Ekebe Mbụme
◼ Ntak emi ikpọtọtde utom an̄wautom nnyịn ke ini ikaba kpukpru ọfiọn̄?
Kpukpru nnyịn imesikop idatesịt ke ini ikopde iban̄a nti n̄kpọ oro ẹnamde ke ndikwọrọ etop Obio Ubọn̄. (Se Mme N̄ke 25:25.) Utom 2:41 ọtọt ete ke Peter ama ọkọnọ edemede-owo-udọn̄ utịn̄ikọ ke usen Pentecost, “adan̄a nte thousand owo ita ẹdiana ye mmọ.” Esisịt ini ke ukperedem, ibat oro ama ọkọri “ekpere ndisịm thousand owo ition.” (Utom 4:4) Anaedi ibatutom oro ekedemede udọn̄ mme Christian akpa isua ikie didie ntem! Nnyịn isinam n̄kpọ ke ukem usụn̄ oro mfịn iban̄a mme akama-nsịnudọn̄ ibatutom. Nnyịn imesikop nduaidem iban̄a unen oro nditọete nnyịn ẹnyenede ke ndikwọrọ eti mbụk ke ofụri ererimbot.
Sia ekese ini ye ukeme ẹbuanade ke ndidian mme utọ ibatutom ẹmi, edi akpan n̄kpọ kpukpru asuanetop Obio Ubọn̄ ndidiana kiet. Ndi afo emesikpeme ndinọ ibatutom fo ikaba ke ini kpukpru ọfiọn̄?
Ntọt aban̄ade n̄kọri esida akwa idatesịt ọsọk nnyịn. Adianade do, ibatutom an̄wam N̄ka ndikpeme n̄kọri utom ofụri ererimbot. Ẹnyene ndinam ubiere kaban̄a ebiet ẹkemede ndiyom un̄wam efen efen m̀mê orụk ye udomo n̄wed oro ẹdisiode. Mbiowo ke esop kiet kiet ẹsida ibatutom an̄wautom ndibiere ebiet emi ẹkemede ndinam n̄kọri. Nti ibatutom ẹdi se ibọpde-bọp, ẹdemerede kpukpru nnyịn ndidụn̄ọde utom idem nnyịn kaban̄a n̄kọri oro ikemede ndinam.
Oyom kpukpru asuanetop ẹfiọk ọkpọkpọ mbiomo mmọ ke ndinọ ibatutom an̄wautom ke ini ikaba ke ọfiọn̄. Mme ada Ukpepn̄kpọ N̄wedesop ẹdu ke eti idaha nditi mme asuanetop mban̄a mbiomo emi, sia mmọ n̄ko ẹdude ke edidemede ndinọ mbon ẹmi ẹkemede ndinyene ndusụk mfịna ke ndibuana ofụri ini ke utom an̄wautom kpukpru ọfiọn̄ ọkpọkpọ un̄wam. Ẹkeme ndinọ editi emi ke akpatre ukpepn̄kpọ n̄wedesop ke ọfiọn̄ m̀mê ke ini efen oro odotde. Edieke ifet mîdụhe ndinọ ibatutom an̄wautom ke Ufọkmbono Obio Ubọn̄, ada Ukpepn̄kpọ N̄wedesop ekeme ndibọ mmọ onyụn̄ okụt ete ke ẹnọ ewetn̄wed emi nte ini akade edisịnde ke ibatutom ofụri ini esop eke ọfiọn̄ ke ọfiọn̄ emi ẹnọde ẹsọk N̄ka.
Nsịnifịk nnyịn ke nditọt utom an̄wautom nnyịn ke ini kpukpru ini anam mbiomo efere ọnọ mbon ẹmi ẹsede ẹban̄a mfọnọn̄kpọ eke spirit nnyịn.