N̄kaiso Editat Anam Udọn̄ Kaban̄a Mme Ufọkmbono Obio Ubọn̄ Ọkọri
1 Anyanini ko ke edem prọfet Jehovah ama ebem iso etịn̄ ete ke “se mme idụt ẹyomde ẹyedi.” (Hag. 2:7) Nnyịn idahaemi ke ikụt akwa udịm owo ẹkpepde akpanikọ ẹnyụn̄ ẹkabarede ẹdi mme andituak ibuot nnọ Jehovah. Ekedi n̄kpọ nduaidem didie ntem ndikụt owo 11,624 ẹnade baptism ke udịm udịm ikpọ mbono eke 1996 ke Nigeria kpọt! Man ika iso in̄wam mbufa owo ẹmi, oyom nnyịn ‘itịm ikere usụn̄ nnyịn’ man ikụt ite ke nnyịn ke inọ utom Abasi ibetedem ke ata ọyọhọ udomo nte ikekeme. (Hag. 1:5) Akpan usụn̄ emi nnyịn ikemede ndinam emi edi ke ndin̄wam ndinam nti ufọk utuakibuot ẹdu ẹnọ ikpọ otu mbufa anditoro Jehovah.
2 Okụk Ufọkmbono Obio Ubọn̄ N̄ka odu ke edinam ke isua itiaba idahaemi omonyụn̄ anam esop 105 ẹkeme ndinyene mbufa m̀mê mme Ufọkmbono Obio Ubọn̄ oro ẹfiakde ẹdiọn̄. Ke akpanikọ, edi n̄kpọ idatesịt ke nte mme asuanetop ẹnamde n̄kpọ ke ndinọ okụk emi ibetedem. Ke ẹfiak ẹkpe okụk oro ẹkenọde mme esop man otodo ẹka iso ndida ofụri okụk oro ẹtịpde nnam n̄kpọ, ke isua ke isua, ndibọp mbufa Ufọkmbono Obio Ubọn̄.
3 Un̄wam Emi Mme Kọmiti Ubọpufọk eke Ikpehe ke Ikpehe Ẹnọde: Kọmiti Ubọpufọk eke Ikpehe ke Ikpehe 25 ke Nigeria ẹn̄wam mbiowo ẹmi ẹbuanade ke utom edibọp Ufọkmbono Obio Ubọn̄. Mmọ ẹsin̄wam ndidụn̄ọde mfiọk udọn̄ kaban̄a edinyene obufa Ufọkmbono Obio Ubọn̄ m̀mê edifiak ndiọn̄ ufọkmbono oro odude ẹnyụn̄ ẹnọ un̄wam efen efen nte ẹyomde ọtọn̄ọde ke ini oro ẹyomde ndidep isọn̄ tutu ẹkụre Ufọkmbono Obio Ubọn̄. Ẹbahade esop kiet kiet ẹsịn ke kiet ke otu mme kọmiti ẹmi.
4 Ediwak tọsịn mme anamutom unyịmesịt ẹmenyịme ndibuana ke utom edifiak ndiọn̄ Mme Ufọkmbono Obio Ubọn̄ ye edibọp mbufa. Mme anamutom unyịmesịt ẹmi, esịnede ediwak nta ye mbonusọ, ẹnọ ini ye ukeme mmọ unyịme unyịme ke mme utọ n̄kpọ nte edidep isọn̄, edinam ndutịm mban̄a edibọp, ye edisiak n̄kpọutom oro ẹdidepde. Mmọ ẹsin̄wam n̄ko ke ndidep nti uduot n̄kpọutom ke ekọmurua oro ọfọnde, ẹkụrede mme akpa utom ke itie ubọpufọk, ẹnyụn̄ ẹse enyịn ẹban̄a ataata edibọp n̄kpọ. Utọ ediyak oro ẹyakde mme inyene mmọ ẹnọ ke ntatubọk kaban̄a mme ufọn n̄kpọ Obio Ubọn̄ do enen̄ede odot itoro onyụn̄ ada akpakịp edidiọn̄ otode Jehovah edi.—N̄ke 11:25.
5 Mbiowo ẹkpenyene ndisobo ye Kọmiti Ubọpufọk eke Ikpehe ke Ikpehe n̄kann̄kụk mmọ ke akpa ini esop mmọ ekerede aban̄a ndidiọn̄ Ufọkmbono Obio Ubọn̄ oro odude m̀mê ndibọp obufa. Ntak-a? Mme Kọmiti Ubọpufọk eke Ikpehe ke Ikpehe ẹnyene ndausụn̄ oro ẹkemede ndin̄wam mme esop ke ini ẹtọn̄ọde-tọn̄ọ ndikọk ibuot. Ndimek itie ubọpufọk abuana ediwak n̄kpọ ke adianade ye ekọmurua udep isọn̄. Mme n̄kpọ en̄wen ẹkeme ndinen̄ede nnam ekọmurua isọn̄ oro ọdọk, utọ nte ọkpọsọn̄ utom oro ẹnamde ke itie ubọpufọk, edision̄o mme n̄kpọ oro ẹkamade n̄kpọndịk m̀mê n̄kpa, m̀mê mfịna eke n̄kan̄ ibet. Edieke esop oyomde un̄wam okụk oto N̄ka, mme kọmiti eke ikpehe ke ikpehe ẹnyene mme babru Kingdom Hall Loan Survey ẹnyun̄ ẹkeme ndin̄wam mbiowo esop ndiwet n̄kpọ nyọhọ mmọemi.
6 N̄ka ọmọnọ Mme Kọmiti Ubọpufọk eke Ikpehe ke Ikpehe mme n̄wed ẹnọde ekikere kaban̄a mbuwed Mme Ufọkmbono Obio Ubọn̄ nte etiede ke isọn̄. Mbemiso ẹmekde mbuwed ekededi, mbiowo esop ẹkpenyene ndisobo ye kọmiti eke ikpehe ke ikpehe ẹnyụn̄ ẹneme ofụri ofụri nte ufọk oro editiede, ẹkamade mme mbuwed oro N̄ka ọnọde nte ndausụn̄. Emi idisụhọkede ekọmurua edibọp kpọt, edi n̄ko ayan̄wam esop ndimek ukeuke ufọk oro enyenede ufọn oro edinyụn̄ odotde ye usụn̄ ubọpufọk usọp usọp.
7 Ẹnyene ndinịm nnennen ye ọyọhọ n̄wetnnịm n̄kpọ ẹban̄ade okụk. Nditọete ẹnyenede ifiọk ẹmenọ idemmọ unyịme unyịme ndinam utom ye mme kọmiti eke ikpehe ke ikpehe man ẹn̄wam mme esop nditọn̄ọ ndutịm ibatokụk oro ẹyomde ẹnyụn̄ ẹnam enye asan̄a ọfọn. Emi an̄wam akamba akamba, sia mbiowo n̄kann̄kụk mîsiwakke ndinam utom ye utọ n̄wetnnịm n̄kpọ okụk Ufọkmbono Obio Ubọn̄ oro kpukpru ini nte nditọete ẹmi ẹnyenede mbufiọk ẹnyụn̄ ẹtịmde ẹbọ ukpep ẹsinamde. Ke ini utom oro okụrede, kọmiti eke ikpehe ke ikpehe ekpenyene ndibọ kiet ke otu n̄wetnnịm n̄kpọ ibatokụk utom oro.
8 Ke mme idụt efen, nditọete ẹmesio usụn̄ edibọp n̄kpọ usọp usọp ẹdi man ẹbọp obufa Ufọkmbono Obio Ubọn̄ ẹkụre ke usen ifan̄ kpọt. Nso kaban̄a Nigeria? Ana in̄wan̄în̄wan̄ nte ke edibọp Ufọkmbono Obio Ubọn̄ ọnyọni akan mme udọn̄ esop ẹmi ẹkade-ka iso ndikọri ke ibat ke Nigeria. Ẹwak ndise utom edibọp Ufọkmbono Obio Ubọn̄ nte utom emi mînyeneke utịt. Ke ufọt ufọt 1996, N̄ka ama ọtọn̄ọ mme ndutịm editọn̄ọ usụn̄ edibọp n̄kpọ usọp usọp. Ke akpa, ediwak owo ẹma ẹnyene eyịghe ke ẹkeme ndinam ke n̄kann̄kụk sia mme n̄kpọ ubọpufọk mîdịghe ukem ye se ẹnyenede ke obio mbakara. Nte ededi, ye ọyọhọ ibetedem ke Jehovah, utom oro ama aka iso. Akpa Ufọkmbono Obio Ubọn̄ emi ẹkebọpde ke usụn̄ emi ke Nigeria ama ọwọrọ ada ke obio-in̄wan̄ Ewossa, oyomde usụn̄ ke kilomita 51 ọkpọn̄ Bethel Igieduma. Ufọkmbono Obio Ubọn̄ oro enyene ufan̄ ndidụk n̄kpọitie 150.
9 Akasan̄a didie? Ẹma ẹda nditọete oro ẹnyenede mbufiọk ndinam ndutịm, ndinọ mme ekọmurua n̄kpọ, nnyụn̄ ndep mme n̄kpọutom oro ẹkeyomde. Ẹketịm mbonutom ẹtiene mme ubọkutom mmọ. Ẹma ẹsian esop ẹban̄a mme n̄kpọ oro ẹyomde ye mme utom eken ẹkeyomde ẹnam ndutịm ẹban̄a mbemiso ata usen ubọpn̄kpọ. Mme utọ akpa utom oro ẹkeda ọfiọn̄ itiokiet. Ataata edibọp n̄kpọ usọp usọp akada usen 15. Ẹkeda mme n̄kpọ ubọpn̄kpọ n̄kann̄kụk, esịnede kọrikọri oro ẹfọpde-fọp, ndom mbakara ndida nyet ke mme ibibene esịtufọk, tian ọkọm, ye mme eto ọkọm.
10 Ke ufan̄ usen ita, ẹma ẹbọp ofụri ibibene Ufọkmbono Obio Ubọn̄ ye eke ufọk ukaikọt ẹkụre. Ke usen ita efen ẹma ẹyọn̄ọ ibibene esịtufọk mbiba ẹmi ẹkụre. Edikọn̄ tian akada usen kiet kpọt. Ẹma ẹkụre edikọn̄ dek, edisịn ikan̄ ilektrik, edidiọn̄ isọn̄, ediyet ndom mbakara, edidọn̄ mme usụn̄ ye window, ye edibon mme n̄kpọitie ke utịt ọyọhọ usen 15. Ẹma ẹyak Ufọkmbono Obio Ubọn̄ oro ẹnọ ke January 25, 1997.
11 Otụk Mme Andida Nse: Uyarade edinam edisana spirit Jehovah ke idem nditọete oro ẹnamde utom ke Ufọkmbono Obio Ubọn̄ esinam n̄kpọ nte ikọ ntiense ọnọ mbon en̄wen. Ke Ewossa, akparawa kiet emi ekedide obio oro ama okụt nte nditọete ẹkenamde utom editịm idem mben̄e edem usen. Ke ini enye akafiakde edi urua eketienede, iman esie ẹma ẹdọhọ ẹte: “Mbon Jehovah ẹbọp ufọk mmọ ẹkụre.” Ke ini enye akakade ndise iman esie kiet, enye akasan̄a efak oro Ufọkmbono Obio Ubọn̄ odude. Enye ama odop ada onyụn̄ ọdọhọ ete: “Mmenen̄ede mma edidianakiet emi odude ke otu mbon Jehovah ẹmi. Ubaha ekpedide mma n̄keme nditiene mmọ nnam utom emi.”
12 Onojie (ọbọn̄ obio) obio oro ọkọdọhọ ete: “Emi edi uku obio nnyịn. Mmama se mbufo ẹdade edidianakiet mbufo ẹnam. Ẹka iso ẹnam. Ami idahaemi nyesisian mme andima nti n̄kpọ nte ẹka ẹkese se Mme Ntiense Jehovah ẹnamde.”
13 N̄kpri ye ikpọ ẹma ẹnyene udeme ke utom oro. Iman ẹmi ẹkebiọn̄ọde ẹma ẹdọhọ eren kiet emi edide isua 70 emi okodude ke ofụri ini utom oro ẹte etre ndidi itie utom oro. “Edieke afo mûtreke mbuka ọyọwọrọ fi,” ntre ke mmọ ẹkedọhọ. Eren oro ọkọbọrọ ete: “N̄kọtọn̄ọ ndika mme mbonoesop mmọ, mbuka ndomokiet iwọrọke mi. Se nnyịn inamde idahaemi anam mi n̄kop inemesịt n̄ko idem okposụkedi mmen̄kemeke ndinam ekese.” Ke ini mme iman ẹkekade itieutom oro ke idemmọ ẹnyụn̄ ẹkekụt ke ẹma ẹkpere ndibọp ufọk oro mma, mmọ ẹma ẹtre ndifịna enye.
14 Edi udọn̄ nnyịn nte ẹnam usụn̄ ubọpufọk emi ẹwụt ke kpukpru ikpehe ke idụt emi. Ẹkeda utom Ewossa ẹnọ Mme Kọmiti Ubọpufọk eke Ikpehe ke Ikpehe ita ye mme enyene-usọ mbonutom mmọ ukpep. Ẹtịm mmọ idem idahaemi ndinam ukem utom oro ye unana edibuan N̄ka nte mîdotke. Ye eti ndutịm ẹyenam utọ ukpep oro atara esịm kpukpru owo oro ẹnọde idem unyịme unyịme. Mme esop oro ẹkerede ndibọp m̀mê ndifiak ndiọn̄ Ufọkmbono Obio Ubọn̄ mmọ ke ini iso ndien ẹmi ẹyomde ndida usụn̄ ubọpufọk enyeemi ẹkeme nditọt Kọmiti Ubọpufọk eke Ikpehe ke Ikpehe n̄kann̄kụk mmọ. Ẹmenọ mmọ ntọt aban̄ade se ẹyomde. Ẹkpenyene n̄ko ndinọ eben̄e oro ẹwetde-wet ẹsọk N̄ka edieke mbufo ẹyomde ndida usụn̄ edibọp n̄kpọ usọp usọp, sia owo mîdaha usụn̄ edibọp n̄kpọ usọp usọp ibọp kpukpru Ufọkmbono Obio Ubọn̄.
15 Ẹyom Mme Anamutom Unyịmesịt Efen Efen: Mme kọmiti eke ikpehe ke ikpehe ẹtọt ẹte ke ẹyom ediwak mme anamutom unyịmesịt efen efen. Emi edi utom oro ẹyomde emi an̄wamde mme udọn̄ n̄kpọ Obio Ubọn̄. (1 Cor. 15:58) Ẹyom mme enyene-usọ mbonutom, kpa nte ẹyomde nditọete eken ẹmi ẹkọride ẹsịm ọyọhọ idaha ẹmi ẹsịmde mme n̄kpọ ẹmi ẹnamde owo odot ke n̄kan̄ eke spirit, idem edieke mînyeneke usọ ke mme utom ubọpufọk. Edieke afo odotde, nte emekeme ndinam mme ukpụhọde man odu ke idaha ndinọ idem unyịme unyịme? (Isa. 6:8) Ke uwụtn̄kpọ, ndusụk mbiowo m̀mê mme asan̄autom unamutom ẹkeme ndin̄wam ke edibọp Ufọkmbono Obio Ubọn̄ ke utịturua kiet m̀mê iba kpukpru ọfiọn̄. Mmọ ẹkeme ndibọ ukpep ke nsio nsio afan̄, idem ke mme utom ẹmi mîdịghe eke ubọpn̄kpọ. Emi ayan̄wam nditọete ẹnamde utom ọkpọsọn̄ ndise enyịn ke mme utom ẹmi.
16 Mme Kọmiti Ubọpufọk eke Ikpehe ke Ikpehe ye mme kọmiti ubọpufọk n̄kann̄kụk ẹnam ndutịm ẹnọ mme anamutom unyịmesịt man mmọ ẹdu ke itie ubọpufọk n̄kukụre ke ini oro ẹyomde un̄wam mmọ. Mme anamutom unyịmesịt ẹmi ẹsifiak ẹnyọn̄ ẹbịne esop oro mmọ ẹtode ye mme ubon mmọ usọp usọp nte ẹkekeme inyụn̄ itabake edibuana ke mme mbonoesop ye mme utom an̄wautom nte mîdotke. Mbon oro ẹdude ke itie ubọpn̄kpọ ẹdi (1) mme anamutom unyịmesịt ẹmi mme etubom itieutom ẹnọde unyịme san̄asan̄a ẹte ẹdu ye (2) mbon oro ẹtode mme esop ẹdude ke n̄kann̄kụk oro ẹbọpde ufọkmbono ẹmi ẹdide mme anamutom oro mînyeneke usọ. Ẹsịn udọn̄ ẹnọ mbon eken ndinọ ibetedem ke utom an̄wautom ye mme mbonoesop ke mme esop mmọ.
17 Ih, mbon ẹmi ẹbuanade ke edibọp mme ufọk nnọ utuakibuot Jehovah ẹkụt Psalm 127:1 nte edide akpanikọ. Okposụkedi mbonutom ẹmi ẹnyenede usọ ẹnọde ini ye ukeme mmọ ke ndibọp ndiye Ufọkmbono Obio Ubọn̄, edi edidiọn̄ Jehovah anam ẹkụt unen. Nnyịn isụk iyoyom mme Ufọkmbono Obio Ubọn̄ efen efen. Tọn̄ọ nte ẹketọn̄ọ enye, Okụk Ufọkmbono Obio Ubọn̄ N̄ka aman̄wam ediwak esop ẹmi ẹnyenede mme utom Ufọkmbono Obio Ubọn̄. Kpukpru nnyịn ikpakam ika iso ndinọ ini ye “inyene nnyịn” ke adan̄aemi idoride enyịn ke Jehovah ndidiọn̄ mme ukeme nnyịn.—N̄ke 3:9.
[Mme ndise ke page 4]
Obufa Ufọkmbono Obio Ubọn̄ ke Ewossa
Ọyọhọ usen 9 nte ẹketọn̄ọ ndibọp n̄kpọ
Ufọkmbono Obio Ubọn̄ ẹbọpde ẹkụre ke ọyọhọ usen 15