Ndinen̄ede Nsịn Idem ke N̄kpọ Abasi Anam Ikop Inemesịt
DANIEL ye Miriam ẹkedọ ndọ ke September 2000, ẹnyụn̄ ẹwọrọ ẹkedụn̄ ke Barcelona, ke Spain. Daniel ọdọhọ ete: “Ikesidu utọ uwem emi mme owo ẹdade nte ata uwem. Ikanam utom oro ẹkesikpede nnyịn ediwak okụk. Ntre ikesidia udia ke itie unyamudia emi ọwọrọde etop, ika nsio nsio idụt ikadia uwem, inyụn̄ isịne ọfọn̄ emi ọsọn̄de urua. Nnyịn ikesinyụn̄ itreke ndika ukwọrọikọ.” Edi n̄kpọ ama etịbe usen kiet.
Ke akamba mbono kiet ke 2006, etịn̄ikọ kiet ama obụp ete: “Ndi nnyịn ke inam ofụri ukeme nnyịn man in̄wam mbon oro ‘ẹfụmde ẹka ebiet n̄kpa’ ẹdidụk usụn̄ oro adade esịm nsinsi uwem?” (N̄ke 24:11) Mbụme emi ama otụk Daniel etieti. Etịn̄ikọ oro ama ọdọhọ ke ana inam mme owo ẹkop eti mbụk sia emi ekeme ndinam mmọ ẹnyene uwem. (Utom 20:26, 27) Daniel ọdọhọ ete: “Eketie nte ke ami ke Jehovah etịn̄ ikọ oro ọnọ.” Etịn̄ikọ oro ama ọdọhọ n̄ko ke ndisịn idem n̄kwọrọ ikọ esinam owo etetịm okop inemesịt. Daniel ama ọfiọk ke emi edi akpanikọ, sia n̄wan esie okokop inemesịt akan ke ini enye ọkọtọn̄ọde utom usiakusụn̄.
Daniel ọdọhọ ete: “Mma mbiere ndinen̄ede nsịn idem nnam n̄kpọ Abasi.” Enye ama osụhọde ini oro enye ekesidade anam utom onyụn̄ ọtọn̄ọ ndisiak usụn̄. Enye ama ekere ke imọ ye n̄wan imọ iyetetịm ikop inemesịt edieke iwọrọde ika ebiet oro ẹnen̄erede ẹyom mme ọkwọrọikọ.
IMA IBỌ ETI MBỤK KE INI N̄KPỌ ỌKỌSỌN̄DE
Ke May 2007, Daniel ye n̄wan esie ẹma ẹkpọn̄ utom mmọ ẹnyụn̄ ẹwọrọ ẹka Panama emi mmọ ẹkesikade ẹkedia uwem. Efakutom mmọ ekedi Bocas del Toro emi ediwak isuo ẹdude; Bocas del Toro odu ke Inyan̄ Caribbean. Ata ediwak mbon Guaymi ẹdụn̄ọ mi. Daniel ye n̄wan esie ẹkekere ke okụk emi mmimọ inyenede eyekem se idade ise iban̄a idem mmimọ ke ọfiọn̄ itiaita.
Mmọ ẹkesiwat ke ubom ye enan̄ukwak ẹkekwọrọ ikọ ke mme isuo emi. Mmọ ifreke akpa ini emi mmọ ẹkewatde enan̄ukwak ke n̄kpọ nte kilomita 32 ẹdọk ikpọ obot ke usen emi eyo okofiopde etieti. Akayak nsịn̄ Daniel okpokosụhọ ke ntak mmemidem. Kpa ye oro, mme owo ẹma ẹsidara mmọ etieti, akpan akpan ke ini mmọ ẹkesidomode ndisem usem mbon Guaymi. Ikebịghike, mmọ ẹma ẹnyene nditọ ukpepn̄kpọ Bible 23.
Edi mmọ ẹma ẹfụhọ etieti ke ini okụk mmọ okokụrede. Daniel ọdọhọ ete: “Mmọn̄eyet ama asiaha nnyịn nte ikọtọn̄ọde nditịm idem ndifiak nnyọn̄ Spain. Nnyịn ikoyomke ndikpọn̄ nditọ ukpepn̄kpọ Bible nnyịn.” Edi mmọ ẹma ẹbọ eti mbụk ke ọfiọn̄ kiet ebede. Miriam ọdọhọ ete: “Ẹma ẹmek nnyịn mme akpan asiakusụn̄. Ama enem nnyịn ndika iso ndu mi n̄kwọrọ ikọ!”
SE INAMDE MMỌ ẸNEN̄EDE ẸKOP INEMESỊT
Ke ntak mme n̄kpọ oro ẹkekpụhọde ke esop Abasi ke 2015, ẹma ẹdọhọ Daniel ye Miriam ẹkabade ẹdi mme asiakusụn̄ ofụri ini. Mmọ ẹkenam n̄kpọ didie? Mmọ ẹkenam se ẹwetde ke Psalm 37:5, ẹte: “Kpat usụn̄ fo nọ Jehovah, nyụn̄ beri edem ke enye, ndien enye eyese aban̄a fi.” Mmọ ẹma ẹnyene utom emi akan̄wamde mmọ ẹkeme ndise mban̄a idemmọ ke adan̄a emi mmọ ẹsiakde usụn̄. Mfịn, mmọ ẹn̄wam esop kiet emi odude ke Veraguas, ke Panama.
Daniel ọdọhọ ete: “Mbemiso ikọkpọn̄de Spain, nnyịn ikenịmke ke imekeme ndisụk n̄kop inemesịt kpa ye oro nnyịn mîdụhe aba uwem nte imọ owo. Edi mfịn, imokop inemesịt inyụn̄ inanake baba eti n̄kpọ kiet.” Nso inam mmọ ẹnen̄ede ẹkop inemesịt? Mmọ ẹdọhọ ẹte: “Ndin̄wam mme owo ẹfiọk Jehovah anam inen̄ede ikop inemesịt!”