Nọ Mme Magazine ke Kpukpru Idaha
1 Nnyịn imenyene eti ntak ndiwụt esịtekọm mban̄a Enyọn̄-Ukpeme ye Awake! Ewe mme magazine efen ke ẹma ntre ke ofụri ererimbot? Ọfiọn̄ emi idinọ mme magazine ke utom ukwọrọikọ nnyịn, ndien nso okopodudu ntọt ke mme nsiondi eke October ẹkama ntem! Nte ido edide, nnyịn isinịm n̄wakn̄kan ke otu mme magazine nnyịn ke utom eke ufọk ke ufọk; nte ededi, nnyịn iyeyom nditịm idem man inọ mmọ n̄ko ke kpukpru idaha oro ẹdotde.
2 Ke ini ọnọde “Enyọn̄-Ukpeme” eke October 1, afo emekeme ndidemede udọn̄ ke ibuotikọ oro “Ererimbot Oro Ekọn̄ Mîdụhe—Ini Ewe?” ke ndidọhọ:
◼ “Idem akpa ediwak owo aban̄a ntak etiede nte ke owo ikemeke ndinyene ererimbot oro ekọn̄ mîdụhe kpa ye kpukpru ukeme oro mme owo ẹsịnde. Nso ke afo ekere aban̄a se ẹtịn̄de ke page 5 ke Enyọn̄-Ukpeme eke October 1? [Kot akpa udịmikọ ke mme akpa ikpehe ekikere iba ẹdude ke idak ekpri ibuotikọ oro “Ido Ukpono—Akwa N̄kpọ Ubiọn̄ọ,” ndien bet ibọrọ.] Nte ededi, emi iwọrọke ite ke ekọn̄ ẹdidu kpukpru ini. Tịmfiọk se Abasi ọn̄wọn̄ọde mi ke Isaiah 9:6, 7.” Emekeme ndikot itien̄wed emi nto Bible fo m̀mê nte ẹkotde ẹsịn ke ibuotikọ Enyọn̄-Ukpeme emi. Nam an̄wan̄a ibio ibio nte ke Enyọn̄-Ukpeme atan̄a Obio Ubọn̄ Jehovah nte n̄kukụre idotenyịn kaban̄a emem emem ererimbot, nyụn̄ sịn udọn̄ nọ owo oro otobo Enyọn̄-Ukpeme ke isua kiet ke etịbe oro ẹsinọde.
3 Ke ini ọnọde “Awake!” eke October 22, afo emekeme ndidọhọ:
◼ “Nso ke afo ekere aban̄a mbụme oro odude ke ikpaedem magazine emi: ‘Why Is Life So Short?’ (Ntak Emi Uwem Omụhọde Ntem-e?) [Bet ibọrọ.] Udịm udịm ibuotikọ ẹmi ẹdụri ntịn̄enyịn ẹka se ntaifiọk eyomfịn ye mbon eken ẹnyenede nditịn̄ mban̄a usọn̄, ndien ekem enye owụk ntịn̄enyịn ke se Andibot nnyịn ọn̄wọn̄ọde kaban̄a idotenyịn nsinsi uwem.” Nọ editobo Awake! Edieke owo mîbọhọ, nọ Awake! ye Enyọn̄-Ukpeme ke etịbe ₦30.
4 Ke ini okụtde mme owo ẹmi ẹnyenede udọn̄ ke ido ukpono, ntak mûwụtke ibuotikọ kiet ke “Enyọn̄-Ukpeme” eke October 15? Nneme enyeemi ekeme ndidemede owo udọn̄:
◼ “N̄kpama ndikop ekikere fo ke mbụme emi: Nte ẹkeme ndima Abasi nnyụn̄ mbak enye ke ukem ini oro?” Bet ibọrọ, ndien ekem kot itien̄wed ẹdade ẹbọp ibuotikọ oro “Ntak Abakde Ata Abasi Idahaemi-e?” (Eccl. 12:13) Da kiet ke otu mme uwụtn̄kpọ oro ẹnọde ke page 199 ke n̄wed Reasoning, nyụn̄ nọ editobo. Edi edieke owo mîbọhọ, nọ magazine iba.
5 Ke ini anamde utom ke ufọk ke ufọk, kûbe ukpọn̄ n̄kpri ufọkurua ye mme itie mbubehe. Mbon oro ẹsiwahade n̄kpri ufọkurua ye mme itie mbubehe kpukpru ini ẹtịn̄ nte utom emi enemde onyụn̄ on̄wụmde mfri. Afo emekeme ndidomo mmemmem nneme nte enyeemi ke ini ọnọde “Awake!” eke October 8:
◼ “Nnyịn imọfiọk ite ke mme anam-mbubehe ẹsima ẹnam mmimọ ifiọk se ikade iso idahaemi ke n̄kann̄kụk mmọ. Mmonịm ke afo eyema ibuotikọ emi.” Ekem buana ibio ibio akpan n̄kpọ kiet ye enye ke ibuotikọ oro “One-Parent Families—How Successful Can They Be?” (Mme Ubon Ẹmi Ẹdide Ete m̀mê Eka Ikpọn̄ Ese Aban̄a—Mmọ Ẹkeme Ndikụt Unen Adan̄a Didie?) Ekem nọ magazine iba edieke owo mîbọhọ editobo.
6 Edieke owo emi afo osobode enen̄erede anana ini, afo emekeme ndiwụt mme magazine onyụn̄ ọdọhọ ete:
◼ “Mmọfiọk ke afo ukodorike enyịn ndinyene esenowo mfịn, ntre nyenam edi ibio ibio. N̄kpama ndinọ fi ifet okot akpan n̄kpọ.” Wụt ibuotikọ oro afo ekemekde, nyụn̄ nọ mme magazine.
7 Tịn̄ enyịn nịm n̄wetnnịm n̄kpọ eke ufọk ke ufọk, nyụn̄ fiak ka kpukpru ebiet oro okonịmde n̄wed. Edieke okụtde ata udọn̄ ke mfiakn̄ka, nọ editobo ke magazine kiet m̀mê ke mbiba. Ẹyak nnyịn itịm idem inyụn̄ idu ke edidemede ndinọ mme magazine nnyịn ke kpukpru idaha oro ẹdotde.