Ndiyụhọ Mme Udọn̄ Ukpen̄e Idara Idara

¹ Ih, ini ukpen̄e edi emi. Nnyịn idu idahaemi ke akpatre ini eyo emi, ndien Jesus ọkọdọhọ ke kiet ke otu n̄ke esie ete, “Ini ukpen̄e edi akpatre ini eyo emi.” (Matt. 13:39) Ke John 5:17, Jesus ọkọdọhọ ete: “Ete Mi ke ananam utom tutu esịm emi, Ami ke nnyụn̄ nnam.” Ke utom ini ukpen̄e emi, ikọt Jehovah isịnke idem ke edikwọrọ eti mbụk Obio Ubọn̄ kpọt edi n̄ko ke ndinam mme itie utuakibuot ẹdu. Udọn̄ odu idahaemi kaban̄a mme Ufọkmbono Obio Ubọn̄ akan nte akanam edide. Mme ntọt oro ẹbọde ke ndondo emi ẹto mme esenyịn circuit ẹwụt ẹte ke ẹbọp se ibede Ufọkmbono Obio Ubọn̄ 2,000 ke ubọk, ndien ẹmebọp ndusụk mmọ ke ediwak isua. Se iwakde ibe esop 300 ẹda mme ufọk oro ẹbọde ke ukpeokụk ẹnam n̄kpọ. Nte an̄wan̄ade ẹbọp n̄kpọ nte Ufọkmbono Obio Ubọn̄ 400 ẹkụre edi owo iyakke inọ kan̄a. Ke idatesịt, Jehovah omonụk mme anam-akpanikọ asan̄autom esie ndida usọ mmọ nnam n̄kpọ unyịme unyịme ke edibọp mme Ufọkmbono Obio Ubọn̄. Mmọ inamke utom ọkpọsọn̄ kpọt edi mmọ n̄ko ẹwụt edu idatesịt.

² Etie idahaemi nte eketiede ke eyo Nehemiah ke ini nditọ Israel ẹkesịnde idem ke edibọp ibibene Jerusalem. Nehemiah 4:6 ọdọhọ ete ke ‘esịt kpukpru owo okodu ke utom.’ Nso ikedi ukpọhọde eti idaha esịt emi? Ẹsiak enye nte ini akade ke Nehemiah 8:10: “Koro idatesịt Jehovah edide odudu mbufo.” Nnyịn ke akpanikọ imenyene kpukpru ntak ndidi mme anamutom idatesịt. Nnyịn imenyene edidiọn̄ Jehovah. Nnyịn imenyene spirit Jehovah, ndien idatesịt edi ubak mbun̄wụm spirit oro.—Gal. 5:22.

³ Ẹbabak Ẹsobo ye Kọmiti Ubọpufọk eke Ikpehe ke Ikpehe: Ke ini mme esop ẹkerede ẹban̄a edifiak ndiọn̄ m̀mê utom edibọp n̄kpọ obufa, mbiowo n̄kann̄kụk ẹkpenyene ndisobo ye Kọmiti Ubọpufọk eke Ikpehe ke Ikpehe ke ntọn̄ọ utom oro. N̄ka ọmọnọ mme Kọmiti Ubọpufọk eke Ikpehe ke Ikpehe mme ndausụn̄, ndien nditọete ẹmi ẹnyene ekese mbufiọk oro edin̄wamde ndifep mme ndudue ke ini ẹdepde isọn̄ ẹnyụn̄ ẹdiomide utom ubọpufọk. Edieke ẹsiande mmọ ọyọhọ ọyọhọ ẹban̄a kpukpru utom ke ikpehe oro ẹbaharede ẹnọ mmọ, kọmiti eke ikpehe ke ikpehe ekeme ndidiomi mme anamutom unyịmesịt man otodo ẹkụre kpukpru utom ye unana edida utom mfịk mme anamutom oro ẹnyenede.

⁴ Mme Kọmiti Ubọpufọk eke Ikpehe ke Ikpehe ẹwụt ima n̄waidem ke ediwak usụn̄, utọ nte edisan̄a anyan usụn̄ n̄kese mme esop oro ẹnọde mmọ ikot. Mbiowo ẹkpenyene ndidara mme ukeme mmọ ebe ke ndibet man ẹsobo ye mmọ ke usen ẹkenịmde. Mbiowo ẹkpenyene ndinyene ke ekikere nte ke se Mme Kọmiti Ubọpufọk eke Ikpehe ke Ikpehe ẹtorode ẹkọn̄ọ ke mme ndausụn̄ oro ẹnọde mmọ. Ntre mmọ ẹkpenyene ndinen̄ede ntịn̄ enyịn ke se kọmiti emi otorode ọnọ mmọ.

⁵ Ndusụk esop ẹma ẹbiere ndibọp Ufọkmbono Obio Ubọn̄ mmọ ye unana edisobo ye Kọmiti Ubọpufọk eke Ikpehe ke Ikpehe n̄kukụre koro ẹkerede ẹte ke se kọmiti ẹtorode ayabuana ekese ubiatokụk. Mbon en̄wen ẹma ẹdep isọn̄ ye unana edidọhọ Kọmiti Ubọpufọk eke Ikpehe ke Ikpehe edi edise ndien oro ada ekesịm edidep isọn̄ ke okpụk okpụk ebiet m̀mê edidep isọn̄ oro ekpride akaha. Mme esop nte owụtde ifiọk ẹkeme ndinyene ufọn nto se mbiowo oro ẹmekde ndinam utom ke Kọmiti Ubọpufọk eke Ikpehe ke Ikpehe ẹtịn̄de ebe ke ndisobo ye mmọ ke ntọn̄ọ, anyan ini mbemiso ẹdepde isọn̄ ekededi.—N̄ke 15:22.

⁶ Mbon En̄wen ke Ẹse: Apostle Paul ọkọdọhọ ete: “Nnyịn ikabade idi n̄kpọ ndise inọ ererimbot ye mme angel ye owo.” (1 Cor. 4:9) Mme Christian mfịn ẹdu ke idaha ẹkemede ndikụt, emi onyụn̄ enen̄ede edi ntre ke ini edibọp Ufọkmbono Obio Ubọn̄. Utom emi ẹnamde ye idara idara edu mme anamutom idịghe se owo mîkwe. Nte utịp, mme andida nse ẹmetịn̄ ekikere mmọ ke nsio nsio usụn̄. Ke Ozubulu, Anambra State, ke ama okokụt nsio nsio owo ẹnamde utom ke itie ubọpufọk, n̄wan emi anyamde akara ke mbọhọ oro ama obụp ebiet emi mme anamutom oro ẹketode ẹdi. Ẹma ẹsian enye ẹte ke mmọ ẹto nsio nsio obio ke stet oro. Edidianakiet oro odude ke otu Mme Ntiense oro ama otụk enye ndien enye ama ọdọhọ ete: “Ebede ke se n̄kụtde, obufa ererimbot oro mbufo ẹkwọrọde enen̄ede edi ata idem n̄kpọ.”

⁷ Ke adan̄aemi nditọete ẹkenamde utom usen kiet ke Ufọkmbono Obio Ubọn̄ kiet, owo kiet emi akasan̄ade ebe ama asan̄a ekpere onyụn̄ ọdọhọ ete: ‘Okposụkedi ami mmendịghe Ntiense, ami mmenyene udọn̄ ke utom mbufo. Mmabiat okụk odude ye ami mma edi mbọk ẹdi ufọk mi ke Saturday ẹnyụn̄ ẹdibọ etịbe edide ₦5,000 ke ndinọ ibetedem ke utom oro.’ Enye ama ọnọ etịbe oro nte ọkọn̄wọn̄ọde. Kpa ke utom oro ebeakpa kiet ama edi ndien ke ama eketịn̄ inemesịt esie ọnọ ₦20. Kọmiti Ubọpufọk eke Ikpehe ke Ikpehe kiet ama etịn̄ idatesịt mmọ ke nditiene ndutịm utom mmọ kpa ye idiọk idaha eyo. Mmọ ẹkebụk ẹte: ‘Ke adan̄aemi utom ubọpn̄kpọ akakade iso, owo kiet ama ọdọhọ ete sia nnyịn isan̄ade ikpere ukwọ edịm nnyịn ikpenyene ndisịk utom emi nnịm tutu ndaeyo ọtọn̄ọ. Nte ededi, nnyịn ima ika iso ke utom oro. Ke inemesịt, ke ofụri usen oro ẹkediomide utom ke itieutom oro, edịm ikedepke. Ikebịghike mbio obio ẹma ẹtọn̄ọ ndidọhọ ẹte: “Edieke owo ekededi enyenede edinam ndinịm, nịm enye ke usen oro Mme Ntiense Jehovah ẹdinamde utom ke ufọkmbono mmọ, sia edịm mîdidepke.”’

⁸ Esop kiet ke Calabar ama okụt ke oyom ibọp Ufọkmbono Obio Ubọn̄ enen̄ede okpon. Enyene isọn̄ oro mmọ ẹkekụtde ama enyịme ndinyam isọn̄ oro ke ₦280,000. Mbemiso nditoete ẹkekemede ndinyene okụk oro, anam mbubehe kiet ama edi onyụn̄ edinọ ₦300,000 ke isọn̄ oro. Edi enyene isọn̄ oro ama ọkọk ibuot ye n̄wan esie ete: “Ọfọn nnyịn ndikpu owo akan ndikpu Abasi.” Enye ama esịn ndibọ akamba okụk ndien ekem osụhọrede ibatokụk oro oto ₦280,000 ekesịm ₦180,000 ọnọ esop oro. Enye ọkọdọhọ ete: “Yak ₦100,000 oro edi etịbe oro nnọde kaban̄a ubọpn̄kpọ oro.”

⁹ Un̄wam Ima Ima Mme Anamutom Unyịmesịt: Ediwak mme anamutom oro ẹdotde ẹsịn ini ye usọ mmọ man ẹn̄wam ke edidep isọn̄, ediwet mbuwed ufọk, edibọp n̄kpọ ye edidiọn̄ ukwakutom, edibana n̄kpọ, edidiọn̄ isọn̄, editọn̄ọ itieutom, edidep n̄kpọ, ndutịm udia, ukpeme, ye ntre ntre eken. Nditọete ẹsinọ mme n̄kpọutom mmọ ẹda ẹnam n̄kpọ ke mme utom ẹmi. Anaedi emi anam Ete nnyịn, Jehovah, okop inemesịt didie ntem, ke ini enye okụtde mmọ ẹdade mme inyene mmọ ye mme ukeme mmọ ẹnam n̄kpọ ke utọ ima ima usụn̄ oro!—Men 1 Thessalonica 2:6-9; 2 Thessalonica 3:8b domo.

¹⁰ Ye edikọri oro mme esop ẹkade iso ndikọri, udọn̄ odu kaban̄a mme Ufọkmbono Obio Ubọn̄ efen efen. Ẹyom okụk ye mme anamutom efen efen man ẹsịm se ẹyomde emi. Ke isua utom emi ekebede, ibat esop ke Nigeria ama ada 203 awak akan nte ekedide, ndien ẹyom mme Ufọkmbono Obio Ubọn̄ efen efen man ekem mbufa esop ẹmi.

¹¹ Ke adan̄aemi ediwak nditọete iren ye iban ẹkade iso ndin̄wam ke edibọp Ufọkmbono Obio Ubọn̄, ẹnọde ini ye ukeme mmọ unyịme unyịme, ikot odu kaban̄a un̄wam efen efen kpa nte udọn̄ odude kaban̄a mme anamutom efen efen ke in̄wan̄ ukpen̄e. (Matt. 9:37, 38) Ata ediwak kọmiti eke ikpehe eke ikpehe ẹtọt ẹte ke ndinyene mme anamutom unyịmesịt efen efen ke mme utom Ufọkmbono Obio Ubọn̄ ayanam mbiomo mbon ẹmi ẹma ẹkebobiom mbiomo emi efere.—Isa. 6:8; Gal. 6:2.

¹² Mbon Oro Ẹdotde: Ini ekededi emi ẹtọn̄ọde utom edibọp Ufọkmbono Obio Ubọn̄, mme anamutom unyịmesịt ẹtode (mme) esop oro ẹdidade obufa m̀mê ufọkmbono oro ẹfiakde ẹdiọn̄ inam n̄kpọ ye mme esop oro ẹdude ẹkpere ẹdinọ mbonutom oro mînyeneke usọ. Ndusụk mmọ ẹmi ẹsibọ ukpep ndien ekem ẹdot nte mme enyene-mbufiọk m̀mê idem mme anamutom ẹmi ẹnyenede usọ man mmọ ẹkeme ndiyak mme Kingdom Hall Construction Worker Questionnaire nnọ.

¹³ Mbon ẹmi Mme Kọmiti Ubọpufọk eke Ikpehe ke Ikpehe ẹsinen̄ede ẹyom kwa ọfiọn̄ ẹdi mbon oro ẹnyenede mbufiọk ke mme ubọkọkọ ubọpn̄kpọ ẹmi ẹnyụn̄ ẹnọde idem unyịme unyịme ndin̄wam ke edibọp Ufọkmbono Obio Ubọn̄ oro ẹyomde. Ana mmọ ẹmi ẹdu ke eti idaha ke esop ẹnyụn̄ ẹdi se otu mbiowo n̄kann̄kụk ọnọde unyịme. Edieke afo odude ke iduọk emi, ndi afo emekeme ndidiomi mbubehe fo man an̄wam ke ikpehe utom Jehovah enye emi? (Neh. 4:6) Ke edide ntre, bọ Kingdom Hall Construction Worker Questionnaire kiet to esenyịn oro etiede ibuot m̀mê ewetn̄wed ke esop mbufo nyụn̄ yak enye nnọ ye unana ubiat ini.

¹⁴ Adianade do, odu nditọete ẹmi ẹkọride ẹsịm ọyọhọ idaha ẹmi ẹnamde utom nte mbiowo ye mme asan̄autom unamutom ẹnyụn̄ ẹnyenede ukeme edise enyịn. Okposụkedi ifiọk ubọpn̄kpọ oro mmọ ẹnyenede ekemede ndidi esisịt, mmọ ẹmi n̄ko ẹkeme ndiyak mme babru mbụme nnọ. Ediwak ke iduọk emi ẹn̄wam ke mme itieutom oro mîdịghe eke ubọpn̄kpọ. Ẹnọ mbon en̄wen ukpep man otodo ẹkeme ndida mmọ nnam n̄kpọ ntatara ntatara ke ini iso. Ẹsịn udọn̄ ẹnọ mbiowo ye mme asan̄autom unamutom ndinen̄ede n̄kere mban̄a m̀mê mmọ ẹkeme ndinọ idem mmọ kaban̄a utom emi adade itoro ọsọk Ete nnyịn, kpa Jehovah.—Men 1 Samuel 3:8; Matthew 4:20 domo.

¹⁵ Kpukpru Owo Ẹkeme Ndinyene Udeme: Kpukpru owo ẹkeme ndiwụt eti edu kaban̄a akpan utom emi ebe ke ndinam n̄kpọ mban̄a ebiet emi oyomde un̄wam ke esop ke ini ndusụk owo ẹnamde utom Ufọkmbono Obio Ubọn̄ ke utịturua. Ke akpanikọ idụhe owo nnyịn ndomokiet emi ediyomde ndinam idem emem mme anamutom unyịmesịt ẹmi ke usụn̄ ekededi ebe ke ndidọhọ ke mme utom ima mmọ ke ndibọp Ufọkmbono Obio Ubọn̄ idịghe edisana utom. (N̄ke 24:10; Heb. 6:10) Nte ededi, oyom edida ukem ukem, ndien ntak edi oro Mme Kọmiti Ubọpufọk eke Ikpehe ke Ikpehe ẹtịn̄de enyịn ke ndinam mme ndutịm man mme anamutom unyịmesịt ẹkûwọrọ ẹkpọn̄ esop mmọ nte mîdotke.

¹⁶ Idem ọkpọkọm mme idaha inyịmeke nnyịn inọ idem unyịme unyịme ke se iban̄ade ata ata utom ubọpn̄kpọ, odu akpan ikpehe kiet ke n̄kpọ emi oro kpukpru owo ẹkemede ndibuana. Nso idi oro? Ndikpono Jehovah ke “inyene” nnyịn. (N̄ke 3:9) Nnyịn imekeme ndinyene mbuọtidem nte ke Jehovah eyenen̄ede okop inemesịt ke ini nnyịn inọde ima ima un̄wam okụk kaban̄a edibọp Ufọkmbono Obio Ubọn̄ efen efen. Ẹnen̄ede ẹdara se ẹtịpde ke Okụk Ufọkmbono Obio Ubọn̄ N̄ka, ndien nte ẹsiakde mbufa esop, udọn̄ aka iso odu kaban̄a mbufa ufọkmbono ye mbon oro ẹfiakde ẹdiọn̄. (Utom 20:35; 2 Cor. 9:6, 7) Ke akpa isua ikie, ke ini udọn̄ ekedemerede, apostle Paul ama esịn udọn̄ ọnọ mbon Corinth ete: “Edi nte mbufo ẹdade iso ke kpukpru n̄kpọ, ke mbuọtidem, ke editịn̄ ikọ, ye ifiọk, ye kpukpru ufiopesịt, ye ima eke mbufo ẹmade nnyịn, ẹda iso n̄ko ke utom mfọn emi.”—2 Cor. 8:7.

¹⁷ Mme Akakan Ufọn: Ke akpanikọ, Jehovah ke an̄wam nnyịn ndibọp ediwak ufọk utuakibuot kaban̄a itoro esie. Ima n̄waidem ke onụk nditọete iren ye iban. Emi edi nnennen orụk ima oro Jesus ọkọdọhọde nte ẹdidade ẹdiọn̄ọ ata mme anditiene enye in̄wan̄în̄wan̄. (John 13:34, 35) Kpa nte Jesus akanamde mme udọn̄ mbon en̄wen ẹbem eke esie iso, ntre ke mmọ ẹnam. Enen̄ede ekeme ndidi nte ke ẹyeda unyịmesịt ye usọ mme asan̄autom Jehovah ẹmi ẹkade-ka iso ndikọri ẹnam n̄kpọ kaban̄a ufọn oro akam okponde akan ke obufa ererimbot Abasi.

¹⁸ Ih, mbon oro ẹbuanade ke ndibọp mme ufọk utuakibuot Jehovah ẹkụt Psalm 127:1 nte edide akpanikọ. Okposụkedi mme anamutom ẹmi ẹnyenede usọ ẹnọde ini ye ukeme mmọ kaban̄a usọp usọp edibọp ndiye Ufọkmbono Obio Ubọn̄, edi edidiọn̄ Jehovah ọnọ ubiọn̄ edikụt unen. Mfịn, ẹkam ẹyom Mme Ufọkmbono Obio Ubọn̄ efen efen. Toto nte ẹketọn̄ọ enye, Okụk Ufọkmbono Obio Ubọn̄ N̄ka aman̄wam ediwak esop ke mme utom Ufọkmbono Obio Ubọn̄ mmọ. Kpukpru nnyịn ikpakam ika iso ndinọ ini ye “inyene” nnyịn ifụre ifụre nte nnyịn iberide edem ke Jehovah ndidiọn̄ mme ukeme nnyịn.—N̄ke 3:9.