Mme Mfiakn̄ka Ẹmi Ẹkụtde Unen Ẹyom Eti Unọ Ukpep
1 Mme mfiakn̄ka ẹdi akpan ikpehe utom ukwọrọikọ nnyịn oro akamade idatesịt. Ntak emi akpanade nnyịn itịn̄ enyịn ndifiak n̄waha mbịne mbon oro ẹnyenede udọn̄? Ẹnam ẹfiọk ẹnyụn̄ ẹkpono enyịn̄ Jehovah ebe ke utom edinam mbet emi, ndien ẹn̄wam mbon oro ẹbakde Abasi ndikụt usụn̄ uwem. (2 Cor. 2:17–3:3) Ndifiọk nte ke edinam enyịn̄ Jehovah asana ye uwem mme owo abuana ekpenyene ndinụk nnyịn itịm idem mfọn mfọn mbemiso ifiakde ika.
2 Eti andikpep eyen̄wam eyen ukpepn̄kpọ ndibọp ndori ke itiat idakisọn̄ oro ẹma ẹkesesịn. Kpa nte andikpep ke ufọkn̄wed esinamde ifiọk oro eyen ufọkn̄wed enyenede ke usen ke usen ọkọri, nnyịn ikpenyene ndisifiak n̄ka ebiet oro ikanamde akpa ediwaha n̄kenyene n̄kaiso nneme ke ukem ibuotikọ oro. Emi edisụn̄ọ ke enyeneufọk ndikere n̄kpọ ke afan̄ oro n̄kaiso.
3 Ke ini afiakde aka ke ama okonịm ediye uduot ekpri n̄wed oro “Nte Abasi Enen̄ede Ekere Aban̄a Nnyịn?” afo emekeme ndikụt nte emi enyenede uforo:
◼ “Isan̄ oko n̄kedide mi, nnyịn ikeneme iban̄a ‘ukperedem ini’ oro ẹtịn̄de ẹban̄a ke Bible ye se oro ọwọrọde ọnọ nnyịn. Afo emekeme ndiyịk nte nnyịn isan̄ade ifiọk ke nnyịn idu ke ukperedem ini. (2 Tim. 3:1) Mme mbet Jesus ẹma ẹnyene udọn̄ ndinyene ibọrọ mbụme oro. [Kot Matthew 24:3.] Ke ibọrọ esie, Jesus ama etịn̄ aban̄a mme idaha oro nnyịn ikụtde ẹkande nnyịn ẹkụk mfịn. Ẹmi ẹsịne mfụhọ ye afai ke udomo oro akananam owo mîkwe.” Wụt mme ikpehe idiọn̄ọ oro ẹnemede ke ikpehe ekikere 3 ye 4 ke page 19. Edieke ẹnọde n̄kpan̄utọn̄, wụt mme ikpehe idiọn̄ọ efen ke ikpehe ekikere 5 osịm 8 ke page 20. Dọhọ ke iyefiak iwaha man ikpọbọrọ mme mbụme oro ẹbụpde ke ikpaedem ediye uduot ekpri n̄wed oro.
4 Ke ndifiak ntiene owo oro okowụtde udọn̄ ke ediye uduot ekpri n̄wed oro “Nso Idi Uduak Uwem—Didie ke Afo Ekeme Ndikụt Enye?” afo emekeme ndidọhọ:
◼ “Ke ọkọdọn̄ mi ndifiak ndinyene nneme ye afo mban̄a uduak emi nnyịn idude uwem. N̄kere ke nnyịn mbiba imenyịme ite ke Abasi okoyom nnyịn idu uwem ke ererimbot emi ke inemesịt ye idaha oro etiede emem emem utu ke ndutịme oro nnyịn isobode mfịn. Nte afo emekere ke enye eyesu un̄wọn̄ọ esie?” Bet ibọrọ. Kot Isaiah 55:11, ndien ekem neme mme ekikere oro ẹdude ke ikpehe ekikere 25 osịm 27 ke page 30. Sịn udọn̄ nọ edikpep Bible ke idemesie nte mfọnn̄kan usụn̄ ndinyene uduak oro odotde ke uwem.
5 Ke ndifiak mbịne owo oro okowụtde udọn̄ ke ediye uduot ekpri n̄wed oro “Dara Uwem ke Isọn̄ ke Nsinsi!” afo emekeme ndifiak nnọ enye onyụn̄ ọdọhọ:
◼ “Nnyịn ima ineme iban̄a ediye ererimbot oro ẹwụtde ke ikpaedem ediye uduot ekpri n̄wed emi. Nyom ndisian fi ntak emi mbuọtidem ke Jesus Christ edide akpan n̄kpọ ntre ọnọ mme owo oro ẹyomde ndidu uwem do.” Kụbọde ka ọyọhọ ndise 41, nyụn̄ kot Isaiah 9:6. Tịn̄ n̄kpọ ban̄a ọyọhọ ndise 62, nyụn̄ kot John 3:16, ọsọn̄ọde etịn̄ ufọn nsụkibuot. Nam an̄wan̄a nte ke Mme Ntiense Jehovah ke ẹn̄wam mme owo ndikpep nte ẹkpenyenede mbuọtidem ebe ke ndikpep Bible nnyụn̄ ndomo ndida item esie ndu uwem.
6 Ke okụrede mfiakn̄ka kiet kiet, dụn̄ọde enye se ye ekikere edinam enye otịm enyene uforo. Bụp idemfo: Ndi mma nnyene akpan n̄kpọ ke ekikere nditịn̄? Nte mma nnam ẹwụk ntịn̄enyịn ke Bible? Nte mma mbọp ndori ke itiat idakisọn̄ oro n̄kesịnde ke akpa ediwaha? Nte mma ntịm nneme mi man ada okosịm ukpepn̄kpọ Bible? Ndibọrọ ih, ọnọ nsọn̄ọ nte ke afo ke odomo ndidi eti andikpep owo Ikọ Abasi.