Ndisuan Ifiọk Oro Adade Osịm Nsinsi Uwem
1 Jehovah edi “Enye emi ekpepde owo ifiọk.” (Ps. 94:10) Enye ada nnyịn ndisuan ifiọk unyan̄a uwem oro aban̄ade enye nnọ mbon oro mîfiọkke nte ẹkpenamde n̄kpọ ẹnọ enye ke usụn̄ oro enye onyịmede. N̄wed oro Ifiọk Oro Adade Osịm Nsinsi Uwem edi eti n̄kpọutom unọ ukpep emi ebede ke enye mbon esịt akpanikọ ẹkeme ndinyene nnennen ifiọk Abasi nto Ikọ esie oro ẹwetde-wet, kpa Bible. (1 Tim. 2:3, 4) Editat oro ẹtatde akpanikọ ke n̄wed Ifiọk ke usụn̄ oro edide in̄wan̄în̄wan̄ onyụn̄ esịnede mbufiọk eyen̄wam mme owo ndifiọk se Jehovah oyomde ndikpep mmọ. Ọfiọn̄ emi nnyịn iyom ndibuan mme owo ke nneme oro ẹdinamde mmọ ẹyom ndikot n̄wed oro. Ndusụk ekikere ẹdi ẹmi. Utu ke ndidomo ndimomụm mmọemi ndọn̄ ke ibuot, domo nditịn̄ mme akpan ekikere ke ikọ idemfo ye ke ndammana usụn̄ unyene nneme fo.
2 Sia edide ekese owo ẹmetaba owo ima ke n̄kpa, afo emekeme ndiyịri idotenyịn ediset ke n̄kpa ke nneme ebe ke nditịn̄ n̄kpọ etiede ntem:
◼ “Ekese nnyịn imataba owo ima ke n̄kpa. Nte afo emesikere m̀mê eyefiak okụt utọ owo oro? [Bet ibọrọ.] N̄kpa ikedịghe ubak akpa uduak oro Abasi ekenyenede ọnọ owo. Jesus ama owụt ke ẹkeme ndinyan̄a mbonima nnyịn nsio ke n̄kpa. [Kot John 11:11, 25, 44.] Idem okposụkedi emi akadade itie ediwak isua ikie ko ke edem, enye owụt se Abasi ọn̄wọn̄ọde ndinam nnọ nnyịn. [Kụbọde n̄wed Ifiọk ka ndise odude ke page 85 nyụn̄ kot uwetn̄kpọ ndise oro. Ekem wụt ndise odude ke page 86 nyụn̄ tịn̄ n̄kpọ tụk enye.] Edieke edimade ndikot n̄kpọ efen efen mban̄a ọnọ-ndọn̄esịt idotenyịn ediset ke n̄kpa emi, n̄kpama ndikpọn̄ n̄wed emi nnọ fi ke etịbe ₦80.”
3 Ke ama okokụre akpa nneme kaban̄a idotenyịn ediset ke n̄kpa, afo emekeme nditọn̄ọ nneme efen ye owo oro ke usụn̄ enyeemi:
◼ “Afo emekeme nditi n̄kọdọhọde nte ke n̄kpa ikedịghe ubak akpa uduak oro Abasi ekenyenede ọnọ owo. Edieke oro edide akpanikọ, ntak emi nnyịn ikọride isọn̄ inyụn̄ ikpade? Ndusụk ikụt inyan̄ ẹdu uwem ẹbe isua 100, ndien odu mme eto ẹmi ẹdude uwem ke ediwak tọsịn isua. Ntak emi mme owo ẹdude uwem ke isua 70 m̀mê 80 kpọt? [Bet ibọrọ.] Nnyịn ikpan̄a koro akpa owo iba ẹma ẹtụt utọn̄ ye Abasi.” Kot Rome 5:12. Kụbọde ka page 53 ke n̄wed Ifiọk nyụn̄ kot enyịn̄ ibuot oro. Neme akpa ikpehe ekikere ita, owụtde mme ibọrọ ke mme mbụme oro ẹmịn̄de-mịn̄. Nịm ini ndifiak n̄ka ke ukperedem man ekeneme se isụhọde ke ibuot oro. Sịn udọn̄ nọ owo oro ndikụre edikot enye mbemiso afo edide.
4 Edieke etịn̄de ikọ ọnọ owo emi etiede nte edi owo ido ukpono, afo emekeme ndidọhọ ete:
◼ “Ke ataata usụn̄ nsio nsio ido ukpono ẹdu mfịn ke mme itie ikie. Mmọ ẹkpep kpukpru orụk ukpepn̄kpọ oro mîdụhe ke n̄kemuyo. Ndusụk owo ẹdọhọ ke kpukpru ido ukpono ẹfọn ndien ke inamke n̄kpọ m̀mê nso ke inịm ke akpanikọ. Nso idi ekikere fo? [Bet ibọrọ.] Jesus ekekpep ido ukpono akpanikọ onyụn̄ owụt ke Abasi inyịmeke mme orụk utuakibuot eken. [Kot Matthew 7:21-23.] Edieke nnyịn iyomde ndinem Abasi esịt, ana nnyịn ituak ibuot inọ enye ke n̄kemuyo ye uduak esie.” Kụbọde n̄wed Ifiọk ka ibuot 5, kot enyịn̄ ibuot oro, nyụn̄ wụt ndusụk n̄kpri ibuotikọ. Nam an̄wan̄a nte ke ntọt emi eyen̄wam owo ndifiọk nte ekemede ndinem Abasi esịt. Nọ n̄wed ke etịbe oro ẹsinọde.
5 Mme owo ẹmi ẹtịmerede ke ntak ata ediwak ido ukpono ẹdude ẹkeme ndidara ibọrọ mbụme emi ke mfiakn̄ka fo:
◼ “Ke emi ata ediwak nsio nsio ido ukpono ẹdude mfịn, didie ke nnyịn ikeme ndibiere m̀mê ewe edi nnennen? Afo akpada nso ebiere? [Bet ibọrọ.] Jesus ama etịn̄ ọnọ nnyịn nte ikemede ndidiọn̄ọ mme ata anditiene enye.” Kot John 13:35. Neme ikpehe ekikere 18 ye 19 ke ibuot 5 ke n̄wed Ifiọk. Wụt ke ebede ke ndida mme ndausụn̄ N̄wed Abasi ye usụn̄ edinam eke edisat kiet kiet nsion̄o, owo ekeme ndidiọn̄ọ ido ukpono akpanikọ. Bụk nte ẹdiọn̄ọde Mme Ntiense Jehovah ke ofụri ererimbot kaban̄a ata ima ye n̄kokon̄ idaha ido uwem mmọ. Nam an̄wan̄a nte edikama n̄wed Ifiọk n̄kpep Bible ediwụtde orụk utuakibuot oro Abasi onyịmede in̄wan̄în̄wan̄.
6 Edieke afo osobode ete m̀mê eka, usụn̄ enyeemi ekeme ndikụt unen:
◼ “Kpukpru usen, nnyịn imesikop mme etop ẹban̄ade ndiọi ido mme uyen ẹmi ẹtiede nte inyeneke nti ido uwem ekededi. Ndusụk ikpọ owo ẹyom ndiduọhọ ndutịm ufọkn̄wed ke nditre ndikpep nditọwọn̄ ukpụhọde eti ye idiọk. Afo ekere ke anie ọkpọnọ ukpep emi? [Bet ibọrọ.] Kop se Bible etịn̄de aban̄a mbụme emi. [Kot Ephesus 6:4.] Oro asian nnyịn nte ke ndikpep nditọwọn̄ nti ido uwem edi mbiomo ete ye eka.” Kụbọde n̄wed Ifiọk ka page 145, kot ikpehe ekikere 16, nyụn̄ tịn̄ n̄kpọ tụk mme ndise ẹdude ke page 147. Nam an̄wan̄a ete ke ẹtịm n̄wed emi ẹnọ ofụri ubon ndikpep. Ke akamade mme ikpehe ekikere 17 ye 18 ke page 146, dọhọ ke imọn̄ inam iwụt nte nnyịn isinịmde utọ ukpepn̄kpọ oro ye mme ubon.
7 Edieke ọkọtọn̄ọde ukpepn̄kpọ ye ete m̀mê eka emi enyenede udọn̄ ke akpa ediwaha, afo emekeme ndika iso ke mfiakn̄ka ke ndidọhọ ete:
◼ “Ererimbot mfịn onịm ekese idomo ọnọ n̄kparawa nnyịn. Emi anam edi ọkpọsọn̄ n̄kpọ ọnọ mmọ ndikabade ndi mme abak-Abasi nte mmọ ẹkọride ẹwọrọ owo. Eyedi afo emeti nte ke nneme nnyịn isan̄ oko, nnyịn ima isio edumbet iba iwụt. Nte mme ete ye eka oro ẹbakde Abasi, oyom nnyịn inịm nti uwụtn̄kpọ inọ nditọ nnyịn, ndien nnyịn ikpenyene ndisitịn̄ mme n̄kpọ ẹwụtde ima oro inyenede inọ mmọ kpukpru ini. Odu n̄kpọ efen emi Bible ọdọhọde ke nditọ ẹyom ẹto mme ete ye mme eka mmọ.” Kot Mme N̄ke 1:8. Kụbọde ka page 148 ke n̄wed Ifiọk nyụn̄ ka iso ke ukpepn̄kpọ, okụrede ikpehe ekikere 19-23. Nọ ekikere ke iyefiak idi ndikpep n̄kpọ ye ofụri ubon, ọtọn̄ọde ke ibuot 1.