Ẹnam Edisana Utom Uwemeyo ye Okoneyo
1 Ẹmenọ nnyịn n̄wọrọnda ifetutom. Enye edi eke edidi mme ntiense nnọ Jehovah. Nnyịn idi ubak esop ofụri ererimbot eke mme ọkwọrọikọ ẹmi Jehovah adade ndinam n̄kponn̄kan utom editan̄a Obio Ubọn̄ oro akanam ẹnamde! (Mark 13:10) Ke ikerede iban̄a nte ini nnyịn edide usọp usọp, nte nnyịn ke ibuana ke utom emi ata ọyọhọ ọyọhọ ke udomo oro ikemede?
2 Nnyịn ifiọkke m̀mê owo ifan̄ ẹdinam n̄kpọ iban̄a ukwọrọikọ nnyịn nte ini akade. Jehovah ọsọn̄ọ etịn̄ ọnọ nnyịn ete ke edidi “akwa otuowo,” emi ẹdiọn̄ọde kpukpru mmọ oto ke mmọ “[ndinam] edisana utom nnọ enye uwemeyo ye okoneyo.” (Ediyarade 7:9, 15, NW) Se ibede miliọn Ntiense ition ẹmi ẹma ẹkesesịn idem ke utom Abasi idịghe sụk mme andikop oro ẹnyenede udọn̄, mmọ inyụn̄ idịghe sụk mme andidụk mbonoesop. Mmọ edi mme anamutom ẹmi ẹtan̄ade eti mbụk ke ofụri ererimbot!
3 Kpukpru usen, mme ifet ẹsidu nditoro Jehovah, edide ke an̄wautom m̀mê ke ido nneme. Kere ban̄a akwa ikọ ntiense oro ẹkpenọde edieke nnyịn owo kiet kiet ikpanamde usio-ukot ndibuana akpanikọ ye owo kiet kpọt kpukpru usen. Esịtekọm oro inyenede inọ Jehovah ekpenyene ndinụk nnyịn nditịn̄ mban̄a enye ye ifiopesịt.—Ps. 92:1, 2.
4 N̄wam Mbon En̄wen Ndinam Edisana Utom: Jehovah aka iso ndidiọn̄ nnyịn ye n̄kọri. (Hag. 2:7) Ke isua utom emi ekebede ke Nigeria, ẹkenịm ukpepn̄kpọ Bible 272,954 kpukpru ọfiọn̄ ke ẹbaharede ukem ukem. Utịtmbuba nnyịn ke ndikpep n̄kpọ ye mme owo ẹmi edi ndin̄wam mmọ ẹkabade ẹdi mme mbet Jesus. (Matt. 28:19, 20) Ediwak ke otu mmọ ẹkam ẹnanam eti n̄kọri ke ndidụk mme mbonoesop kpukpru ini. Mmọ ẹmetọn̄ọ nditịn̄ “n̄kpọsọn̄ utom Abasi” oro mmọ ẹkpepde nnọ mme ọdiọn̄ọ mmọ. (Utom 2:11) Nte ẹkeme ndinọ mmọ ikot ndibuana ke an̄wan̄wa utom ukwọrọikọ?
5 Ke April nnyịn ikpenyene ndisịn akpan ukeme ndikot mbufa owo ẹmi ẹdotde, ẹdiana ye nnyịn ke utom an̄wautom. Nte eyen ukpepn̄kpọ fo enyene udọn̄ ndinam emi? Ke edide ntre, nte enye osịm mme n̄kpọ oro N̄wed Abasi oyomde? (Se n̄wed Utom Nnyịn, page 97-99.) Ke ini eyen ukpepn̄kpọ oyomde ndibuana ke an̄wautom, neme ekikere esie ye esenyịn oro etiede ibuot, emi edinamde ndutịm man mbiowo iba ẹdụn̄ọde n̄kpọ emi. Edieke eyen ukpepn̄kpọ odotde se ẹnyịmede nte asuanetop oro mînaha baptism, nọ enye ikot ndisan̄a ye afo ke an̄wautom. Mme esenyịn utom ye mme ada ukpepn̄kpọ n̄wedesop ẹkpenyene ndinen̄ede ndu ke edidemede mban̄a edin̄wam mbon oro ẹkemede ndidot nditọn̄ọ ndisuan etop ke April.
6 Mme ete ye eka ẹkeme ndikere mban̄a m̀mê nditọ mmọ ẹdot ndikabade ndi mme asuanetop oro mînaha baptism. (Ps. 148:12, 13) Edieke eyen fo enyenede udọn̄ nditịn̄ ikọ ke utom Obio Ubọn̄ enye onyụn̄ enyenede eti eduuwem, afo emekeme ndika mbịne kiet ke otu mbiowo emi odude ke kọmiti utom ndineme idaha oro odude. Ke ẹma ẹkesobo ye afo ye eyen oro, mbiowo iba ẹyebiere m̀mê enye odot ndidi se ẹbatde nte asuanetop. Akpan ntak ndidat esịt esidu ke ini nditọwọn̄ ẹdianade ye nnyịn ke nditoro Abasi!
7 Jehovah kpọt odot edisana utom nnyịn. (Luke 4:8) Akpakam nnyịn owo kiet kiet ida utịbe utịbe ifet oro inyenede nditoro enye “eti-eti” inam n̄kpọ.—Ps. 109:30; 113:3.