Mme Mfiakn̄ka Oro Ẹnyenede Uduak
1 Ke ini anamde mfiakn̄ka, afo ekpenyene ndidomo ndida itien̄wed Abasi oro editịpde esịn ke ifiọk emi owo oro ekenyenede aban̄a ibuotikọ Bible emi afo ekebemde iso eneme.
2 Kiet ke otu utịtmbuba edinam mme mfiakn̄ka nnọ mbon oro ẹkenọde magazine edi man ẹsiak afan̄ magazine. Mmemmem nneme nte enyeemi ekeme ndinyene uforo:
◼ “Mmonịm ke afo ama adara ndikot ibuotikọ Enyọn̄-Ukpeme oro n̄kọnọde fi oro akanamde an̄wan̄a ntak emi nnyịn ikpabakde Abasi. Mfịn nda ibuotikọ kiet ke magazine Awake! emi obụpde ete, ‘Why Is Life So Short?’ ndi. Eti mbụme edi oro, nte idịghe?” Afo emekeme ndikaiso ke ndidọhọ: “Mme ikọ Jesus oro ẹtịmde ẹmehe ke John 3:16 ẹnọ un̄wọn̄ọ nsinsi uwem. Mbọk bọ magazine emi nyụn̄ bọ nsịnudọn̄ to idotenyịn oro ẹkemede ndiberi edem emi ẹnọde ke Ikọ Abasi.” Ekem nam an̄wan̄a nte ke imọ iyeda mme nsiondi efen ifiak idi ndien iso-ọfọn ikaiso ineme se Abasi ọn̄wọn̄ọde ọnọ okopitem ubonowo. Ti ete ke ini kiet kiet oro afo adade mme magazine ọsọk owo, afo emekeme nditọt mfiakn̄ka kiet.
3 Edieke afo okonịmde ibuotikọ oro “Ererimbot Oro Ekọn̄ Mîdụhe—Ini Ewe?” afo emekeme ndidọhọ:
◼ “Uwem ekpetie didie ke isọn̄ emi edieke ekọn̄ mîkpodụhe aba? [Bet ibọrọ.] Yak n̄wụt fi se Abasi ọn̄wọn̄ọde ndinam.” Kot Psalm 37:10, 11, nyụn̄ tịn̄ nte n̄kpọ ẹditiede ke ini ẹdinamde uduak Abasi mi ke isọn̄. Ti owo oro se Jesus ekekpepde mme mbet esie ete ẹbọn̄ akam ẹben̄e nte ẹwetde ke Matthew 6:9, 10. N̄wam enye ọkọk ibuot ke se mme ikọ Jesus ẹwọrọde. Edieke owụtde ata udọn̄, afo emekeme ndinọ editobo ke Enyọn̄-Ukpeme m̀mê Awake! onyụn̄ anam ndutịm ndifiak n̄waha kaban̄a n̄kaiso nneme.
4 Edieke afo afiakde aka kaban̄a n̄kaiso nneme ke ibuotikọ ikpaedem oro “Why Is Life So Short?” afo emekeme nditọn̄ọ ntem:
◼ “Isan̄ oko n̄kedide mi, nnyịn ima ineme iban̄a owo ndidu uwem mbịghi. Ye unana eyịghe, nte afo okokụtde ke mme ibuotikọ Awake! oro, ntaifiọk inọhọ idotenyịn ndin̄wam nnyịn idu uwem ibe isua 70 m̀mê 80. Edi nso ke afo ekere aban̄a se Bible ọn̄wọn̄ọde? [Bet ibọrọ.] Bible owụt ete ke Abasi enyene se ifọnde ikan ke ekikere ọnọ owo.” Ekem kot John 17:3, nyụn̄ nam an̄wan̄a nte edibọ ifiọk ekemede ndida nsịm nsinsi uwem. Ke nde emi afo emekeme nditọn̄ọ ukpepn̄kpọ Bible mîdịghe anam ndutịm ọnọ nneme Bible efen.
5 Nditọn̄ọ ukpepn̄kpọ Bible edi akpan utịtmbuba ke utom ukwọrọikọ nnyịn. Iso-ọfọn afo ama afiak awaha ediwak ini ebịne owo oro ọkọbọde mme magazine. Ntak mûdomoke usụn̄ edisobo ye owo enyeemi ini efen oro afiakde awaha?:
◼ “Mme owo ẹnyene ata ediwak nsio nsio ekikere ẹban̄a ido ukpono ye ufọn esie ke uwem eyomfịn. Mme edinịm ke akpanikọ oro ẹtuahade ye kiet eken ẹdu kaban̄a ntak emi Abasi ayakde idiọkido odu ye ntak nnyịn ikọride isọn̄ inyụn̄ ikpade. Ndusụk owo ẹkpema ndifiọk nte ẹkpebọn̄de akam man Abasi okop.” Kụbọde ka ibuotikọ kiet emi afo ekerede ke enyeneufọk eyema ke kiet ke otu mme n̄wed ukpep Bible nnyịn, nyụn̄ nam ibio ibio wụt nte ẹsinịmde ukpepn̄kpọ.
6 Jehovah edi Abasi uduak. Ẹyak nnyịn ikpebe enye ke October ebe ke ndinam mme mfiakn̄ka oro ẹnyenede uduak.