Ndibuana Ukpọhọde Inemesịt Ubon ye Mbon En̄wen
1 Ubon edi akpan ubak n̄kaowo, ndien mme obio-in̄wan̄, ikpọ obio, mme stet, ye mme ofụri idụt ẹwọrọ ẹto ubon. Mfịn ekpụk ubon odu ke idak mfịghe akan nte akanam edide. N̄kpọsọn̄ odudu ke ẹka iso ndisịn uwem ubon ke itiendịk. Nnyịn ikop inemesịt didie ntem nte ke Jehovah, Andinam ndutịm ubon, ọmọnọ nnyịn mme item man otodo nnyịn ikeme ndinyene inemesịt ubon! Mbon oro ẹtienede ndausụn̄ esie ẹkụt ẹte ke mme mfịna ẹsisụhọde ubọk ẹnyụn̄ ẹnyene ekpụk ubon oro okụtde unen. Ke September imenyene ifet edibuana n̄wed Ukpọhọde Inemesịt Ubon ye mbon en̄wen. Nam usio-ukot edida ibuot nneme aban̄ade uwem ubon n̄ka mbịne mme owo. Tie ufan ufan, in̄wan̄în̄wan̄, nyụn̄ nyene mbufiọk. Nso ke afo ekeme nditịn̄?
2 Afo emekeme nditọn̄ọ ke ndidemede utọ mbụme nte:
◼ “Ndi afo omokụt ke ọsọn̄ ediwak ubon ndiyọ mme mfịghe uwem? [Bet ibọrọ.] Mme ntọt ẹwụt ẹte ke ediwak owo ẹsobo mme mfịna ke ufọk. Afo enịm ke nso idin̄wam mme ubon ndinen̄ede nnyene iwụk ye inemesịt? [Bet ibọrọ.] Sia edide Abasi ọkọtọn̄ọ ndutịm ubon, nte ikpowụtke ifiọk ndidụn̄ọde mme ndausụn̄ oro enye ọnọde? [Kot 2 Timothy 3:16, 17.] Utọ enyene-ufọn item oro ẹdu ke n̄wed emi, Ukpọhọde Inemesịt Ubon.” Ekem bụp owo oro se enye ekerede nte edide ọsọ mfịna ubon, wụt ibuot oro enemede mfịna oro, nyụn̄ nọ n̄wed oro ke etịbe edide ₦55.
3 Ke mfiakn̄ka, afo emekeme ndibịne utịtmbuba editọn̄ọ ukpepn̄kpọ Bible ebe ke ndidọhọ:
◼ “Mma n̄kere mban̄a se afo eketịn̄de ke ibuot nneme aban̄ade uwem ubon, ndien mmada n̄kpọ oro n̄kerede ke ayama nsọk fi. [Wụt ediye uduot ekpri n̄wed Oyom, kụbọde ka page 16, nyụn̄ kot mbụme itiokiet ẹdude ke enyọn̄ oro.] Nte an̄wan̄ade, ana owo kiet kiet ke ubon anam udeme esie nditịp n̄kpọ nsịn ke inemesịt ubon. Edieke afo enyenede esisịt ini, nyanam n̄wụt nte afo ekemede ndibọ n̄kponn̄kan ufọn nto ntọt emi.” Ekem tọn̄ọ ndikpep ukpepn̄kpọ 8. Nọ ediye uduot ekpri n̄wed ke etịbe edide ₦15.
4 Usụn̄ en̄wen nditọn̄ọ nneme edi ndisiak mfịna, eyedi ke ndidọhọ:
◼ “Okposụkedi kpukpru owo ẹyomde ndikop ndusụk udomo uyụhọ, etie nte ediwak ubon inen̄ekede inyene emi. Afo ekere ke nso idin̄wam mmọ ndikụt ata inemesịt? [Bet ibọrọ.] Anyanini ko, Bible ama ayarade orụk mfịna ẹmi nnyịn idikụtde ke mme ubon mfịn. [Kot 2 Timothy 3:1-3.] Nte ededi, Bible n̄ko asian mme ubon se ẹkpenamde man ẹkọk mme mfịna ẹmi ẹnyụn̄ ẹnyene inemesịt oro ebịghide. Ẹwụt mme edumbet esie ke n̄wed emi, Ukpọhọde Inemesịt Ubon.” Ekem wụt ekebe ndụn̄ọde ke utịt ibuot kiet oro odotde, kot enye, nyụn̄ nọ n̄wed ke etịbe oro ẹsinọde.
5 Ke ini afiakde aka, da ediye uduot ekpri n̄wed “Oyom” tọn̄ọ ukpepn̄kpọ. Afo emekeme ndidọhọ:
◼ “Mma n̄kop inemesịt mban̄a afo ndinyịme ndidụn̄ọde mme edumbet Bible oro ẹnyenede ebuana ye uwem ubon. Ifiọk n̄kpọntịbe owụt ete ke ẹsinyene nti utịp ebe ke nditiene eti item oro odude ke Bible. Emi edi ibio ibio edinam an̄wan̄a kaban̄a ntak oro edide ntre.” Kot akpa ikpehe ekikere ke ukpepn̄kpọ 1 ke ediye uduot ekpri n̄wed Oyom, esịnede edide Psalm 1:1-3 m̀mê Isaiah 48:17, 18. Edieke ifet odude, neme se isụhọde ke ukpepn̄kpọ oro nyụn̄ nọ ediye uduot ekpri n̄wed ke etịbe oro ẹsinọde. Dọhọ ke iyafiak idi man ikpep udiana ukpepn̄kpọ ọtọkiet.
6 Kama Mme N̄wed Ẹwakde Ẹkem: Asiakusụn̄ kiet ama ọnọ eren emi akasan̄ade ke moto kiet ye enye ediye uduot ekpri n̄wed Oyom. Se eren oro okokotde ke ukpepn̄kpọ 10 ke ediye uduot ekpri n̄wed oro ama enen̄ede otụk enye tutu enye afiak ayak ediwak okụk oro enye ekeyịpde ke ekpat akaisan̄ efen ke moto oro ọnọ. Kpukpru owo ke moto oro ẹma ẹkop n̄kpaidem ẹnyụn̄ ẹyom ediye uduot ekpri n̄wed Oyom. Enye ama enịm idem ition efen efen ọnọ kpukpru mme akaisan̄ ke moto oro. Emi owụt ọniọn̄ edikama mme n̄wed oro ẹwakde ẹkem kpukpru ini.
7 Kaban̄a Mme N̄wed Nnyịn: Tie in̄wan̄în̄wan̄ ke ini oyomde ndibọ mme etịbe ke mme n̄wed nnyịn. Mme etịbe oro nnyịn isibọde ke mme n̄wed nnyịn ẹnen̄ede ẹsụhọde ẹkan se akpade ndimịn̄ mmọ. Editie in̄wan̄în̄wan̄ ọwọrọ ke nnyịn idibemke iso ibiere ke enyeneufọk idikemeke ndibọ n̄wed oro. Ata esisịt mbukpek ke n̄kan̄ nnyịn ekeme ndinam ekese ke ndida nti utịp ndi. Nnyịn nditie in̄wan̄în̄wan̄ ayan̄wam mbon oro ẹnyenede esịt akpanikọ nditịp ekpri okụk oro nnyịn inọde mme n̄wed nnyịn.
8 Ẹyak nnyịn isịn ofụri ukeme nte ikekeme man ibuana ukpọhọde oro adade esịm inemesịt ubon ye mbon en̄wen—itienede mme item oro ẹwụtde ke Ikọ Abasi.—Ps. 19:7-10.