“Nsinsi Uwem Oro Edi”
1 Ẹnyene ndida mme ikọ Jesus ẹmi ẹwetde ke John 17:3 ke akpan n̄kpọ. Enye ama ada se enye eketịn̄de ke akpan n̄kpọ—ndikpep ifiọk aban̄ade Abasi ye Christ ọwọrọ nsinsi uwem! Edi ndi edi sụk edinyene ifiọk Jehovah ye Jesus edinam ẹnọ nnyịn utịp uwem nsinsi? Baba. Nditọ Israel ẹma ẹfiọk ke Jehovah ekedi Abasi mmọ, edi usụn̄uwem mmọ ikowụtke edinịm ke akpanikọ oro. Nte utịp, mmọ ẹma ẹtaba mfọn esie. (Hos. 4:1, 2, 6) Ekeme ndidi ediwak miliọn owo mfịn “ẹnyene ifiopesịt ẹban̄a Abasi, edi ifiopesịt mmọ isan̄ake ye ifiọk.” (Rome 10:2) Oyom mmọ ẹdi ẹdifiọk Jehovah, “ata Abasi kierakiet,” ẹnyụn̄ ẹkpep nte ẹkpenamde n̄kpọ ẹnọ enye ke nnennen usụn̄. Ke ntak oro, ke November nnyịn idinọ n̄wed Ifiọk Oro Adade Osịm Nsinsi Uwem. Usụn̄ ewe ke afo edida ọnọ n̄wed Ifiọk? Ndusụk ekikere oro ẹkemede ndin̄wam fi ẹdi ẹmi.
2 Sia ekikere edidu uwem ke nsinsi ke isọn̄ edide obufa ọnọ ekese owo, ntọn̄ọikọ emi ekeme ndimụm udọn̄ mmọ:
◼ “Nnyịn ibụp mme mbọhọidụn̄ nnyịn mbụme. Edieke ẹkpenọde fi ikot ndidụn̄ ke nsinsi ke ererimbot ebietde enyeemi, nte afo ekpenyịme ikot oro? [Wụt ndise oro odude ke page 4-5 ke n̄wed Ifiọk. Bet ibọrọ.] Emi ekeme ndinen̄ede ndi inem inem ifiọk n̄kpọntịbe fo ke uwem. Edi afo ekere ke akpanam nso man okụt nte enye edide ata idem n̄kpọ ọnọ fi? [Bet ibọrọ.] Tịm fiọk se ẹyomde ẹnam nte ekemde ye John 17:3. [Kot.] N̄wed emi ke an̄wam ediwak owo ndinyene san̄asan̄a orụk ifiọk emi. Afo emekeme ndibọ enyeemi ke etịbe edide ₦80. Mma mfiak ndi isan̄ efen, nnyịn imekeme ndineme ntak owụtde ifiọk ndinịm ke akpanikọ nte ke nnyịn imekeme ndinyene nsinsi uwem mi ke isọn̄.”
3 Ke ini afiakde aka ndise mbon oro ekenemede John 17:3 ye mmọ, afo emekeme ndika iso ke usụn̄ emi:
◼ “Isan̄ oko n̄kedide, mma n̄kot inem inem ikọ Jesus oro ẹdude ke John 17:3 nnọ fi, ke ebiet emi enye ọkọsọn̄ọde ọnọ nnyịn nte ke ndifiọk Abasi ye imọ ọwọrọ nsinsi uwem. Edi ediwak owo ẹkere ke ẹkeme ndinyene eti uwem ke heaven kpọt. Afo ekere didie aban̄a oro? [Bet ibọrọ.] Edieke n̄wed oro ọkọbọde odude ekpere, n̄kpama ndiwụt fi ndusụk ufan̄ikọ Bible oro ẹwụtde ke ẹdifiak ẹwụk Paradise ke isọn̄. [Neme ikpehe ekikere 11-16 ke page 9-10 ke n̄wed Ifiọk.] Mma mfiak ndi isan̄ efen, nyama ndiwụt fi ntak emi afo ekemede ndibuọt idem ke mme un̄wọn̄ọ oro ẹdude ke Bible. Kan̄a kemi, ndusụk afo emekeme ndikot ibuot 2 ke n̄wed fo.”
4 Nneme oro afo ekemede ndikama ye mbon oro ẹnyenede udọn̄ ke ido ukpono edi emi:
◼ “Nnyịn inyene nneme ye mbọhọidụn̄ nnyịn iban̄a ntak emi ata ediwak nsio nsio ido ukpono ẹdude ke ererimbot. Se ibede n̄ka ido ukpono 10,000 ẹdu ke ofụri ererimbot. Kpa ye oro, Bible kiet kpọt odu. Ke ekikere fo, ntak emi ndutịme ido ukpono emi odude? [Bet ibọrọ. Kûbọde ka ibuot 5 ke n̄wed Ifiọk, nyụn̄ kot ikpehe ekikere 1.] Afo oyokụt mme ibọrọ oro ẹnọde uyụhọ ke mme mbụme oro ebe ke ndikot ibuot emi. Nyokop inemesịt ndikpọn̄ n̄wed emi nnọ fi ke etịbe ₦80 edieke edimade ndidụn̄ọde enye.” Edieke ẹbọde, nam akpan ndutịm ndifiak n̄ka, nyụn̄ dọhọ ete: “Mma mfiak ndi, ekeme ndidi nnyịn iyeneme m̀mê kpukpru ido ukpono ẹdi sụk nsio nsio usụn̄ oro ẹdade ẹsịm ukem ebiet.”
5 Ke ini afiakde aka man aka iso ke nneme aban̄ade ntak emi ido ukpono ẹwakde ntre, afo emekeme ndidọhọ ntem:
◼ “Ke ini n̄kenyenede nneme ye afo isan̄ oko, mma ndemede mbụme mban̄a m̀mê kpukpru ido ukpono ẹdi sụk nsio nsio usụn̄ oro ẹdade ẹsịm ukem ebiet. Afo ekere didie aban̄a oro? [Bet ibọrọ.] N̄kpama ndiwụt fi se Jesus eketịn̄de aban̄a n̄kpọ emi ke n̄wed oro n̄kọkpọn̄de nnọ fi. [Kûbọde ka ibuot 5 ke n̄wed Ifiọk, nyụn̄ kot ikpehe ekikere 6-7, esịnede Matthew 7:21-23.] Afo emekeme ndikere ntak emi edide ata akpan n̄kpọ ndifiọk nnennen se uduak Abasi edide. Afo oyokụt ke mme ikpehe ekikere oro ẹtienede ẹkama ntọt etieti. Mbọk kot se isụhọde ke ibuot emi. Isan̄ efen ndifiakde ndi, nyama ndiwụt fi ufọn edinyene nnennen ifiọk Bible.”
6 Ndinyene nneme nnennen nnennen esiwak ndikụt unen ke nditọn̄ọ mme ukpepn̄kpọ Bible. Emi edi ntọn̄ọikọ oro ẹnọde ekikere ẹban̄a emi odude ke page 12 ke n̄wed “Reasoning”:
◼ “Ami n̄waha man nnọ fi ukpepn̄kpọ Bible mfọn. Edieke enyịmede, n̄kpama ndida minit ifan̄ ndinam n̄wụt nte mme owo ke n̄kpọ nte idụt 200 ẹsinemede Bible ke ufọk nte mme otu ubon. Nnyịn imekeme ndikama ekededi ke otu ibuotikọ ẹmi ndida nnyene nneme. [Wụt se isịnede ke n̄wed Ifiọk.] Ewe enen̄erede edemede fi udọn̄?” Bet man owo oro emek. Kûbọde ka ibuot oro enye emekde, nyụn̄ tọn̄ọ ukpepn̄kpọ ke akpa ikpehe ekikere.
7 Nnennen usụn̄ nneme en̄wen emi okụtde unen emi afo ekemede ndikama ke nditọn̄ọ mme ukpepn̄kpọ edi emi:
◼ “Mmesinọ mme ukpepn̄kpọ Bible ke mfọn ndien ufan̄ odu ke ndutịm mi ọnọ nditọ ukpepn̄kpọ efen efen. Un̄wam ukpepn̄kpọ Bible emi ke nnyịn isikama. [Wụt n̄wed Ifiọk.] Ukpepn̄kpọ emi esibịghi ke ọfiọn̄ ifan̄ kpọt onyụn̄ ọbọrọ mme utọ mbụme nte: Ntak emi Abasi ayakde ndutụhọ odu-o? Ntak emi nnyịn ikọride isọn̄ inyụn̄ ikpade? Nso itịbe inọ mbonima nnyịn oro ẹkpan̄ade? Ye didie ke nnyịn ikeme ndisan̄a n̄kpere Abasi?” Ekem obụp, “Nte mmekeme ndinam n̄wụt fi nte ẹsinịmde ukpepn̄kpọ emi?” Edieke ẹsịnde ukpepn̄kpọ, nọ n̄wed Ifiọk ke ekọmurua oro ẹsinọde.
8 Nso n̄kpọuto ke nnennen ifiọk Abasi ye Christ edi ntem ọnọ kpukpru mbon oro ẹnyenede enye! Ndinyene enye ke akpanikọ ọwọrọ nsinsi uwem ke mme mfọnmma idaha. Ẹyak nnyịn ida kpukpru ifet ke November ndibuana ifiọk oro adade esịm nsinsi uwem ye mbon en̄wen.