Nyene Uko Ndinam Mme Mfiakn̄ka

¹ Nte afo emesikop inem ndinam mme mfiakn̄ka? Ediwak asuanetop ẹsikop. Eyedi afo ama okop ndịk ke ntọn̄ọ ntọn̄ọ, akpan akpan ke ini akafiakde awaha ebịne mme enyeneufọk oro ẹkewụtde esisịt udọn̄ ke ini okosobode ye mmọ ke ntọn̄ọ ntọn̄ọ. Edi nte afo ‘enyenede uko ke Abasi nnyịn nditịn̄ eti mbụk’ ke ndinam mme mfiakn̄ka, ekeme ndidi n̄kpọ n̄kpaidem ọnọ fi ndikụt nte utom emi ekemede ndidi mmemmem onyụn̄ akamade utịp. (1 Thess. 2:2) Didie ke edi ntre?

² Ke akpanikọ, akpan ukpụhọde odu ke ufọt mfiakn̄ka ye akpa ediwaha. Ẹnam mfiakn̄ka ye ọdiọn̄ọ, idịghe esenowo, ndien ke ofụri ofụri esimem utom ndinyene nneme ye ọdiọn̄ọ akan ye esenowo. Amaedi nti utịp oro ẹtode edibuana ke utom emi, mme mfiakn̄ka ẹkeme ndida n̄kesịm mme ukpepn̄kpọ Bible ẹmi ẹn̄wụmde mfri.

³ Ke ini nnyịn inamde utom ke ufọk ke ufọk, nnyịn iwaha ndien ndien ibịne mbon ẹmi mîkenyeneke udọn̄ ke ini ikakade ikese mmọ ke akpa ini. Ntak, ndien, nnyịn isikade iso ndiwaha? Nnyịn imọdiọn̄ọ ite ke idaha mme owo ẹsikpụhọde ye nte ke owo emi eketiede nte inyeneke udọn̄ m̀mê idem ọkọbiọn̄ọde ke ini ikawahade ke akpa ini ekeme ndinyene udọn̄ ini en̄wen emi iwahade. Ye emi ke ekikere, nnyịn imesitịm idem mfọn mfọn inyụn̄ ibọn̄ akam iyom edidiọn̄ Jehovah man otodo se nnyịn itịn̄de isan̄ emi enyene eti utịp.

⁴ Edieke, ke utom eke ufọk ke ufọk nnyịn, nnyịn isinyịmede ndikwọrọ ikọ nnọ mme owo ẹmi mîkowụtke udọn̄ ndomokiet ke akpa ini, nte nnyịn ikpakam inen̄ekede inyịme ndifiak n̄waha mbịne owo ekededi emi owụtde ndusụk udọn̄ ke etop Obio Ubọn̄?—Utom 10:34, 35.

⁵ Ediwak nnyịn idu ke akpanikọ mfịn koro asuanetop ke ime ama esifiak edi ebịne nnyịn. Edieke afo edide kiet ke otu mmọemi, afo emekeme ndibụp idemfo: ‘Nso ikedi akpa ekikere emi n̄kọnọde asuanetop oro? Nte mma nnyịme etop Obio Ubọn̄ ndondo oro ke akpa ini n̄kokopde enye? Nte ekeme ndidi ke n̄kenyeneke udọn̄?’ Nnyịn ikpenyene ndikop inemesịt nte ke asuanetop oro akafiakde awaha ama okụt ke nnyịn imodot se ẹfiakde ẹdi ẹbịne, ‘ada uko ke Abasi,’ awaha edi, onyụn̄ aka iso ndikpep nnyịn akpanikọ. Nso kaban̄a mme owo ẹmi ẹnyenede ndusụk udọn̄ ke akpa ini edi etiede nte ẹfefep nnyịn ke ukperedem? In̄wan̄în̄wan̄ edu edi akpan n̄kpọ, nte ifiọkutom etienede mi owụtde.

⁶ Ke adan̄aemi ẹbuanade ke unọ ikọ ntiense efak ke tụhi tụhi usenubọk kiet, asuanetop iba ẹma ẹsobo ye n̄wan kiet emi akakamade eyen. N̄wan emi ama ọbọ magazine kiet onyụn̄ ọnọ nditọete iban ẹmi ikot ete ẹdi ufọk imọ ke Sunday oro edide. Mmọ ẹma ẹkesịm ke ini ẹkenịmde, edi enyeneufọk ama ọdọhọ mmọ ke imọ inyeneke ini ndinyene nneme. Nte ededi, enye ama ọdọhọ ke imọ iyodu urua oro etienede. Nditọete iban ẹmi ẹma ẹyịk m̀mê enye oyodu ke ini ẹnịmde, edi n̄wan oro eketetie ebet mmọ ke ini mmọ ẹkefiakde ẹdi. Ẹma ẹtọn̄ọ ukpepn̄kpọ, ndien n̄wan emi ama anam n̄kọri emi akpade owo idem. Ke esisịt ini, enye ama ọtọn̄ọ ndidụk mme mbonoesop kpukpru ini onyụn̄ abuana ke utom an̄wautom. Enye ana baptism idahaemi.

⁷ Sịn Itiat Idakisọn̄ ke Akpa Ediwaha: Ẹsiwak ndisịn itiat idakisọn̄ mfiakn̄ka oro okụtde unen ke akpa ediwaha. Nen̄ede nọ n̄kpan̄utọn̄ ke se enyeneufọk etịn̄de. Nso ke mmọ ẹtịn̄ ẹnọ fi? Ndi enye enyene udọn̄ ke ido ukpono? Ndi enye enyene udọn̄ ke mme n̄kpọ n̄kaowo? Ndi enye enyene udọn̄ ke ifiọk ntaifiọk? mbụkeset? n̄kann̄kụk? Ke utịt ediwaha oro, afo emekeme ndibụp mbụme oro anamde owo ekere n̄kpọ onyụn̄ ọdọhọ ke iyeneme ibọrọ Bible ke ifiakde idi.

⁸ Ke uwụtn̄kpọ, edieke enyeneufọk enyịmede un̄wọn̄ọ Bible aban̄ade paradise isọn̄, ekeme ndidi se ifọnde ndinyene n̄kaiso nneme ke ibuotikọ oro. Mbemiso ọnyọn̄de, afo emekeme ndibụp ete: “Didie ke nnyịn ikeme ndifiọk nte ke Abasi oyosu un̄wọn̄ọ emi?” Ekem adian do ete: “Iso-ọfọn mmekeme ndiwaha ke ini mbon eken ke ubon ẹdude ke ufọk, ndien mmekeme ndiwụt fi ibọrọ Bible ke mbụme emi.”

⁹ Edieke enyeneufọk mîwụtke udọn̄ ke akpan ibuot nneme ekededi, afo emekeme ndibụp kiet ke otu mbụme ẹdude ke nneme ẹdude ke page edem Utom Obio Ubọn̄ Nnyịn onyụn̄ ada oro nte isọn̄ kaban̄a nneme fo ini en̄wen.

¹⁰ Nịm Nnennen N̄wetnnịm N̄kpọ: N̄wetnnịm n̄kpọ eke ufọk ke ufọk fo ekpenyene ndidi nnennen ye ọyọhọ ọyọhọ. Wet enyịn̄ ye adres enyeneufọk ndondo oro ọwọrọde ke ufọk oro. Kûkekere nọmba ufọk m̀mê enyịn̄ efak—se ntọt oro man okụt ete ke enen. Wet nte owo oro etiede. Wet ibuotikọ oro ekenemede, mme itien̄wed Abasi okokotde, n̄wed ekededi emi ọkọnọde, ye mbụme oro edibọrọde ke ini afiakde aka. Sịn usen ye ini akpa ediwaha ye ini ọkọdọhọde ke iyafiak iwaha. Kemi n̄wetnnịm n̄kpọ fo edide ọyọhọ ọyọhọ mi, kûduọk enye! Nịm enye ke itie emi mîdisopke man afo ekeme ndise enye ke ukperedem. Ka iso kere ban̄a owo oro ye nte afo edisede aban̄a ediwaha oro ini efen.

¹¹ Fiọk Se Mme Uduak Fo Ẹdide: Akpa, ke nditie ufiop ufiop ye ufan ufan, sịn ofụri ukeme fo ndinam enyeneufọk odu ke ifụre. Wụt ete ke imọ imenyene udọn̄ ke idemesie nte owo, ye unana edimemehe n̄kaha. Udiana, ti enye ban̄a mbụme ekededi emi afo okobụpde isan̄ oko. Nen̄ede kpan̄ utọn̄ nọ ekikere esie, nyụn̄ wụt ata esịtekọm ke se enye etịn̄de. Ekem, wụt ntak emi ekikere Bible enyenede ufọn. Edieke ekemede, men enye wụt ekikere emi enyenede ebuana ke n̄wed Ifiọk Oro Adade Osịm Nsinsi Uwem. Tịm fiọk ete ke akpan uduak fo ke ndinam mme mfiakn̄ka edi nditọn̄ọ ukpepn̄kpọ Bible.

¹² Nte n̄wed Ifiọk edide in̄wan̄în̄wan̄ ọnọ ediwak nnyịn odudu ‘ndinyene uko’ ke mme ukpepn̄kpọ Bible man ẹsịn udọn̄ ẹnọ nditọ ukpepn̄kpọ ndidụk mme mbonoesop nnyụn̄ mbuana ye esop Jehovah. Ke ini edem, nnyịn ikesibet tutu mme owo ẹkpep n̄kpọ ke ndusụk udomo ini mbemiso inọde mmọ ikot ndibuana ye nnyịn. Idahaemi, ediwak nditọ ukpepn̄kpọ ke ẹdụk mme mbonoesop ndondo oro mmọ ẹtọn̄ọde ndikpep n̄kpọ, ndien nte utịp mmọ ke ẹnam ata usọp usọp n̄kọri.

¹³ N̄wan ye ebe ẹma ẹnọ nsan̄autom ikọ ntiense ido nneme. Ke ini enye okowụtde ke imenyene udọn̄ ke akpanikọ, mmọ ẹma ẹnọ enye ikot ndinyene ukpepn̄kpọ Bible ke n̄wed Ifiọk. Ke ukem ini oro, mmọ ẹma ẹdọhọ ke enye ekpenyene ndidụk mme mbonoesop, ke ebiet emi ẹdibọrọde ekese mbụme esie. Eren oro ikenyịmeke ikot edikpep n̄kpọ kpọt edi n̄ko esikpep ikaba ke urua onyụn̄ ọtọn̄ọ ndidụk mme mbonoesop kpukpru ini ke Ufọkmbono Obio Ubọn̄.

¹⁴ Kama Ediye Uduot Ekpri N̄wed Oro Nso ke Abasi Oyom Oto Nnyịn?: Ke Mme Mbono District “Mme Isụn̄utom Emem Abasi,” nnyịn ima ibọ ediye uduot ekpri n̄wed oro Nso ke Abasi Oyom Oto Nnyịn? Ediye uduot ekpri n̄wed emi ọfọn ke ndida ntọn̄ọ mme ukpepn̄kpọ Bible ye mme owo oro ẹbakde Abasi inamke n̄kpọ m̀mê nso idi idaha ifiọkn̄wed mmọ. Enye esịne ọyọhọ ukpepn̄kpọ, enemede mme akpan ukpepn̄kpọ Bible. N̄wed emi eyenyene uforo etieti ke ndinọ ifiọk Abasi. Enye owụt akpanikọ ke ata in̄wan̄în̄wan̄ ye mmemmem usụn̄ tutu ekpere ndidi kpukpru nnyịn iyekeme ndida enye n̄kpep mbon en̄wen se Abasi oyomde. Eyedi ediwak asuanetop ẹyenyene ifet edinịm ukpepn̄kpọ Bible ke ediye uduot ekpri n̄wed emi.

¹⁵ Ndusụk owo oro ẹkerede ke mmimọ inyeneke ifet ndikpep n̄wed Ifiọk ẹkeme ndinyịme ndinyene mbio mbio ini ndikpep ediye uduot ekpri n̄wed Oyom. Mmọ ẹyekop nduaidem ẹban̄a se mmọ ẹkpepde! Ke n̄kpasịp page iba m̀mê ita, mmọ ẹyekụt ibọrọ ẹnọ mme mbụme oro mme owo ẹkerede ẹban̄a ke ediwak isua ikie: Anie edi Abasi? Anie edi Devil? Nso idi uduak Abasi kaban̄a isọn̄? Nso idi Obio Ubọn̄ Abasi? Didie ke afo ekeme ndikụt ido ukpono akpanikọ? Okposụkedi ediye uduot ekpri n̄wed oro enemede akpanikọ ke mmemmem usụn̄, etop esie enen̄ede okop odudu. Enye eneme mme akpan n̄kpọ oro mbiowo ẹdidụn̄ọrede ye mbon ẹmi ẹyomde ndina baptism onyụn̄ ekeme ndinam n̄kpọ nte utọ-ukot ndinyene ọyọhọ ọyọhọ ukpepn̄kpọ ke n̄wed Ifiọk.

¹⁶ Man ọtọn̄ọ ukpepn̄kpọ ke mfiakn̄ka, afo emekeme ndidọhọ mmemmem mmemmem ete: “Ndi afo ọmọfiọk ete ke ndida n̄kpasịp minit ifan̄, afo emekeme ndinyene ibọrọ ọnọ akpan mbụme Bible?” Ekem, bụp mbụme kiet oro odude ke ntọn̄ọ ke kiet ke otu ukpepn̄kpọ oro odude ke ediye uduot ekpri n̄wed oro. Ke uwụtn̄kpọ, edieke afo awahade ebịne akani owo, afo emekeme ndidọhọ ete: “Nnyịn imọfiọk ke Jesus ama ọkọk mme owo udọn̄ọ ke ini edem. Edi nso ke Jesus edinam ke ini iso, ọnọ mbon udọn̄ọ? mbonusọn̄? mme akpan̄kpa?” Ibọrọ ẹdu ke ukpepn̄kpọ 5. Owo emi enyenede udọn̄ ke ido ukpono ekeme ndinyene udọn̄ ke mbụme emi: “Nte Abasi esikop kpukpru akam?” Ẹnọ ibọrọ ke ukpepn̄kpọ 7. Mme andibuana ke ubon ẹyeyom ndifiọk: “Nso ke Abasi oyom oto mme ete ye eka ye nditọ?” Mmọ ẹyekụt nte mmọ ẹkpepde ukpepn̄kpọ 8. Mbụme en̄wen ẹdi: “Nte mme akpan̄kpa ẹkeme ndinọ mme oduuwem unan?” emi ẹnamde an̄wan̄a ke ukpepn̄kpọ 11; “Ntak emi ediwak ido ukpono ẹmi ẹdọhọde nte idide Christian ẹdude?” emi ẹnemede ke ukpepn̄kpọ 13; ye “Nso ke ana afo anam man edi ufan Abasi?” emi ẹnemede ke ukpepn̄kpọ 16.

¹⁷ N̄wam Mbon Ẹmi Ẹsemde Usem En̄wen: Nso kaban̄a mme enyeneufọk ẹmi ẹsemde usem en̄wen? Edieke ẹkemede, ẹkpenyene ndikpep mmọ ke usem oro mmọ ẹfiọkde ọfọn akan. (1 Cor. 14:9) Nnyịn ikpenyene ndiwet enyịn̄ ye adres mme utọ owo oro inyụn̄ inam ndutịm inọ asuanetop oro esemde usem mmọ ndifiak n̄ka nnyụn̄ n̄kenịm ukpepn̄kpọ Bible ye mmọ. Edieke mme esop m̀mê otu mîdụhe ikpere ndien mme asuanetop n̄kann̄kụk ẹmi ẹkemede ndisem usem enyeneufọk mîdụhe, asuanetop oro ekeme ndidomo ndikpep n̄kpọ ye enyeneufọk, akamade ediye uduot ekpri n̄wed Oyom ke usem iba.

¹⁸ Asuanetop emi esemde Ikọmbakara ama ọtọn̄ọ ukpepn̄kpọ ye eren emi esemde usem Vietnamese ọkọrọ ye n̄wan esie, emi esemde usem Thai. Ẹma ẹkama mme n̄wed ye Bible ke Ikọmbakara, Vietnamese, ye Thai ke ini ukpepn̄kpọ oro. Okposụkedi mfịna usem akadade n̄kpọ-ata edi ke akpa, asuanetop oro ewet ete: “N̄kọri eke spirit n̄wan ye ebe oro ama awara. Mmọ ẹkụt ufọn edidụk mme mbonoesop ye nditọ mmọ iba, ndien mmọ ke ẹkot Bible ke okoneyo nte ubon. Eyenan̄wan mmọ edide isua itiokiet esinịm ukpepn̄kpọ Bible eke idemesie.”

¹⁹ Ke ini ekpepde n̄kpọ ye mme owo ẹmi ẹsemde usem en̄wen, tịn̄ ikọ sụn̄sụn̄, tịn̄ ikọ an̄wan̄a, nyụn̄ da mmemmem ikọ ye mme ubak udịmikọ. Nte ededi, nyene ke ekikere nte ke ẹkpenyene ndinam n̄kpọ ukpono ukpono ye mme owo ẹmi ẹsemde usem en̄wen. Owo ikpenyeneke ndinam n̄kpọ ye mmọ nte n̄kpọ eke ẹdọhọde ke mmọ ẹdi nditọwọn̄.

²⁰ Da ndiye ndise ẹmi ẹdude ke ediye uduot ekpri n̄wed Oyom nam n̄kpọ. Edieke “ndise edide ukem ye ikọ tọsịn kiet,” ediwak ndise ke ediye uduot ekpri n̄wed emi ẹyetịn̄ ekese n̄kpọ ẹnọ enyeneufọk. Dọhọ enye okot mme itien̄wed Abasi ke Bible esie. Edieke ẹkemede ndinịm ukpepn̄kpọ oro ke ini andibuana ke ubon oro ọfiọkde Ikọmbakara odude ndikabade, oro nte eyịghe mîdụhe eyenyene ufọn.—Se Utom Obio Ubọn̄ Nnyịn, July 1984, page 8.

²¹ Nam Mme Mfiakn̄ka ye Unana Ubiatini: Ekpebịghi adan̄a didie mbemiso anamde mfiakn̄ka? Ndusụk asuanetop ẹsiwaha ke ufan̄ usen kiet m̀mê iba ke akpa edisobo ebede. Ndusụk owo ẹsifiak ẹka nte ini akade kpasụk ke usen oro! Nte oro ọsọp akaha? Ke ofụri ofụri, etie nte mme enyeneufọk isinyeneke mfịna. Ediwak ini esiyom asuanetop emi awahade etịm ọkọri in̄wan̄în̄wan̄ edu ọkọrọ ye esisịt uko. Kere ban̄a mme ifiọkutom ẹtienede mi.

²² Asuanetop kiet edide isua 13 akanam utom eke ufọk ke ufọk usen kiet ke ini okokụtde iban iba ẹmi ẹsan̄ade ọtọkiet. Ke etide nsịnudọn̄ edikwọrọ ikọ nnọ mme owo ke ebiet ekededi ikụtde mmọ, enye ama asan̄a ekpere iban ẹmi ke efak. Mmọ ẹma ẹwụt udọn̄ ke etop Obio Ubọn̄, ndien owo mmọ kiet kiet ama ọbọ n̄wed Ifiọk. Ekpri eyenete emi ama ọbọ adres mmọ, afiak aka usen iba ke ukperedem, onyụn̄ ọtọn̄ọ ukpepn̄kpọ Bible ye owo mmọ kiet kiet.

²³ Eyenete an̄wan kiet esinam ndutịm ndifiak n̄ka ke urua etienede. Edi ke usen kiet m̀mê iba ẹbede ke ama akawaha ke akpa ini, enye esiwaha ndinọ enyeneufọk magazine ke ibuot nneme oro mmọ ẹkebemde iso ẹneme. Enye asian enyeneufọk ete: “N̄kokụt ibuotikọ emi ndien n̄kere ke afo akpama ndikot enye. N̄kemeke ndibet ndinyene nneme idahaemi, edi nyafiak ndi ke uwemeyo Wednesday nte ikodiomide. Nte ini oro osụk ọfọfọn ye afo?”

²⁴ Ke ini owo owụtde udọn̄ ke akpanikọ, nnyịn imekeme nditịm nnịm nte ke enye oyosobo ubiọn̄ọ ke usụn̄ kiet m̀mê eken. Nnyịn ndifiak n̄waha usọp usọp ke ima ikosobo ke akpa ini ọyọsọn̄ọ enye idem ndiyọ mfịghe ekededi emi enye osobode oto mme iman, mme n̄kpet n̄kpet ufan, ye mmọ en̄wen.

²⁵ Kọri Udọn̄ Mbon Ẹmi Ẹdude ke Mme An̄wan̄wa Ebiet: Ediwak nnyịn imesikop inem ndikwọrọ ikọ ke mme efak, ke mme itie mbehe bọs, ke n̄kpọisan̄ ofụri owo, ke mme ufọkurua, mme itie inemesịt, ye ntre ntre eken. Ke adianade ye edinịm mme n̄wed, oyom nnyịn ikọri udọn̄. Ke ntak oro, ikpenyene ndisịn ukeme ndibọ enyịn̄, adres ye, ke ikemede, nọmba urụk ukopikọ kpukpru owo ẹmi ẹnyenede udọn̄ ẹmi nnyịn isobode. Ndibọ ntọt emi isọn̄ke utom nte afo ekemede ndikere. Nte nneme oro asan̄ade ekpere utịt, sio n̄wed nyụn̄ bụp ete: “Nte usụn̄ odu emi nnyịn ikemede ndika iso ke nneme emi ke ini efen?” Mîdịghe dọhọ ete: “N̄kpama fi okot ibuotikọ oro nnịmde nte ke afo ayama. Nte mmekeme ndida enye ndi ufọk m̀mê itieutom fo?” Eyenete kiet esibụp mmemmem mmemmem ete: “Ewe nọmba ke ẹkeme ndinyene fi?” Enye ọtọt ete ke ọfiọn̄ ita kpukpru owo ẹma ẹkop inemesịt ndinọ imọ nọmba urụk ukopikọ mmọ ke mîbọhọke owo ita.

²⁶ Da Urụk Ukopikọ Ndiyom Nnyụn̄ Nnam Udọn̄ Ọkọri: Asiakusụn̄ eyenete an̄wan esida urụk ukopikọ ndisịm mme owo ẹmi ẹdụn̄ọde ke mme ufọk oro ẹnọde ọkpọsọn̄ ukpeme. Enye esinam mme mfiakn̄ka n̄ko ke ukem usụn̄ oro. Ke akpa ikot, enye esidọhọ ete: “Mmọfiọk ke afo udiọn̄ọke mi. Ami nsịn akpan ukeme ndisobo mme owo ke ikpehe mbufo ndibuana ekikere Bible. Edieke afo enyenede ifet, n̄kpama ndikot un̄wọn̄ọ emi odude ke . . .” Ke ama okokot itien̄wed Abasi okụre, enye esidọhọ ete: “Nte ididịghe utịben̄kpọ ndikụt utọ ini oro edide? Mmadara ndikot emi nnọ fi. Edieke afo adarade n̄ko, n̄kpama ndifiak n̄kot nnyụn̄ nneme itien̄wed Abasi en̄wen.”

²⁷ Ke ndifiak n̄kot ke urụk ukopikọ, enye esiti enyeneufọk aban̄a akpa nneme mmọ onyụn̄ ọdọhọ ke ikpama ndikot ke Bible mban̄a nte mme idaha ẹditiede ke ini ẹtrede idiọkido. Ekem enye eyenyene ibio ibio nneme Bible ye enyeneufọk. Ke ama ekenyene nneme ediwak ini ke urụk ukopikọ, owo 35 ẹma ẹnọ enye ikot ndidi ufọk mmọ ndien ama ọtọn̄ọ ukpepn̄kpọ Bible itiaba! Ndi esidi ọkpọsọn̄ n̄kpọ ọnọ fi ndusụk ini ndifiak n̄ka mbịne mbon oro ẹnyenede udọn̄ ke ukwọ edịm ke ntak ndiọi usụn̄ m̀mê udọn̄ọ? Ke edide ntre, ntak mûnyeneke nneme ye mmọ ke urụk ukopikọ?

²⁸ Nam N̄kpọ Ban̄a Udọn̄ Oro Okụtde ke Mme Itie Mbubehe: Ndinam utom to ke ufọkurua sịm ufọkurua esịne ata ekese akan ikpîkpu edinọ mme magazine. Ediwak mme enyene ufọkurua ẹnyene ata udọn̄ ẹban̄a akpanikọ, ndien enyene ndinam udọn̄ oro ọkọri. Ke ndusụk idaha, eyedi ẹkeme ndinyene nneme Bible m̀mê ndikam nnịm ukpepn̄kpọ do ke mme itie urua oro. Ke mme idaha en̄wen, afo ye owo emi enyenede udọn̄ mi ẹmekeme ndisobo ke ini nduọkodudu uwemeyo m̀mê ke ini efen emi eferede owo ke idem.

²⁹ Esenyịn oro asan̄ade-san̄a ama aka ebịne owo emi enyenede ekpri ufọkurua unyam n̄kpọudia onyụn̄ ọdọhọ ke imọn̄ inam iwụt nte ẹsinịmde ukpepn̄kpọ Bible. Ke ini ẹkebụpde m̀mê nnamn̄wụt oro edibịghi adan̄a didie, esenyịn oro asan̄ade-san̄a ama ọdọhọ ke edida minịt 15 kpọt. Ye oro, anyam ufọkurua oro ama ọkọn̄ idiọn̄ọ ke enyịnusụn̄: “Fiak di ke Minit 20,” osio akpakaha iba edi, ndien mmọ mbiba ẹneme akpa ikpehe ekikere ition ke n̄wed Ifiọk. Owo emi enyenede esịt akpanikọ mi ama okop inemesịt etieti aban̄a se enye ekekpepde tutu enye odụk An̄wan̄wa Mbonoesop ye Ukpepn̄kpọ Enyọn̄-Ukpeme ke Sunday oro onyụn̄ enyịme ndika iso ke ukpepn̄kpọ ke urua etienede.

³⁰ Man ọtọn̄ọ ukpepn̄kpọ ke itie mbubehe, afo emekeme ndidọhọ: “Ẹsida minit 15 ẹnam ndutịm ukpepn̄kpọ Bible nnyịn ẹwụt. Edieke eferede fi ke idem, nyokop idatesịt ndiwụt fi nte ẹnamde enye.” Do, kûbe ini oro ẹnịmde. Edieke mîdịghe mmemmem ndinyene anyan nneme ke itie mbubehe, ekeme nditịm ndot ndika mbịne anyam ufọkurua oro ke ufọk esie.

³¹ Fiak Waha Idem Ọkpọkọm Ukenịmke N̄wed Ndomokiet: Oyom ẹnam mfiakn̄ka ke kpukpru mben̄e udọn̄, edide ẹma ẹnịm n̄wed m̀mê owo ikenịmke. Nte ededi, edieke anade in̄wan̄în̄wan̄ nte ke enyeneufọk inen̄ekede inyene udọn̄ ke etop Obio Ubọn̄, ọfọn ndiwọn̄ọde mme ukeme fo n̄ka mme ebiet efen.

³² Ke utom eke enyịnusụn̄ ke enyịnusụn̄, eyenete an̄wan ama osobo ye n̄wan kiet emi eketiede ufan ufan edi emi ọkọsọn̄ọde esịn ndibọ mme magazine. Asuanetop oro ewet ete: “Mma n̄kere mban̄a enye ke ediwak usen nnyụn̄ mbiere ke nyom ndifiak nnyene nneme ye enye.” Ke akpatre, eyenete an̄wan emi ama ọbọn̄ akam, enyene uko, onyụn̄ ọkọn̄ enyịnusụn̄ n̄wan emi. Ke idatesịt esie enyeneufọk emi ama ọdọhọ enye odụk edi. Ẹma ẹtọn̄ọ ukpepn̄kpọ Bible, ndien ẹma ẹfiak ẹnịm enye edem usen. Nte ini akade, enyeneufọk oro ama odụk akpanikọ.

³³ Nam Mbemiso Ndutịm Man Anam Ekese: Ẹtoro ẹte ẹbiat ndusụk ini ke urua kiet kiet ke ndinam mme mfiakn̄ka. Ẹkeme ndinam ekese ye eti ndutịm. Diomi mme mfiakn̄ka ke ukem ebiet oro edinamde utom eke ufọk ke ufọk.

³⁴ Mbon ẹmi ẹkụtde unen ke ndinam mme mfiakn̄ka ye ke nditọn̄ọ mme ukpepn̄kpọ Bible ẹdọhọ ẹte ke ọfọn ndiwụt ata ọkpọkpọ udọn̄ ke idem mme owo nnyụn̄ n̄kere mban̄a mmọ idem ke ẹma ẹkenyọn̄. Oyom n̄ko enyene inem inem ibuot nneme Bible ndineme nnyụn̄ nsịn itiat idakisọn̄ mbemiso ọnyọn̄de ke akpa ediwaha. Ke adianade do, edi akpan n̄kpọ ndifiak n̄ka usọp usọp man anam n̄kpọ aban̄a udọn̄ oro. Ana ẹnyene uduak editọn̄ọ ukpepn̄kpọ Bible kpukpru ini ke ekikere.

³⁵ Akpan edu kaban̄a edikụt unen ke utom mfiakn̄ka edi uko. Ẹsan̄a didie ẹnyene enye? Apostle Paul ọbọrọ ke ndidọhọ ke nnyịn “ida uko” man itan̄a eti mbụk inọ mbon en̄wen “ke Abasi nnyịn.” Edieke afo oyomde ndikọri ke afan̄ emi, bọn̄ akam nọ Jehovah yom un̄wam. Ekem, ke n̄kemuyo ye mme akam fo, nam n̄kpọ ban̄a kpukpru udọn̄. Jehovah ke akpanikọ ọyọdiọn̄ mme ukeme fo!

[Ekebe ke page 3]

Nte Ẹkemede Ndikụt Unen ke Ndinam Mme Mfiakn̄ka

■ Wụt ata ọkpọkpọ udọn̄ ke idem mme owo.

■ Mek inem inem ibuot nneme Bible ndineme.

■ Sịn itiat idakisọn̄ nọ mfiakn̄ka kiet kiet emi edinamde.

■ Ka iso ndikere mban̄a owo oro ke ama ọkọnyọn̄.

■ Fiak ka ke usen kiet m̀mê iba ebede man anam n̄kpọ aban̄a udọn̄ oro.

■ Nyene uduak fo nditọn̄ọ ukpepn̄kpọ Bible ke ekikere.

■ Bọn̄ akam yom un̄wam man enyene uko ndida nnam utom emi.