Mmanie Ẹdikpan̄ Utọn̄ Ẹnọ Etop Nnyịn?
1 Nte akanam mîtịbeke ke mbụk owo, mme owo ẹsikop akpakịp ntọt, emi ekese mîdịghe akpan n̄kpọ ẹnyụn̄ ẹkam ẹtụnde owo usụn̄. Nte utịp, esitie nte akan ediwak owo ubọk, ndien eyedi n̄kpọ-ata ọnọ nnyịn ndinam mmọ ẹkpan̄ utọn̄ ẹnọ etop aban̄ade Obio Ubọn̄ Abasi. Mmọ ifiọkke eti utịp oro mmọ ndikpan̄ utọn̄ nnọ Ikọ Abasi ekemede ndinyene ke idemmọ.—Luke 11:28.
2 Nnyịn imadat esịt nte ke ediwak ikpehe ererimbot, ediwak tọsịn owo ke mme itie duop ke ẹkpan̄ utọn̄ ẹnọ etop oro ke ẹnyụn̄ ẹnyịme mme ukpepn̄kpọ Bible oro nnyịn inọde. Nte ededi, owo isinen̄ekede inọ n̄kpan̄utọn̄ ke mme efakutom eken. Ediwak ebiet oro isiwahade ke utom ukwọrọikọ inyeneke nti utịp, ndien nnyịn imekeme ndikere m̀mê mmanie ẹdikpan̄ utọn̄ ẹnọ etop nnyịn.
3 Ana nnyịn ikpeme ibiọn̄ọ ediyak idem emem nnyịn. Paul ama anam an̄wan̄a ete: “Owo ekededi eke edisemede okot enyịn̄ Jehovah eyebọhọ. Edi mmọ ẹdinam didie ẹseme ẹkot Enye emi . . . mmọ mîkokopke iban̄a? Mmọ ẹdinyụn̄ ẹnam didie ẹkop, ke ọkwọrọ-ikọ mîdụhe? . . . kpa nte ẹwetde ẹte, Ikpat mmọ ẹmi ẹdade etop nti n̄kpọ ẹye adan̄a didie!” (Rome 10:13-15) Edieke nnyịn isuande n̄kpasịp Obio Ubọn̄ ifịk ifịk, Abasi ayanam enye ọkọri ke esịt mbon akpanikọ.—1 Cor. 3:6.
4 Ukpọhọde Edi Ndinam Mfiakn̄ka Kpukpru Ini: Ke mme efakutom ẹmi etiede nte ke ibat ibat owo ẹkpan̄ utọn̄ ẹnọ etop nnyịn, oyom nnyịn inọ ntịn̄enyịn ke ndinam udọn̄ ekededi oro nnyịn ikụtde ọkọri, edide imenịm n̄wed m̀mê inịmke. Ntak ọsọpde ebiere ete ke owo idikwe unen ndomokiet? Ke ini isuande n̄kpasịp, nnyịn ifiọkke ebiet emi enye edikụtde unen. (Eccl. 11:6) Edieke nnyịn itịmde idem ifiak ika ndibuana n̄kpọ ke N̄wed Abasi, idem ọkpọkọm edi ibio ibio, eyedi nnyịn iyekeme ndisịm esịt owo oro. Nnyịn imekeme ndinọ tract mîdịghe inọ mme magazine eke ndondo emi. Nte ini akade, nnyịn imekeme ndinam ukpepn̄kpọ Bible n̄wụt. Nnyịn iyokop n̄kpaidem asan̄ade ye inemesịt ndikụt adan̄a nte Jehovah ọdiọn̄de ukeme nnyịn.—Ps. 126:5, 6.
5 Ẹma ẹnọ n̄wan kiet emi okowụtde ndusụk udọn̄ tract. Owo ikekwe enye aba ke ufọk tutu ọfiọn̄ iba ke ukperedem, ndien ekem enye ama anana ini akaha ndinyene nneme. Ẹma ẹfiak ẹnọ enye kpasụk tract oro. Kpa ye ukeme oro asuanetop oro ekesịnde ndisịm enye ke ufọk, ama ada ọfiọn̄ ita en̄wen ndisobo ye enye, n̄kukụre ndikụt nte ke enye ọkọdọdọn̄ọ. Eyenete an̄wan oro ama afiak aka ke urua oro eketienede, ndien ẹma ẹneme n̄kpọ ibio ibio ẹban̄a tract oro. Ke ini eyenete an̄wan oro akafiakde aka urua en̄wen, n̄wan oro ama owụt ata udọn̄ ke etop Obio Ubọn̄. Mme idaha ke uwem esie ndikpụhọde ama anam enye enyene udọn̄ ke n̄kpọ eke spirit. Ẹma ẹtọn̄ọ ukpepn̄kpọ Bible, ndien enye ye ifiopesịt ama esikpep n̄kpọ kpukpru urua ke oro ebede.
6 Ukem nte edide ye n̄kpọ ekededi oro nnyịn iyomde ndikụt nte ọkọride, edide mme flawa, mme ikọn̄, m̀mê udọn̄ ke etop Obio Ubọn̄, oyom edibọk. Oro esida ini, nsịn̄edeidem, edu edise enyịn, ye ubiere editre ndikpa mba. Isua oko, se ibede mbahade miliọn owo kiet ke itie ita ẹmi n̄kpasịp Obio Ubọn̄ ọkọdọn̄de n̄kam ẹma ẹna baptism! Edieke nnyịn ikade iso ndikwọrọ ikọ, nnyịn iditreke-tre ndikụt ediwak owo efen efen oro ẹdikpan̄de utọn̄ ẹnọ etop nnyịn.—Men Galatia 6:9 domo.