Ukpụhọ Ibọkusọbọ Oro Iyịp Mîsịneke
1 Nte Mme Kọmiti Unyene Nneme ye Mbon Ufọkibọk ẹsobode ye mme dọkta ye ufọkibọk ke ibuot Mme Ntiense Jehovah ke Nigeria ndinọ mmọ ukpep ke edida ukpụhọ ibọkusọbọ oro iyịp mîsịneke, ediwak dọkta ye mme asiak-owo-idem ẹnyịme idahaemi ndinọ nditọete nnyịn iren ye iban usọbọ ye unana edikịm iyịp nsịn ke idem. Nnyịn ke akpanikọ imowụt esịtekọm ke edidiọn̄ emi otode Jehovah mi. Se ibede mme utọ mbiausọbọ oro 800 ẹmi ẹnyịmede ẹdu ke Nigeria.
2 Ke ama okosobo ye Kọmiti Unyene Nneme ye Mbon Ufọkibọk, dọkta kiet ke Kaduna ama etịn̄ aban̄a ndutịm oro ete: “Eti ekikere. Mme andibuana ndikama Advance Medical Directive anam n̄kpọ emem ọnọ kpukpru nnyịn [owo udọn̄ọ/dọkta].” Owo en̄wen otode Rivers State ọkọdọhọ ete: “Mmadara ukeme oro ẹsịnde ke ubịnikọt edinam owo enyene ifiọk aban̄a [unana edida] iyịp ke ndinọ mbon udọn̄ọ usọbọ ke mme ufọkibọk nnyịn.” Dọkta kiet ke Ogun State ọkọdọhọ ete: Ndutịm emi enen̄ede esịne ifiọk. Ẹyak enye aka iso. Ẹsọsọn̄ọ.” Owo en̄wen ke Kwara State ọkọdọhọ ete: “Kpukpru mbon udọn̄ọ ẹnyene unen ndibiere se mmọ ẹyomde nte mfọnn̄kan orụk usọbọ, ndien edi utom abiausọbọ ekededi emi enyenede eti ibuot ndikere mban̄a nnanenyịn owo udọn̄ọ esie nnyụn̄ nnam kpukpru n̄kpọ emi ẹkemede man owo udọn̄ọ oro odu uwem ye unana edikan̄ idaha ido ukpono esie.” Mme ikọ ẹmi ẹnọ nnyịn nsịnudọn̄, nte mmọ inọhọ?
3 Nte ededi, mme andibuana ke Kọmiti Unyene Nneme ye Mbon Ufọkibọk kpukpru ini ẹsida mme etop ẹtode mme dọkta ye nurse ẹnyọn̄ ẹdi. Mmọ ẹdọhọ ke mme dọkta ẹsiseme ẹte ke nnyịn isisianke mmimọ ke akpa edisobo m̀mê ke ini ẹnọde usọbọ nte ke owo udọn̄ọ oro edi Ntiense ye nte ke owo inyeneke ndida iyịp ke usọbọ m̀mê ke usiakidem emi. Mbon en̄wen ẹdọhọ ke nnyịn isidaha n̄wed Advance Medical Directive/Release idi emi ẹdade ẹdiọn̄ọ nnyịn nte Mme Ntiense, mbak mmimọ idinọ nnyịn iyịp ke unana edidiọn̄ọ. Ndien ndusụk ufọkibọk ẹsiseme ke nnyịn isitịmke ibak idi ufọkibọk. Nnyịn isibet tutu idaha ọsọn̄ akan se ẹsede ẹban̄a. Nditọete, ẹma ẹnen̄ede ẹneme ẹban̄a mme n̄kpọ ẹmi ke leta nnyịn eke February 1, 1995, emi ẹkenọde ẹsọk kpukpru esop ye ke esịne-esịt Utom Obio Ubọn̄ Nnyịn eke August 1994. Nnyịn ida mme mfịna isọk idem nnyịn ye mme ufọkibọk ke ini nnyịn mîtieneke mme ido unam n̄kpọ oro ẹwụtde. Nnyịn ifiak imen mme n̄kpọ ẹmi iwụt mbufo ‘ndidemede mbufo ke editi ikọ.’—2 Pet. 3:1.
4 Ndondo oro osobode mfịna iyịp ke ufọkibọk, tịn̄ usọp usọp nọ mbiowo n̄kann̄kụk mbufo ẹmi ẹditịn̄de ẹnọ Kọmiti Unyene Nneme ye Mbon Ufọkibọk. Mmọ ẹyen̄wam fi nditịn̄ ikọ ye dọkta fo mban̄a se ẹdinamde ye unana edida iyịp.