“Un̄wam ke Nnennen Ini”
1 Ọnọ nduọkodudu didie ntem ndibọ un̄wam ke ata nnennen ini iyomde enye! (Heb. 4:16) Ke Mbono District “Mme Isụn̄utom Emem Abasi,” nnyịn ima ikop idatesịt ke ini ẹkenọde nnyịn san̄asan̄a enọ iba nte n̄kpọ un̄wam ke nnennen ini.
2 Obufa n̄wed oro, Ukpọhọde Inemesịt Ubon, ekedi ke nnennen ini. Enye owụk ntịn̄enyịn ke akpan n̄kpọ inan̄ oro ẹsịnde udọn̄ ẹnọ inemesịt ubon: (1) Mfara ke idem, (2) edikpono itieibuot, (3) eti nneme, ye (4) ima. Item oro ẹnọde ke n̄wed Inemesịt Ubon ayan̄wam kpukpru ubon ẹmi ẹdade enye ẹsịn ke edinam ndinyene emem Abasi. Sio ini nịm ndikot obufa n̄wed emi ye ntịn̄enyịn nnyụn̄ n̄kpep enye ọtọkiet nte ubon. Mehe mfọn mfọn ye mme ikpehe esie man otodo afo eben̄e idem ndida enye nnam n̄kpọ ke usụn̄ oro enyenede uforo ke ini ẹnọde mme owo ke akpa ini, ke March.
3 Obufa ediye uduot ekpri n̄wed oro, Nso ke Abasi Oyom Oto Nnyịn?, emedi ke nnennen ini ndin̄wam nnyịn inam utom edinam mbet nnyịn ọsọp. Ke adan̄aemi ẹkemede ndikama enye akpan akpan ke ndin̄wam mme owo ẹmi ẹnyenede esisịt ukeme ukot n̄wed, ediwak ikpọ owo ye nditọwọn̄ ẹmi ẹfiọkde n̄wed ẹkeme n̄ko ndibọ ufọn nto mmemmem usụn̄ oro ẹnamde mme akpan ukpepn̄kpọ Bible ẹn̄wan̄a. Enye ekeme ndidi n̄kukụre se ẹyomde man ẹtọn̄ọ ukpepn̄kpọ nte itiat-utọukot adade esịm n̄wed Ifiọk. Ndutịm emi ke akpanikọ ayan̄wam ediwak owo efen efen ndifiọk nte mmọ ẹkemede ndibọ akpakịp edidiọn̄ ebe ke ndinam se Abasi oyomde.
4 David ama enen̄ede etịn̄ ekikere nnyịn ke ini enye ọkọdọhọde ete ‘ke imọ inanake n̄kpọ, ẹdemerede ukpọn̄ imọ, cup imọ ọyọhọ ọduọi!’ (Ps. 23:1, 3, 5) Nnyịn ke idatesịt isak iso ise ndinam utịbe utịbe un̄wam eke spirit emi ebe esịm ediwak mbon en̄wen ẹmi ke esịt akpanikọ ẹyomde ndifiọk nnyụn̄ nnam n̄kpọ nnọ ata Abasi, kpa Jehovah.