Ndin̄wam Mme Ubon Ẹnyene Ini Iso Oro Ebịghide
1 “Idiọkitọn̄ enyene ufọn,” ntre ke anam mbubehe kiet ọkọdọhọ otu mme andikụre ukpep ke akamba ufọkn̄wed, adiande do ete: “Afo emekeme ndidiọk itọn̄ ndien osụk okop inem ke idemfo.” Oro edi uwụtn̄kpọ ke nte ererimbot otorode udọn̄ idemowo nte usụn̄ ndinam ini iso owo enyene nsọn̄ọ. Ke edide ata isio, Jesus ekekpep ete ke ana Christian “otụk idemesie . . . koro nso udori ke owo edikụt, edieke enye adiade ofụri ererimbot, ndien ada uwem esie osio isop?” (Matt. 16:24-26) Man ẹnyene ini iso ebịghide, ana owo ọkọn̄ ofụri uwem esie ke edinam uduak Abasi—kpa ata akpan utịtmbuba emi odude ọnọ mme ubon mfịn. (Ps. 143:10; 1 Tim. 4:8) Ẹneme etop oro ke akpatre ibuot ke n̄wed Ukpọhọde Inemesịt Ubon. Obufa n̄wed emi an̄wam mme owo ndikụt se inen̄ede idi akpan n̄kpọ ke uwem ye nte mmọ ẹkemede ndinam n̄kpọ ye ubon mmọ ke usụn̄ enyenede ufọn. Nte nnyịn ikade iso ndikwọrọ eti mbụk ke kpukpru ebiet, nso ke ikeme nditịn̄ oro edisịnde udọn̄ ọnọ mbon oro nnyịn isobode ndikot n̄wed Inemesịt Ubon? Ndusụk ekikere ẹdi ẹmi:
2 Ke enyịnusụn̄ ye ke efak, afo emekeme ndidomo ndikama tract oro “Dara Uwem Ubon” ntọn̄ọ nneme. Afo emekeme ndibụp:
◼ “Ye kpukpru editịmede esịt oro uwem eyomfịn adade ọsọk nnyịn, ndi afo emekere ke ẹkeme ndinyene uwem ubon oro enen̄ede okop inemesịt? [Bet ibọrọ.] Tract emi ọsọn̄ọ ọnọ nnyịn ete ke ẹkeme. Nte afo akpama ndikot enye?” Edieke ẹbọde, afo emekeme ndika iso ke ndidọhọ: “Sia afo enyenede udọn̄ ke ibuot nneme emi, eyedi afo ayama n̄wed emi oro ọnọde ọyọhọ ọyọhọ item ke nte ẹkpekụtde inemesịt ke ekpụk ufọk.” Wụt se isịnede ke n̄wed Inemesịt Ubon. Wụt enyịn̄ ibuotikọ ifan̄ ẹmi ẹmụmde owo udọn̄. Kụbọde ka page 10, nyụn̄ kot akpatre udịmikọ ke ikpehe ekikere 17 esịm utịt ikpehe ekikere 18. Nọ n̄wed oro, nyụn̄ siak nnennen etịbe. Nam an̄wan̄a ete imọ imenyene n̄kpọ efen efen ndibuana, nyụn̄ bụp ban̄a ini emi akpafiakde edi.
3 Afo emekeme ndika iso ke akpa nneme aban̄ade inemesịt uwem ubon ke ndidọhọ:
◼ “N̄kpama ndisio n̄kpọ n̄wụt ke n̄wed oro afo ọkọbọde emi n̄kerede ke afo ayama. Akpatre ibuot oro owụk ntịn̄enyịn ke ata ukpọhọde inemesịt ubon. [Kot ikpehe ekikere 2 ke page 183.] Fiọk ete ke ndisan̄a ọtọkiet ke ndinam uduak Abasi edi ukpọhọde. Nnyịn itoro ite mme ubon ẹkpep Bible ọtọkiet man ẹkpep se uduak Abasi edide ye nte ẹkemede ndida enye nsịn ke edinam ke esịtufọk. Nnyịn imesinọ ukpepn̄kpọ Bible mfọn oro esidade n̄kpasịp ọfiọn̄ ifan̄ ndikụre. Edieke afo enyịmede, nyowụt fi nte ẹsinịmde enye.” Fiak ka ye ediye uduot ekpri n̄wed oro Nso ke Abasi Oyom Oto Nnyịn? m̀mê n̄wed Ifiọk, ekededi oro editịmde odot.
4 Ke ini enyenede nneme ye nsan̄a ubet ukpepn̄kpọ ke ufọkn̄wed m̀mê mme uyen ke efakutom, afo emekeme ndinyene ibọrọ ke mbụme emi:
◼ “Edi akpan n̄kpọ adan̄a didie ọnọ ete ye eka ye nditọ mmọ ndinịm usụn̄ nneme in̄wan̄ ye kiet eken? [Bet ibọrọ.] Tịm fiọk se n̄wed ndausụn̄ ke uwem ubon etịn̄de aban̄a ibuot nneme oro ‘In̄wan̄în̄wan̄ Nneme Esịt Akpanikọ.’ [Kot ofụri ikpehe ekikere 4 ye akpa udịmikọ ke ikpehe ekikere 5 ke page 65 ke n̄wed Inemesịt Ubon.] Mme ikpehe ekikere oro ẹtienede ẹnọ nti ekikere ke nte ẹkemede ndifori nneme ke esịt ubon. Enyịn̄ n̄wed emi edi Ukpọhọde Inemesịt Ubon. Nyama ndinọ fi n̄wed emi ke etịbe ₦80.” Nam an̄wan̄a nte ke iyafiak idi ke ukperedem ndikop se enye etịn̄de aban̄a mme n̄kpọ emi enye okotde.
5 Afo emekeme ndika iso ke akpa nneme fo akaban̄ade nneme ke ufọt ete ye eka ye eyen ke ndidọhọ ntem:
◼ “Mma ndara udọn̄ oro afo okowụtde aban̄a ufọn edinyene eti nneme ke esịt ubon. Afo ọkpọdọhọ ke nso idi akpan ibuot nneme oro ete ye eka ye nditọ ẹkpenemede?” Bet ibọrọ. Ekem kụbọde ka page 68 ke n̄wed Inemesịt Ubon, nyụn̄ kot ibọrọ oro odude ke akpa ubak ikpehe ekikere 11. “Ndinyene ukpepn̄kpọ Bible eke urua ke urua edi mfọnn̄kan usụn̄ ndikọ ifiọk Abasi.” Nọ ediye uduot ekpri n̄wed Nso ke Abasi Oyom Oto Nnyịn? Nam an̄wan̄a nte ke ukpepn̄kpọ 16 esie ẹsio mme akpan n̄kpọ ke etop Bible ẹwụt. Kot ntọn̄ọikọ ke page 2, ndien ekem ẹneme akpa ukpepn̄kpọ oro ọtọkiet.
6 Edieke afo osobode ete m̀mê eka ke utom eke ufọk ke ufọk, mîdịghe ndusụk ke itie inemesịt m̀mê an̄wa mbre, afo emekeme ndidemede udọn̄ ke ndidọhọ:
◼ “Mmenịm ke afo eyenyịme nte ke ndibọk nditọ mfịn edi ata n̄kpọ-ata. Afo ekere ke nso ikeme ndikpeme ubon fo mbiọn̄ọ ndiọi odudu? [Bet ibọrọ.] Emi edi ndusụk eti item oro mmade.” Bụk uwụtn̄kpọ oro odude ke ikpehe ekikere 1, nyụn̄ kot ikpehe ekikere 2 ke page 90 ke n̄wed Inemesịt Ubon. Nam an̄wan̄a nte enye ọnọde ndausụn̄ oro enyenede ufọn man ekpeme mme ubon ọbiọn̄ọ mme akama-nsobo odudu. Dọhọ ke iyọnọ idem kiet ke etịbe edide ₦80, nyụn̄ nyịme ndibọrọ mbụme ekededi oro edemerede.
7 Ke udiana edika fo mbịne ete m̀mê eka emi ọkọbọde n̄wed “Inemesịt Ubon,” afo emekeme ndika iso ke nneme oro ke usụn̄ emi:
◼ “Ke ini ikosobode isan̄ oko, mma n̄kụt nte ke afo emenen̄ede ekere aban̄a nditọ fo ndien nte ke afo oyom ndinam kpukpru se ekemede man ekpeme mmọ ọbiọn̄ọ ndiọi odudu. Ekeme ndidi afo ukotke enye kan̄a, edi odu ata akpan n̄kpọ oro ẹtịn̄de ke n̄wed oro n̄kọnọde fi oro oyomde fi okụt. [Kot ikpehe ekikere 19 ke page 59.] Ndikọri itie ebuana ye Abasi oyom edidi ndifiọk enye ebe ke se idude ke Ikọ esie oro ẹwetde-wet, kpa Bible. Nte afo akpama mi nnam n̄wụt nte nnyịn isikpepde Bible nte ubon?”
8 Mme ọnọitem ererimbot ikemeke ndiwụt mme ubon usụn̄ inemesịt edi ke akpanikọ ẹdinanam mmọ ẹnyene edikpu. Ẹyak nnyịn isuan n̄wed Inemesịt Ubon ntatara ntatara man otodo ẹkeme ndida Ikọ Abasi n̄n̄wam mme owo ke kpukpru ebiet ndinyene ini iso oro ebịghide.—1 Tim. 6:19.