Kwọrọ Eti Mbụk ke Kpukpru Ebiet

¹ Mme akpa Christian ẹma ẹsikwọrọ ikọ ke kpukpru ebiet. Mmọ ẹma ẹnen̄ede ẹsịn ifịk tutu edi se ‘ẹkwọrọde’ etop Obio Ubọn̄ “ẹnọ kpukpru owo ke idak ikpaenyọn̄,” ke ufan̄ isua 30 nte Jesus Christ ekeset ke n̄kpa.—Col. 1:23.

² Mme enyene-ifịk asan̄autom Jehovah mfịn ẹnyene ukem uduak oro—ndida eti mbụk Obio Ubọn̄ nsịm kpukpru owo oro ẹkemede. Nso ikeme ndin̄wam nnyịn iyọhọ uduak emi? Ata ediwak owo ẹnam utom uyọhọ ini inyụn̄ isiwakke ndidu ke ufọk ke ini nnyịn iwahade. Ke ini mmọ mînamke utom, ekeme ndidi mmọ ẹka isan̄, ẹdep n̄kpọ, m̀mê ẹbịne ndusụk orụk unọ idem nduọkodudu. Didie ke ẹda eti mbụk Obio Ubọn̄ ẹsịm mbon oro ẹdotde ke otu mmọ?—Matt. 10:11.

³ Ẹsikụt ndusụk mmọ ke itieutom mmọ. Idem n̄kpri obio ẹnyene ikpehe mbubehe emi ediwak owo ẹsidude ekese ini ke usen. Ke ikpọ obio, mme owo ẹnamde utom ke mme ikpehe ẹmi mme usiakifia ẹdude m̀mê ikpọ ufọk itieutom ye mbon oro ẹdụn̄de ke mme ufọk oro ẹnọde ọkpọsọn̄ ukpeme ke ẹbọ ikọ ntiense—ediwak owo ke akpa ini. Ke mme utịturua, ẹmekụt ke mbon oro ẹkesobode ke adan̄aemi ẹduọkde odudu ke mme itie inemesịt m̀mê mme itie unọ idem nduọkodudu, m̀mê ke adan̄aemi ẹbetde ke mme itie ubon moto m̀mê ke mme urua, ẹdi mbon ẹnyenede esịt akpanikọ kaban̄a eti mbụk.

⁴ Ibat mme asuanetop emi akade-ka iso ndikọri ke ẹsịn akpan ukeme ndinọ ikọ ntiense ke mme an̄wan̄wa ebiet, ke ebiet ekededi emi ẹkemede ndikụt mme owo. Ke akpa, Mme Ntiense ẹmi ẹma ẹsimen̄e ẹnyụn̄ ẹkop ndusụk udomo nyekidem ke ntak emi ẹma ẹkemehe ye ataata ido edikwọrọ ikọ, nte to ke ufọk sịm ufọk. Etie mmọ didie ke idem idahaemi?

⁵ “Enye afiak esịn odudu ke utom ukwọrọikọ mi!” ntre ke eyenete eren kiet emi enyenede mbufiọk ọdọhọ. Efen adian ete: “Enye anam mi ntịn̄ enyịn.” Asiakusụn̄ kiet emi ọsọn̄de ke isua emana ọdọhọ ete: “Enye ọnọ odudu ke n̄kan̄ eke ekikere, eke ikpọkidem, ye eke spirit, . . . ndien ami ke nsụk nnam n̄kọri.” Asuanetop kiet ọdọhọ ete ke imọ ke isịm ediwak owo idahaemi ẹmi akananam mînyeneke nneme ye Mme Ntiense Jehovah. N̄kparawa owo n̄ko ke ẹsịn idem ifịk ifịk ke inem inem utom emi. Uyen kiet etịn̄ ekikere esie ntem: “Edi n̄kpọ inemesịt koro afo eyenyene nneme ye ata ediwak owo.” Efen adian ete: “Ami ke nnịm mme n̄wed efen efen n̄kan nte akanam edide ke mbemiso!” Kpukpru emi ada itie ke efakutom emi ẹnamde utom ata ediwak ini.

⁶ Mme Esenyịn oro Ẹsan̄ade-San̄a ke Ẹda Usụn̄: Ke ẹfiọkde ẹte ke “ido ererimbot emi ke ebebe efep,” N̄ka ke ndondo emi ama ọnọ ekikere ete mme esenyịn oro ẹsan̄ade-san̄a ẹnam ukpụhọde ke ndutịm utom ukwọrọikọ mmọ ke urua ke urua man ẹkeme ndida eti mbụk nsịm ediwak owo nte ẹkekeme. (1 Cor. 7:32) Ke ediwak isua, mme esenyịn circuit ẹkesisio mme usenubọk ufọturua ẹnịm ke ndibuana ke utom eke ufọk ke ufọk, ke adan̄aemi ẹkedade mme uwemeyo ẹnam mme mfiakn̄ka ye edinịm mme ukpepn̄kpọ Bible. Ke ndusụk ebiet, ndutịm oro ekeme ndisụk nnyene ufọn. Ke mme ebiet en̄wen, ekeme ndidi ndinam utom to ke ufọk sịm ufọk ke mme usenubọk ufọturua iditịmke inyene ufọn. Ke mme utọ idaha oro, mme esenyịn oro ẹsan̄ade-san̄a ẹkeme ndibiere ke ọkpọfọn ndibuana ke utom ufọkurua sịm ufọkurua m̀mê edinọ ikọ ntiense efak ke ntọn̄ọ ntọn̄ọ usen. Mîdịghe enye ekeme ndidiomi n̄kpri otu ndinọ ikọ ntiense ke ikpọ ufọk itieutom, mme itie udep n̄kpọ, mme itie ubon moto, m̀mê mme an̄wan̄wa itie eken. Ebede ke mme asuanetop nditịm nda ini utom an̄wautom nnam n̄kpọ ke usụn̄ emi enyenede uforo, ẹyesobo ediwak owo efen efen.

⁷ Ntọt ẹwụt ẹte ke mme esenyịn oro ẹsan̄ade-san̄a ye mme asuanetop n̄ko ẹma ukpụhọde emi etieti. Ediwak otu mbiowo ẹmenọ esenyịn circuit ikot ẹte ẹnọ mme ibat ibat asuanetop ukpep ke mme ikpehe utom oro oyomde ntịn̄enyịn ke n̄kann̄kụk. Edi n̄kpọ un̄wam ọnọ mme asuanetop ẹmi ndisan̄a ye esenyịn oro asan̄ade-san̄a nte enye abuanade ke kiet ke otu utom ẹmi. Mmọ, n̄ko, ẹma ẹkeme ndinọ mbon en̄wen ukpep. (2 Tim. 2:2) Nte utịp, ẹda eti mbụk ẹsịm ediwak owo efen efen.

⁸ Nte ededi, afo unyeneke ndibet edidi esenyịn circuit man odomo ndusụk usụn̄ ukwọrọikọ en̄wen ẹmi ese. Ndusụk ekikere oro afo ekemede ndikụt ke ẹnyene ufọn ke efakutom mbufo ẹdi ẹmi:

⁹ Unọ Ikọ Ntiense Efak: ‘M̀mọ̀n̄ ke kpukpru owo ẹdu?’ nnyịn ndusụk ini imesibụp ntre nte nnyịn iwahade mme ufọkidụn̄ ẹmi mme owo ẹma ẹkewọrọ kwat kwat ke usenubọk ufọturua. Ẹkeme ndikụt ndusụk owo nte ẹkade utom ẹkedọn̄de mmọ, ẹdepde n̄kpọ, m̀mê ẹkade urua. Nte afo omodomo ndisịm mmọ ebe ke unọ ikọ ntiense efak? Ke ini ẹtịmde ẹnam, ikpehe utom enyeemi ekeme ndin̄wụm mfri etieti. Utu ke ndikama mme magazine nda itie kiet, etịm ọfọn ndikaka mbịne mme owo nnyụn̄ ntọn̄ọ ufan ufan nneme. Iyomke ẹnọ kpukpru owo ẹmi ẹbede ikọ ntiense. Nyene nneme ye mbon ẹmi mîtiehe itọk itọk, utọ nte mbon oro ẹsịnede ke moto oro ẹdade itie kiet m̀mê mme owo ẹdade ẹbet n̄kpọisan̄ ofụri owo. Ke akpa, afo emekeme n̄kukụre ndikọm owo ufan ufan onyụn̄ ebet ibọrọ. Edieke owo oro enyịmede ndinyene nneme, bụp ban̄a ekikere esie ke ibuot nneme emi afo ekerede ke ekeme ndidemede enye udọn̄.

¹⁰ Esenyịn kiet oro asan̄ade-san̄a ama ọnọ mme asuanetop itiokiet ikot ẹdisan̄a ye imọ ye n̄wan imọ ke edinọ ikọ ntiense efak. Ye mme utịp ewe? “Nnyịn ima inyene inem inem usenubọk!” ntre ke enye ọtọt. “Nnyịn ikenyeneke mfịna ke ndikụt mme owo ke ufọk. Ima inịm magazine itiaita ye ediwak tract. Nnyịn ima inyene ekese edemerede-owo-udọn̄ nneme. Kiet ke otu mme asuanetop oro, emi akabuanade ke utom efak ke akpa ini, ama ọdọhọ ete: ‘Ami mmodu ke akpanikọ ke ediwak isua n̄konyụn̄ mfiọkke se ntabade!’ Etisịm utịturua oro, ata ediwak ibat magazine emi esop ekenyenede ẹma ẹkụre.”

¹¹ Ke adan̄aemi anamde utom ke esop en̄wen, esenyịn oro asan̄ade-san̄a ama okop ete ke ibat ibat asuanetop ẹma ẹbabak ẹbuana ke unọ ikọ ntiense efak ke usenubọk kiet edi ẹkụt sụk esisịt unen. Eyenete an̄wan kiet eketịn̄ ikọ ọnọ owo iba kpọt ke ofụri ini unọ ikọ ntiense oro, sia kpukpru owo en̄wen emi enye okosobode ẹkefehede ẹka utom. Esenyịn oro asan̄ade-san̄a ama ọnọ ekikere ete kpukpru mmọ ẹfiak ẹka kpasụk efak oro ke ini ebede akan oro esisịt ke usenubọk. Mmọ ẹma ẹnam, ẹnyụn̄ ẹdu tutu uwemeyo. Eyenete an̄wan oro ekenyenede nneme ye owo iba kpọt ke mbemiso ke usenubọk ama etịm anam ọfọn akan ke ini enye akafiakde aka. Enye ama enịm magazine 31 ye ndiye uduot n̄kpri n̄wed 15, ọbọ enyịn̄ ye adres owo itiaba, onyụn̄ ọtọn̄ọ ukpepn̄kpọ Bible iba! Mbon eken ke otu oro ẹma ẹnyene mme ukem akama-nsịnudọn̄ utịp oro.

¹² Ke ini okụtde owo emi owụtde udọn̄, domo ndibọ enyịn̄, adres, ye nọmba urụk ukopikọ owo oro. Utu ke ndiyom ntọt oro nnennen nnennen, afo emekeme ndidọhọ ete: “Ami mmama nneme emi. Nte usụn̄ ekededi odu emi nnyịn ikemede ndika iso ini efen?” Mîdịghe obụp ete: “Nte usụn̄ ekededi odu emi n̄kemede ndisobo ye afo ke ufọk?” Ediwak mbon oro ẹsobode ke usụn̄ emi ẹnyịme mfiakn̄ka. Kụt ete emenyene n̄wedikot oro awakde ekem ndida nnọ mbon oro ẹmade ndidụk mme mbonoesop nnyịn ikot.

¹³ Edieke afo enyenede nneme ye owo oro enyenede udọn̄ emi odụn̄de ke efakutom emi ẹbahade ẹnọ esop efen, afo ekpenyene ndinọ ntọt oro ẹsọk mmọ man otodo nditọete do ẹkeme ndinam n̄kpọ mban̄a udọn̄ oro. Nte unọ ikọ ntiense efak ekpedi uforo uforo usụn̄ ndisuan eti mbụk ke n̄kann̄kụk mbufo? Ke edide ntre, dụn̄ọde ibuotikọ oro “Ndiyom Mbon Oro Ẹnyenede Udọn̄ ebe ke Unọ Ikọ Ntiense Efak Oro Enyenede Uforo” ke nsiondi Utom Obio Ubọn̄ Nnyịn eke July 1994. Ekem diomi ndibuana ke unọ ikọ ntiense efak ke ini oro odotde ke usen oro afo edikemede ndisịm adan̄a ediwak owo nte ekekeme.

¹⁴ Ndinọ Ikọ Ntiense ke N̄kpọisan̄ Ofụri Owo: Usenubọk kiet ediwak asiakusụn̄ ẹma ẹbiere ndinọ mme owo ẹkedade ẹbet bọs ke n̄kpet n̄kpet akamba ufọkn̄wed n̄kann̄kụk ikọ ntiense. Ke adan̄aemi mmọ ẹkenyenede inem inem nneme, mfịna ama odu. Etisịm ini emi nneme akade anyan, bọs ama edi, adade nneme oro ekesịm utịt inikiet inikiet. Mme asiakusụn̄ oro ẹma ẹkọk mfịna oro ke ndidụk bọs nnyụn̄ n̄ka iso ndinọ mme akaisan̄ oro ikọ ntiense nte mmọ ẹnamde isan̄ ẹbe ke obio. Ke ẹsịmde utịt isan̄ oro, mme asiakusụn̄ oro ẹyefiak ẹdụk bọs ẹnyọn̄, ẹnọde ikọ ntiense nte mmọ ẹkade. Ke ẹma ẹkenam isan̄ ẹka iso ẹfiak edem ke ediwak ini, mmọ ẹma ẹtan̄ mme utịp ukeme oro mmọ ẹkesịnde ẹdian: Ẹma ẹnịm se ibede magazine 200 ẹnyụn̄ ẹtọn̄ọ ukpepn̄kpọ Bible itiokiet. Ndusụk mme akaisan̄ ẹma ẹnọ mme adres ye nọmba urụk ukopikọ mmọ unyịme unyịme man ẹkeme ndika n̄kese mmọ ke ufọk. Ke urua eketienede, mme asiakusụn̄ oro ẹma ẹfiak ẹka itie mbehe bọs oro ẹnyụn̄ ẹnam kpa nte ẹkenamde ke akpa. Mmọ ẹma ẹnịm magazine 164 ẹnyụn̄ ẹtọn̄ọ ukpepn̄kpọ Bible kiet efen. Ke itie mbehe kiet akaisan̄ ama odụk bọs onyụn̄ etie ke n̄kukụre n̄kpọitie oro okosụhọde—ekpere asiakusụn̄. Enye ama ese eyenete oro onyụn̄ ọdọhọ ye inua imam ete: “Mmọdiọn̄ọ, afo emenyene Enyọn̄-Ukpeme ndinọ mi.”

¹⁵ Ediwak mme asuanetop ẹsinọ ikọ ntiense oro enyenede uforo ke adan̄aemi ẹkade isan̄ ke bọs, tren, m̀mê ke ubomofụm. Didie ke afo ekeme nditọn̄ọ nneme ye akaisan̄ oro etiede ekpere fi? Asuanetop isua 12 n̄kukụre ọkọtọn̄ọ ndikot Awake! ke bọs, odoride enyịn ndidemede udọn̄ ekpri eyenan̄wan emi eketiede ekpere enye. Emi ama enyene ufọn. Eyenan̄wan oro ama obụp enye se enye okokotde, ndien uyen oro ama ọbọrọ ete ke imọ ikot iban̄a usọbọ ke mme mfịna oro n̄kparawa ẹsobode. Enye ama adian do ete ke imọ ima inen̄ede ibọ ufọn ito ibuotikọ oro ye nte ke ekeme ndin̄wam enye n̄ko. Enye ama ọbọ magazine oro ke idatesịt. Uyen iba en̄wen ẹma ẹtie ẹkop nneme oro ẹnyụn̄ ẹdọhọ ẹnọ mmimọ magazine oro. Mi, awat o-moto ama atuak ada ke mbenusụn̄ onyụn̄ obụp ntak emi ẹnyenede ọkpọsọn̄ udọn̄ ntre ke mme magazine ẹmi. Ke ini ekedifiọkde, enye n̄ko ama ọbọ mmọ. Nte ededi, baba kiet ke otu emi ikpeketịbeke edieke ekpri asuanetop oro mîkpekenyeneke magazine oro ekemde ndibuana ye kpukpru owo ẹmi ẹkewụtde udọn̄!

¹⁶ Ndinọ Ikọ Ntiense ke Mme Itie Inemesịt ye Itie Ubon Moto: Ndinọ ikọ ntiense ke mme itie inemesịt ye itie ubon moto edi ata eti usụn̄ ndisịm mme owo. Ndi afo omodomo ndinọ ikọ ntiense ke itie ubon moto akwa ufọkurua? Kpukpru ini da esisịt ini se n̄kann̄kụk mbufo. Yom owo emi mîtiehe itọk itọk m̀mê emi ebetde ke moto oro adade ebiet kiet nyụn̄ domo nditọn̄ọ ufan ufan nneme. Edieke nneme oro akade iso, da etop Obio Ubọn̄ disịn. Domo ndisan̄a ikpọn̄ edi ye asuanetop efen odude ekpere. Fep ndikama akamba, ndodobi ekpat m̀mê ke mme usụn̄ en̄wen ndidụri ntịn̄enyịn nnọ utom oro anamde. Nyene ọniọn̄. Ekeme nditịm mfọn ndibiat esisịt ini kpọt ke itie ubon moto kiet ndien ekem ebe aka en̄wen. Edieke owo mînyịmeke ndinyene nneme ye afo, daha sụn̄sụn̄ nyụn̄ yom owo en̄wen ka bịne. Ke adade mme usụn̄ ẹmi, eyenete kiet ama enịm magazine 90 ke ọfiọn̄ kiet ke adan̄aemi ọkọnọde ikọ ntiense ke mme itie ubon moto.

¹⁷ Ndusụk owo ẹsika itie inemesịt ndiduọk odudu; mbon en̄wen ẹsika do ndibre mbre m̀mê ndidu ye nditọ mmọ. Yom ifet ndinọ ikọ ntiense, ye unana edisịbe ndụk mme edinam mmọ nte mîdotke. Eyenete eren kiet ama enyene nneme ye ekpeme itie inemesịt onyụn̄ okụt ke enye ama ekere aban̄a n̄kpọsọn̄ ibọk ye ini iso nditọ esie. Ẹma ẹtọn̄ọ ukpepn̄kpọ Bible ẹnyụn̄ ẹsinịm kpukpru ini ke itie inemesịt oro.

¹⁸ Ndinọ Ikọ Ntiense ke Mme Urua: Ke ini ọkọmde owo, tọn̄ọ nneme ke ido ufan. Edieke owo emi akpan̄de utọn̄ enyịmede, bụp enye mbụme, ekem tịm nọ n̄kpan̄utọn̄ nte enye etịn̄de ekikere esie. Nyene ọkpọkpọ udọn̄ ke se enye etịn̄de. Wụt ete ke amabat ekikere esie ke akpan n̄kpọ. Nyịme ye enye ke ebiet ekemede.

¹⁹ Eyenete an̄wan kiet ama enyene inem inem nneme ye akanian̄wan kiet ebe ke nditịn̄ nte ekọmurua n̄kpọ uduuwem ọsọn̄de. N̄wan oro ama ọsọsọp enyịme, ndien ama ada okosụn̄ọ ke enyene-uwem nneme. Eyenete an̄wan emi ama ekeme ndibọ enyịn̄ ye adres an̄wan emi, onyụn̄ anam mfiakn̄ka kpasụk ke urua oro.

²⁰ Ndinam Utom to ke Ufọkurua Sịm Ufọkurua: Ndusụk esop ẹnyene mme ikpehe mbubehe nte ubak efakutom oro ẹnọde mmọ. Eyenete oro esede aban̄a efakutom ekeme nditịm san̄asan̄a kad ndise efakutom nnọ mme ikpehe mbubehe ẹmi mme owo ẹwakde etieti. Ẹkpenyene ndiwụt in̄wan̄în̄wan̄ ke mme kad ndise efakutom ufọkidụn̄ ekededi ẹmi ẹbede ẹdụk mmọ nte ke owo inyeneke ndinam utom ke mme ikpehe mbubehe nte ubak efakutom oro. Ke mme efakutom eken, ẹkeme ndinam utom ke mme itie mbubehe ke adianade ye mme ufọkidụn̄. Mbiowo ẹkeme ndinọ mme asuanetop ẹdotde ikot ndinam utom ke mme efakutom mbubehe kpukpru ini man otodo owo okûfụmi utom eke ufọkurua sịm ufọkurua.

²¹ Edieke ẹnọde fi ikot ndibuana ke utom emi ndien akanam afo unamke, eti usụn̄ ‘ndinyene uko’ edi ndinam utom ke ibat ibat n̄kpri ufọkurua kan̄a; ekem, ke ini enen̄ede enyene uko, anam utom ke ikpọ oro. (1 Thess. 2:2) Ke ini anamde utom to ke ufọkurua sịm ufọkurua, sịne n̄kpọ nte ekpesịnede ke ini odụkde mbonoesop ke Ufọkmbono Obio Ubọn̄. Edieke ekemede, dụk ufọkurua ke ini mbonurua ndomokiet mîdụhe. Dọhọ ke iyom ndinyene nneme ye etubom utom m̀mê owo emi esede enyịn. Tie ufan ufan, ndien ke akande kpukpru, nam ibio ibio. Ufọn idụhe ndinam nte n̄kpọ ekpede-kpe owo ubọk. Ediwak mbubehe ẹdi mbon oro ẹnyenede mbonurua kpukpru ini ndien ẹdori enyịn mme owo ndisịbe ndụk.

²² Ke ama ọkọkọm anyam ufọkurua afo emekeme ndidọhọ ntem: “Mme anam mbubehe ẹsinyene mme ndutịm ofụri ini tutu eyedi ọkpọsọn̄ n̄kpọ ndikụt mmọ ke ufọk, ntre nnyịn idi mi ke itie mbubehe fo man inọ fi ibuotikọ emi enen̄ede anam owo ekere n̄kpọ ite okot.” Ekem tịn̄ n̄kpọ kiet m̀mê iba ban̄a magazine oro ọnọde.

²³ Mîdịghe afo emekeme ndidomo emi ke ini akade ebịne etubom utom: “Nnyịn imokụt ke mme anam mbubehe ẹsidomo nditịm nnyene ifiọk. Nsiondi Enyọn̄-Ukpeme (m̀mê Awake!) eke ndondo emi esịne ibuotikọ oro otụkde kpukpru nnyịn ọkpọkpọ.” Nam an̄wan̄a se emi edide, nyụn̄ beri ke ndidọhọ ete: “Nnyịn imenịm ite ke afo ayama ndikot enye.” Ekem nọ ke etịbe oro ẹsinọde.

²⁴ Edieke mbonutom ẹdude, ndien etie nte odot, afo emekeme ndidian do ete: “Nte afo akpama nnyene ukem ibio nneme emi ye mbonutom fo?” Edieke ọnọde unyịme, ti ete ke ama ọdọhọ ke ayanam edi ibio ibio, ndien etubom utom oyodori enyịn afo ndinam ikọ fo. Edieke mbonutom ekededi ẹyomde ndineme anyan nneme, ekpetịm ọfọn ndika mbịne mmọ ke ufọk mmọ.

²⁵ Ke ndondo emi, ibat ibat asuanetop ke ekpri obio kiet ẹma ẹsan̄a ye esenyịn circuit ke utom ufọkurua sịm ufọkurua. Ndusụk asuanetop ẹma ẹkop ndịk ke akpa, sia akananam mînamke utom oro; edi ikebịghike mmọ ẹma ẹkop idem ẹnyụn̄ ẹtọn̄ọ ndikop inem esie. Ke se isụhọde ikan hour kiet, mmọ ẹma ẹnyene nneme ye owo 37 ẹnyụn̄ ẹnịm magazine 24 ye ndiye uduot n̄kpri n̄wed 4. Eyenete eren kiet ama ọdọhọ ke nte ido edide mmimọ ikpekemeke ndisobo utọ ediwak owo oro ke utom eke ufọk ke ufọk oro ẹnamde ke ọfiọn̄ kiet nte mmimọ ikosobode ke adan̄aemi inamde utom to ke ufọkurua sịm ufọkurua ke esisịt ini oro.

²⁶ Ndinam Mme Ifet Ndikwọrọ Ikọ Ẹdu: Jesus ikọnọhọ ikọ ntiense ke nnennen usụn̄ kpọt. Enye ama esisuan eti mbụk ke kpukpru idaha oro ẹdotde. (Matt. 9:9; Luke 19:1-10; John 4:6-15) Tịm fiọk nte ndusụk asuanetop ẹnamde mme ifet ndikwọrọ ikọ ẹdu.

²⁷ Ndusụk owo ẹnam edi ido mmọ ndinọ mme ete ye eka ẹmi ẹdade ẹbet nditọ mmọ ẹkpere inuaotop ufọkn̄wed ikọ ntiense. Sia ediwak ete ye eka ẹsidide ẹdisịm n̄kpọ nte minit 20 mbemiso, ini odu ndibuan mmọ ke edemede-owo-udọn̄ nneme ke ibuotikọ N̄wed Abasi.

²⁸ Ediwak asiakusụn̄ ẹsidu ke edidemede man ẹsịm mme owo ẹnyenede san̄asan̄a udọn̄ ke akpan ibuot nneme oro ẹnemede ke mme magazine nnyịn. Ke uwụtn̄kpọ, eyenete an̄wan kiet ama enyene nti utịp ke ndida udịm udịm ibuotikọ oro “Schools in Crisis” (Ufọkn̄wed ke Afanikọn̄), ẹmi ẹkedude ke Awake! eke December 22, 1995, n̄waha ufọkn̄wed itiokiet ke efakutom esop mmọ. Enye n̄ko ama esida mme magazine ẹmi ẹnemede ẹban̄a uwem ubon ye edisabade eyenọwọn̄ aka ebịne mme itieutom ẹsede n̄kpọ ẹban̄a ubon ẹnyụn̄ ẹdọhọ enye esida mme nsiondi ẹnemede n̄kpọ ke ukem ibuotikọ oro edi kpukpru ini ke ini iso. Ẹketịn̄ ẹban̄a usụn̄ emi ẹkenamde n̄kpọ ẹban̄a Awake! eke March 8, 1996, aban̄ade unana utom ke itieutom esede n̄kpọ aban̄a mbon unana utom nte “n̄kpọ oro akakde owo uyo.”

²⁹ Esenyịn district ama ọtọt ete ke imọ ye n̄wan imọ imesikwọrọ ikọ ke ido nneme kpukpru ini ke adan̄aemi mmimọ idepde n̄kpọudia. Mmọ ẹsidep n̄kpọ ke ini owo mîwakke ikaha ke ufọkurua, mbonurua ẹnyụn̄ ẹsan̄ade eyen eyen ke usụn̄ uka ye unyọn̄. Mmọ ẹtọt ediwak nti nneme.

³⁰ Ke ndusụk itie, mme asuanetop oro ẹsatde-sat ke ẹnọ odudu ndinọ ikọ ntiense ke mme an̄wambehe ubomofụm. Ndusụk ini mmọ ẹsikop idatesịt ndinọ mme akaisan̄ ẹtode idụt efen ẹmi ẹdụn̄ọde ke mme idụt oro ikọt Jehovah mîwakke ke ibat ikọ ntiense. Ke ebiet emi ẹkụtde udọn̄, mmọ ẹnọ tract m̀mê mme magazine.

³¹ Edieke owo mînyịmeke ẹnọ mme andidụn̄ ke ufọk oro ẹnọde ọkpọsọn̄ ukpeme m̀mê mme okụre ke efakutom esop mbufo ikọ ntiense, ndusụk owo ẹmenam edi ido ndida mbufiọk nnọ mbon ukpeme oro ẹdude ke utom m̀mê mme etubom utom ke itieutom ubọ ufọk ikọ ntiense. Ukem usụn̄ oro ke ẹda ẹnam n̄kpọ ke mme ọkpọkpọ okụre oro ẹnyenede inuaotop. Esenyịn circuit ye mme asuanetop ifan̄ ẹma ẹka okụre itiaba ke ukem usụn̄ emi. Ke idaha kiet kiet, mmọ ẹma ẹsian etubom utom ẹte okposụkedi owo mînyịmeke mmimọ iwaha ufọk ẹmi nte mmimọ isinamde, mmimọ iyomke enye ataba ntọt oro odude ke nsiondi magazine eke ndondo emi. Mme etubom utom ke ofụri okụre itiaba oro ẹma ẹkop idatesịt ndibọ mme magazine ẹnyụn̄ ẹyom mme nsiondi en̄wen n̄ko! Ekem ẹsobo mme andidụn̄ orụk ufọk oro ke urụk ukopikọ.

³² Sịn̄ede Idem Man Ọkwọrọ Ikọ ke Kpukpru Ebiet: Ndidu uwem ekekem ye uyakidem nnyịn esịne edinyene nte ini edide usọp usọp ke ekikere kaban̄a utom oro ẹnọde nnyịn ndikwọrọ etop Obio Ubọn̄. Man ikeme ndisịm mme owo ke ini ọfọnde ye mmọ, nnyịn inyene ndikpọnọde mme n̄kpọ oro imade ọkpọkpọ inịm man otodo ‘ikpekeme ndinyan̄a ndusụk mmọ.’ Kpukpru mme asan̄autom Jehovah ẹmi ẹyakde idem ẹnọ ẹyom ndikeme ndidọhọ, nte apostle Paul ọkọdọhọde ete: “Nanam kpukpru n̄kpọ kaban̄a gospel, man ami nde nnyene udeme ke esịt.”—1 Cor. 9:22, 23.

³³ Paul ama aka iso ewet ete: “Ntre ke adat mi esịt etieti ndinam mbụre ke mmemidem mi, man odudu Christ odoro ofụk mi. . . . Koro ke adan̄aemi idem ememde mi, adan̄aoro ke ntịm nnyene nsọn̄idem.” (2 Cor. 12:9, 10) Ke ikọ efen, idụhe owo nnyịn emi ekemede ndinam utom emi ke odudu idem esie. Oyom nnyịn ibọn̄ akam inọ Jehovah iyom okopodudu edisana spirit esie. Edieke ibọn̄de akam inọ Abasi iyom ukeme, nnyịn imekeme ndinịm ke akpanikọ nte ke enye eyeyere akam nnyịn. Ndien ima oro inyenede inọ mme owo oyonụk nnyịn ndiyom mme ifet ndikwọrọ eti mbụk nnọ mmọ, ke ebiet ekededi emi ẹkemede ndikụt mmọ. Ke urua emi edide, ntak mûdomoke kiet ke otu ekikere ẹnọde ke esịne-esịt emi use?