Ekebe Mbụme
◼ Nso ntịn̄enyịn ke oyom inọ mme n̄kpọutom oro ikamade ke utom edinọ ikọ ntiense?
1 Okposụkedi enyenede nneme N̄wed Abasi oro odotde ke ekikere, asuanetop eti mbụk ekeme nditre nditịm idem ke ini edide edisịm n̄kpọutom oro enye akamade. Ke ini odude ke enyịnusụn̄, enye ekeme nditre ndinyene mme n̄wed ẹnọde ke ndondo emi, mîdịghe mme magazine, ndiye uduot n̄kpri n̄wed, ye mme tract ẹdude ke ekpat ukwọrọikọ esie ẹkeme ndin̄wụne m̀mê ndiwaha. Enye ekeme nditre ndikụt benetap m̀mê n̄wetnnịm n̄kpọ eke ufọk ke ufọk sia mîtịmke ekpat ukwọrọikọ esie ọfọn.
2 Edi akpan n̄kpọ ndinọ ọyọhọ ntịn̄enyịn ke n̄kpọutom fo mbemiso abuanade ke an̄wautom.
3 Nso n̄kpọ ke ẹkpedọn̄ ke ekpat ukwọrọikọ oro ẹtịmde mfọn mfọn? Bible edi akpan n̄kpọ. Dọn̄ n̄wetnnịm n̄kpọ eke ufọk ke ufọk. Kụt ete ke emenyene mme n̄wed ẹnọde ke ọfiọn̄ oro. Oyom enyene n̄ko mme nsiondi magazine eke ndondo emi ọkọrọ ye tract ye ndiye uduot n̄kpri n̄wed. Kama n̄wed Reasoning. Ndinyene Utom Obio Ubọn̄ Nnyịn eke ndondo emi eyen̄wam fi ndidụn̄ọde mme nneme oro ẹnọde ekikere ẹban̄a mbemiso awahade enyịnusụn̄. Ke ini anamde utom ke efakutom oro etiede nte ke eyekụt mme owo oro ẹsemde esen usem, ọkpọfọn akama ekpri n̄wed Good News for All Nations. Ndinyene kiet ke otu mme n̄wed nnyịn oro ẹtịmde ẹnọ mme uyen eyen̄wam fi odu ke mben̄eidem ndinyene nneme ye mme uyen.
4 Kpukpru n̄kpọ oro akamade ẹkpenyene ndidu ke eti idaha onyụn̄ otịm mmọ ọdọn̄ ke ekpat fo. Iyomke ekpat ke idemesie edi obufa, edi enye ekpenyene ndisana onyụn̄ odu ke eti idaha.
5 Ekpat ukwọrọikọ fo edi ubak n̄kpọutom oro afo akamade asuan eti mbụk. Nam enye odu ke eti idaha.