Ndisan̄a Ikpat Kiet ye N̄kọri Ukara Abasi

¹ Ke eyo Nehemiah, ama oyom ẹbọp mme n̄kpọ koro ibibene ukpeme Jerusalem ẹkedude ke n̄wụre. Nehemiah ama ọnọ ndausụn̄ oro ekenyenede iwụk, ndien mme owo ẹma ẹnam n̄kpọ ẹban̄a, ẹdọhọde ẹte, Yak nnyịn idaha ke enyọn̄ inyụn̄ idiọn̄.”—Neh. 2:18.

² Kpasụk ntre, mfịn, ikọt Jehovah ke ẹnam n̄kpọ ẹban̄a udọn̄ oro odude kaban̄a edibọp ye edifiak ndiọn̄ mme Ufọkmbono Obio Ubọn̄ ye mme Itie Mbono. Ediwak Ufọkmbono Obio Ubọn̄ ke mme itie ikie ẹnen̄ede ẹyom ẹfiak ẹdiọn̄, onyụn̄ oyom ẹbọp mbufa Ufọkmbono Obio Ubọn̄ ke mme itie ikie man ufan̄ odu ọnọ usọp usọp n̄kọri esop Jehovah. Nnyịn n̄ko imoyom mme ufọk oro ẹdotde ndinịm n̄kpri ye ikpọ mbono nnyịn. Kpa nte Nehemiah akanamde ndutịm ọnọ utom edifiak mbọp mme ibibene Jerusalem, ntre ke “asan̄autom emi anamde akpanikọ, onyụn̄ enyenede ọniọn̄” anam ndutịm ubọpn̄kpọ mfịn ebe ke nditọn̄ọ Okụk Ufọkmbono Obio Ubọn̄ N̄ka nnyụn̄ mmek Mme Kọmiti Ubọpufọk eke Ikpehe ke Ikpehe.​—Matt. 24:45.

³ Ndutịm Okụk Ufọkmbono Obio Ubọn̄ N̄ka enyene mme edidiọn̄ Jehovah. Ke isua ition ẹmi enye odude ke edinam ke Nigeria, enye an̄wam ẹbọp m̀mê ẹfiak ẹdiọn̄ Ufọkmbono Obio Ubọn̄ 95 ye mme Itie Mbono 14. Etịbe ntatubọk oro nditọete ẹnọde an̄wam N̄ka ndinọ mme esop ye mme Itie Mbono ẹmi udọn̄ ẹnen̄erede okpon okụk. Se ẹnamde emi ke ndinọ n̄kọri ukara Abasi ibetedem edi n̄kpo inemesịt.​—1 Thess. 4:9,10.

⁴ Mme Kọmiti Ubọpufọk eke Ikpehe ke Ikpehe n̄ko ẹnyene mme edidiọn̄ Jehovah. Mme kọmiti ẹmi ẹdu ke eti idaha ndin̄wam mbiowo n̄kann̄kụk ẹnam ndutịm ẹnọ Ufọkmbono Obio Ubọn̄ oro odotde onyụn̄ edide se ẹdade ẹnam n̄kpọ oro ẹdinyụn̄ ẹdade mme un̄wam oro ẹyakde ẹnọ ẹnam n̄kpọ ye eti ibuot. Ọkpọfọn mme otu mbiowo ẹtịn̄ enyịn ẹdụn̄ọde kpukpru n̄kpọ oro ẹbuanade, ẹbọde ufọn ọyọhọ ọyọhọ ẹto ekikere mme enyene-ifiọk mbiowo ẹmi ẹmekde ndinam utom ke Kọmiti Ubọpufọk eke Ikpehe ke Ikpehe.​—Luke 14:28-30.

⁵ Ekese Efen Efen Odu Ndinam: Ke adan̄aemi ẹma ẹkebọbọp ediwak Ufọkmbono Obio Ubọn̄ ẹkụre, ekese efen efen ke ẹsụk ẹdodu ndinam man ẹsan̄a ikpat kiet ye n̄kọri ukara Abasi. Ndusụk ke otu mme Ufọkmbono Obio Ubọn̄ ẹmi ẹbọpde obufa obufa mi ẹnyenyene esop ita m̀mê inan̄ ẹsopde idem ke mmọ. Emi ọwọrọ ete ke idibịgike ẹyeyom Ufọkmbono Obio Ubọn̄ efen man ufan̄ odu ọnọ n̄kọri emi adade itie ke mme ikpehe ẹmi. Ediwak esop eken ke ẹbet ke ime tutu okụk odu ndida nse mban̄a mme udọn̄ ẹdude idahaemi. Ẹnanam ndutịm ndinam mme Itie Mbono nnyịn ẹnen̄ede ẹfọn nnyụn̄ mbọp ndiye itie ẹtiede ẹkop ikọ utọ nte enyeoro odude ke Akure. Nte ededi, ke ntak unana okụk ẹnyene ndimụm utom ẹmi n̄kama kan̄a. Nte an̄wan̄ade oyom nnyịn ikaiso inọ Okụk Ufọkmbono Obio Ubọn̄ N̄ka ibetedem.

⁶ Ọtọn̄ọde ke July isua oko akpan akpan N̄ka enen̄ede anam akpan utom ke ndidiọn̄ mme Itie Mbono. N̄ka esinọ unyịme ndien, ke ediwak idaha, esinam mbuwed ke kpukpru n̄kpọ oro ẹbọpde. Nnyịn imesịn udọn̄ inọ mbufo ndibere ye mme ndutịm ẹmi ye mme Kọmiti Itie Mbono ẹmi ẹnyenede mbiomo editiene ndausụn̄ oro mmọ ẹbọde ke ofụri esịt. Ẹdu ke edidemede ẹnyụn̄ ẹnam n̄kpọ ẹban̄a ke ini mme Kọmiti Itie Mbono ẹdọhọde ẹnọ mme etịbe man ẹda ẹkpe ke mme utom oro ẹnọde unyịme.

⁷ Kpukpru nnyịn ikpenyene ndida nte ke imenyene mbiomo ke afan̄ emi. Idem ekpededi circuit mbufo ke ọdiọn̄ Itie Mbono ọnọ mme mbono circuit ye mme usen akpan mbono, nnyịn ikpenyeneke ndifụmi Itie Mbono oro ẹdade ẹnịm mme mbono district. Akpan akpan edieke nnyịn idụn̄de ikpere Itie Mbono, nnyịn imekeme ndikere mban̄a ibat okụk emi nnyịn inyenede ito unana edikpe usụn̄ ke ẹmende ẹdomo ye mbon oro ẹdụn̄de anyanusụn̄, inyụn̄ ida okụk emi ndidiọn̄ mme itie emi.

⁸ Ndinọ un̄wam okụk ekem ye N̄wed Abasi. Iko Hebrew oro ẹkabarede “etịbe” ọwọrọ “edisana udeme.” (Ex. 25:2, Reference Bible, ikọ idakisọn̄) Mme Christian nte enende ẹnyene udọn̄ nditịp ini, odudu, ye inyene obụkidem mmọ nsịn ke edinam ufọn n̄kpọ Obio Ubọn̄ akaiso. Nnyịn inamke Jehovah oforo ke mme etịbe oro itịpde kaban̄a utom esie, edi nnyịn ke usụn̄ emi iwụt ima oro nnyịn inyenede inọ enye, ndien enye esidiọn̄ mbon oro ẹtịpde n̄kpọ ke unyịmesịt.​—1 Chron. 29:14-17; N̄ke 3:9.

⁹ Paul ekewet ke 2 Corinth 8:12 ete: “Koro edieke edinyịme esịt odude, enem Abasi esịt ndibọ enọ nte asan̄ade ekekem ye se owo enyenede, idịghe nte ebede ukeme esie.” Ẹkeme ndisịn udọn̄ nnọ kpukpru owo ndisisio n̄kpọ nnịm kpukpru ini nte ekemde ye ukeme ye udọn̄ mmọ. (Men 1 Corinth 16:1-4 domo.) Tertullian ekewet aban̄a esop mme akpa Christian ete: “Ini kiet ke ọfiọn̄ kpukpru owo ẹsida ukeuke okụk ẹdi​—m̀mê ke ini ekededi oro enye amade, ndien n̄kukụre edieke enye amade, edieke enye onyụn̄ ekemede; koro owo inyịkke-nyịk owo ndomokiet; edi enọ imaesịt.” Ke mîbietke ediwak ido ukpono mfịn oro ẹkamade usan etịbe ẹkanade man ẹtan̄ mme etịbe, ẹnọ kpukpru enọ n̄kpọ obụkidem ke esop Christian ke imaesịt. (2 Cor. 9:7) Ke ini ẹkotde ikọ ekọm ke esop ẹban̄a mme etịbe oro ẹkenọde, ẹti kpukpru owo ẹban̄a ọkpọkpọ udeme oro mmọ ẹkemede ndinyene.

¹⁰ Ẹnen̄ede Ẹdara Mme Etịbe: Nnyịn ndikaiso nnọ Okụk Ufọkmbono Obio Ubọn̄ N̄ka ibetedem nte mme circuit, mme esop, ye owo kiet kiet ebe ke mme ekebe etịbe oro ẹdude ke itie Ukpepn̄kpọ N̄wedesop edi akpan n̄kpọ man isan̄a ikpat kiet ye n̄kọri ukara Abasi. Ẹnen̄ede ẹdara un̄wam oro afo ọnọde ndutịm emi ke ntatubọk ye ini ye usọ oro ediwak tọsịn owo oro ẹn̄wamde ke edibọp ye edifiak ndiọn̄ mme Ufọkmbono Obio Ubọn̄ ye mme Itie Mbono ẹsịnde unyịme unyịme. Edi, oyom imana isịn usọp man isịm udọn̄ oro odude kaban̄a mme Ufọkmbono Obio Ubọn̄ efen efen ye mme Itie Mbono oro ẹnen̄erede ẹfọn.

¹¹ Circuit iba oro ẹsidade Itie Mbono oro ke Akure ẹnam n̄kpọ ẹkewet ete: “Nnyịn iwet iban̄a obufa Itie Ẹtiede Ẹkop Iko ke Mbono mi ke Akure. Nnyịn iyom nditịn̄ ntotụn̄ọ esịtekọm oro inyenede iban̄a utọ akwa ufọk emi ẹbọpde mi nditoro akwa enyịn̄ Jehovah. Ke ẹmende ẹdomo ye akani oro okodude, emi ke akpanikọ ekedide ndedehe n̄kpọ enyịn ndikụt, ẹbat se ẹbọpde emi nte mfọnn̄kan ubọpn̄kpọ oro akanam ẹbọpde ke Nigeria. Ke akpanikọ, kpukpru asuanetop ẹwụt akwa idatesịt ẹban̄a uduot ubọpn̄kpọ ye usọp oro ẹdade ẹbọp enye. Ke mbono oro ekenyenede ke January 21, 1995, mbiowo ẹma ẹbiere ndinam ẹsọp ẹkpe n̄wọrọnda ebuọt oro ẹkebọde ke utom emi nte Jehovah ọdiọn̄de nnyịn. Nnyịn imadara nte ke ima inanam akan̄a iban̄a enye ndien ana nnyịn isio akan̄a nnyịn. (Eccl. 5:4).”

¹² Nnyịn imenyene n̄wetnnịm n̄kpọ aban̄ade se ẹkenamde ke eyo Nehemiah. Kpa ye ubiọn̄ọ okotode idụt mme asua, nditọ Israel ẹma ẹtiene uko uko ndausụn̄ Nehemiah, ndien ye edidiọn̄ Jehovah mmọ ẹma ẹkụre edibọp ibibene Jerusalem ke usen 52 kpọt. Nehemiah 4:6 ọdọhọ ete ke “esịt kpukpru owo [ama odu] ke utom.” Ntre mfịn, ke idak ndausụn̄ asan̄autom emi anamde akpanikọ onyụn̄ enyenede’ ọniọn̄, ke ẹnam ikpọ utom ubọpn̄kpọ mfịn, ndien esop Jehovah eke eyomfịn ke akaiso esịn ‘esịt ke utom.’ Nnyịn imadiana ye mbufo ndibọn̄ akam mban̄a akpakịp edidiọn̄ Jehovah nte nnyịn in̄wanade ndisan̄a ikpat kiet ye n̄kọri ukara Abasi.