Nte Afo Emesidomo Unọ Ikọ Ntiense Mbubịteyo Ese?
1 Kpukpru nnyịn imesikop inemesịt ndinyene uforo ke utom nnyịn. Ke n̄kan̄ eken, ke ini nnyịn mîkemeke ndikụt nti utịp, utom ekeme ndifek owo onyụn̄ anana uyụhọ. Utom emi enyenede se ọwọrọde esida ọkpọkpọ utịp edi, enye onyụn̄ edi edidiọn̄. (Men Ecclesiastes 3:10-13 domo.) Nnyịn imekeme ndibuan edumbet emi ke utom ukwọrọikọ nnyịn. Ifiọkutom anam nnyịn idiọn̄ọ nte ke ini nnyịn isan̄ade to ke enyịnusụn̄ sịm enyịnusụn̄ inyụn̄ ikemede ndinyene nneme ye mme owo mban̄a Bible, nnyịn imesikop nduọkodudu ke n̄kan̄ eke spirit ke ini ifiakde inyọn̄ ufọk. Etie nnyịn ke idem nte ke enen̄ede enyene se inamde.
2 Edi ata ọkpọsọn̄ n̄kpọ ke ndusụk ebiet ndikụt mme owo ke ufọk ke ndusụk ini ke usen. Etop owụt nte ke ediwak itie se ibede mbahade owo 50 eke ikie isidụhe ke ufọk ke ini ibakde-bak iwaha ke usen. Ediwak esop ẹse ẹban̄a mfịna emi ebe ke ndinam ndutịm nnọ edinọ ikọ ntiense mbubịteyo, ndien mmọ ẹsikụt eti unen. Mme asuanetop ẹtọt nte ke ini mmimọ iwahade ke usen oro nte ini akade, ediwak owo ẹsidu ke ufọk, ndien ke ofụri ofụri, mme owo ẹsinen̄ede ẹdu ke ifụre ẹnyụn̄ ẹnyene ntụhọ editịm nnọ n̄kpan̄utọn̄ ke etop Obio Ubọn̄. Nte mbufo ẹmedomo unọ ikọ ntiense mbubịteyo ke efakutom mbufo ẹse?—Men Mark 1:32-34 domo.
3 Mbiowo Ẹdiomi Unọ Ikọ Ntiense Mbubịteyo: Ẹsinen̄ede ẹnọ ibetedem ke ndusụk itie ke mbono an̄wautom ke utịt utịt uwemeyo m̀mê ke ntọn̄ọ ntọn̄ọ mbubịteyo. Ẹkeme ndikere mban̄a n̄kpri asuanetop ẹmi ẹnyọn̄de ufọkn̄wed ẹdi ke uwemeyo ye ikpọ owo ẹmi ẹkụrede utom idịbi udia mmọ nte ini akade ke usen. Ndusụk asuanetop ẹmi mîkemeke ndiwọrọ an̄wautom ke utịturua ẹsikụt nte ke unọ ikọ ntiense mbubịteyo oro ẹnamde ke urua oro edi eti usụn̄ ọnọ mmọ ndinyene ebuana ke utom ukwọrọikọ kpukpru ini.
4 Nsio nsio utom ẹdu emi afo ekemede ndibuana ke ini unọ ikọ ntiense mbubịteyo. Afo emekeme ndida mme magazine nnọ ikọ ntiense ke ufọk ke ufọk mîdịghe akama mme n̄wed ẹnọde ke ọfiọn̄ oro. Mbubịteyo edi eti ini ndiwaha mbịne mme owo ẹmi mîkodụhe ke ufọk ke ini mme asuanetop ẹkewahade ke usenubọk m̀mê ke mme utịturua. Eti efakutom ekeme ndidu n̄ko kaban̄a unọ ikọ ntiense efak, anamde fi ekeme ndisobo mme owo oro ẹnyọn̄de utom. Ediwak owo ẹkụt ke mbubịteyo edi mfọnn̄kan ini ndifiak n̄ka n̄kese mbon ẹmi ẹkewụtde udọn̄.
5 Kpeme Idem Nyụn̄ Nyene Ọniọn̄: Ndiwọrọ ke eyo ama okofụk owo idem m̀mê ke ama okokụt ekeme ndidi n̄kpọndịk ke ndusụk ebiet. Okpowụt ọniọn̄ ndisan̄a owo iba iba m̀mê ke otu ke mme efak oro un̄wana ikan̄ odude mfọn mfọn inyụn̄ iwaha mme ufọkidụn̄ m̀mê mme ikpọ ufọk ẹdọn̄ọde nsio nsio ufọk n̄kukụre ke ebiet emi ẹkụtde ẹte ẹyenyene ifụre. Ke ini ọkọn̄de usụn̄, da ke itie emi ẹkemede ndikụt fi, nyụn̄ tịn̄ owo emi afo edide in̄wan̄în̄wan̄. Nyene mbufiọk. Ke ini afo okụtde ke imawaha ke ini oro mîfọnke, nte ini oro ubon ẹdiade udia, dọhọ ke iyefiak idi ini en̄wen. Nte ido edide otịm ọfọn ndinam unọ ikọ ntiense fo etre ke ntọn̄ọ ntọn̄ọ mbubịteyo, utu ke ndiwaha ke idiọk ini, ke ini mme enyeneufọk ẹben̄ede idem ndidụk idap.
6 Mbubịteyo ẹfọn akpan akpan ke unọ ikọ ntiense. Nte nnyịn inamde n̄kpọ inọ Abasi “uwemeyo ye okoneyo,” Jehovah ke akpanikọ eyediọn̄ mme ukeme nnyịn.—Edi. 7:15.