Nnyịn Imoyom Esop
1 Nditọ Korah ini kiet ẹma ẹwụt esịtekọm mmọ ẹban̄a esop Jehovah ke usụn̄ emi: “Usen kiet ke okụre fo ọmọfọn akan tọsịn [ke ebiet efen, NW].” (Ps. 84:10) Ye mmọ, ererimbot ikenyeneke n̄kpọ ndomokiet ndinọ oro ẹkpemende ẹdomo. Edieke afo enyenede ukem ekikere oro, afo ekpenyene ndinam esop edi akpan iwụk ebiet ke uwem fo.
2 Toto ke ini emi enye ọkọtọn̄ọde, esop Christian omowụt ete ke imọ imenyene edidiọn̄ Jehovah. (Utom 16:4, 5) Baba owo nnyịn kiet ikpenyeneke ndida esop didie didie m̀mê ndikere ke enye n̄kukụre edi ebiet ndinam kpukpru nnyịn isop idem ọtọkiet. Esop edi ebiet edibọ nsịnudọn̄ ye nsọn̄idem ọnọ Mme Ntiense Jehovah ke kpukpru obio. Enye anam otu oro ẹdianade ọtọkiet odu man otodo Jehovah ọnọ nnyịn ukpep onyụn̄ otịm nnyịn ọnọ utom Obio Ubọn̄.—Isa. 2:2.
3 Esop Christian edi akpan usụn̄ emi ẹdade ẹkpep nnyịn akpanikọ. (1 Tim. 3:15) Ana kpukpru mme anditiene Jesus “ẹdi kiet”—ẹdiana kiet ye Abasi, ye Christ, ye kiet eken n̄ko. (John 17:20, 21; men Isaiah 54:13 domo.) Ebiet ekededi oro nnyịn ikade ke ererimbot, nditọete nnyịn ẹnịm mme ukpepn̄kpọ ye mme edumbet Bible ke akpanikọ ẹnyụn̄ ẹdu uwem ẹkekem ye mmọ.
4 Ẹnọ nnyịn ukpep ẹnyụn̄ ẹtịm nnyịn idem man inam utom nnyịn eke edinam mme mbet. Ke ọfiọn̄ kiet kiet, Enyọn̄-Ukpeme, Awake!, ye Utom Obio Ubọn̄ Nnyịn ẹsinọ nti ntọt man ẹn̄wam nnyịn nditọn̄ọ nneme N̄wed Abasi. Ẹtịm mme mbonoesop man ẹwụt nnyịn nte ikpoyomde inyụn̄ inamde udọn̄ ọkọri. N̄kọri oro nnyịn ikụtde ke ofụri ererimbot owụt ete ke nnyịn imenyene ibetedem otode heaven ke utom emi.—Matt. 28:18-20.
5 Ebede ke esop, nnyịn imesibọ nsịnudọn̄ ke usen usen emi ‘edemerede nnyịn ọnọ ima ye nti utom.’ (Heb. 10:24, 25) Ẹsọn̄ọ nnyịn idem man iyọ mme idomo ye mbuọtidem. Mme ima ima esenyịn ẹsin̄wam nnyịn man iyọ mme mfịghe ye mme editịmede esịt. (Eccl. 4:9-12) Ẹsinọ nnyịn item oro iyomde ke ini idude ke itiendịk ediyo n̄kpọn̄ usụn̄. Ewe esop efen ọnọ utọ ima ima ukpeme oro?—1 Thess. 5:14.
6 Edi uduak Jehovah nte nnyịn isịk ikpere esop esie man imụm edidianakiet nnyịn ikama. (John 10:16) Usụn̄ kiet oro esop an̄wamde nnyịn man ikaiso inyene ebuana ye otu ofụn anam-akpanikọ edi ke ndidọn̄ mme esenyịn oro ẹsan̄ade-san̄a man ẹnọ nnyịn nsịnudọn̄. Nnyịn ndinyịme ima ima ndausụn̄ odụri nnyịn adian ọtọkiet ke usụn̄ oro an̄wamde nnyịn ndikaiso nsọn̄ idem ke n̄kan̄ eke spirit.
7 Esop edi akpan n̄kpọ ọnọ ubọhọ eke spirit nnyịn. Owo ikpekemeke ndinam n̄kpọ nnọ Jehovah ke usụn̄ oro Enye onyịmede ke ẹsiode esop efep. Ẹyak nnyịn, ndien, idiana kiet ye se Jehovah ọnọde. Akpakam nnyịn inam utom ke n̄kemuyo ye mme utịtmbuba esie inyụn̄ inen̄ede ida item emi nnyịn ibọde isịn ke edinam. Ke usụn̄ emi kpọt ke nnyịn ikeme ndiwụt nte esop edide akpan n̄kpọ ọnọ nnyịn.—Ps. 27:4.