọri. Edi, n̄wed kiet emi aban̄ade nte ẹkesinamde n̄kpọ ini oro ọdọhọ ke “mbon Egypt eset ẹkedi n̄kukụre mbon Edem Usiahautịn emi mîkamaha ẹnịm ntan̄ebek.”
Ndi ntan̄ebek kpọt ke mmọ ẹkesikwat? Magazine emi Biblical Archaeology Review ọdọhọ ke ekesidi ido mbon Egypt ndisinam idem mmọ asana mbemiso ẹkade ẹkekụt Pharaoh, kpa nte mmọ ẹsinyụn̄ ẹnamde mbemiso ẹdụkde temple. Ntem, anaedi Joseph ama akwat idet ke ibuot ye ke ofụri idem esie.
N̄wed Utom ọdọhọ ke ete Timothy ekedi Greek. Ndi emi ọwọrọ ke enye okoto Greece?
Ndikot owo Greek iwọrọke ke enye edi owo Greece. Ke nsio nsio n̄wed Bible oro apostle Paul ekewetde, ndusụk ini, enye ekesikot kpukpru mbon oro mîdịghe mme Jew, mme Greek. (Rome 1:16; 10:12) Kiet ke otu ntak emi ekedide ntre edi sia mme owo ke mme ebiet oro Paul ọkọkwọrọde ikọ ẹkesisem Greek ẹnyụn̄ ẹdu uwem nte mbon Greece.
Mmanie ke mbon eset ẹkesikot mme Greek? Ke n̄kpọ nte isua 2,400 emi ẹkebede, owo akwaifiọk eyen Athens emi ekekerede Isocrates ọkọdọhọ ke mme owo ke ofụri ererimbot ẹtọn̄ọ ndidu uwem nte mbon Greece. Enye ọkọdọhọ ke mbon oro ẹkotde Greek idịghe sụk mbon emi ẹtode Greece, edi ẹdi mbon oro ẹbọde ufọn ẹto ukpepn̄kpọ mmimọ. Ntem ẹkeme ndidọhọ ke etie nte ete Timothy ye mbon en̄wen oro Paul okokotde mme Greek ikotoho Greece, edi ẹkesidu uwem nte mbon Greece.—Utom 16:1.