Akamba Usụn̄ Ndinam Utom Eberede
1 Nte ifịk ifịk andikwọrọ eti mbụk, Paul ama odụn̄ọde ye ọkpọsọn̄ udọn̄ oyom mme efakutom ẹmi udọn̄ okokponde akan, emi kiet ekedide obio Ephesus. Enye ama enen̄ede okụt unen ke ndikwọrọ ikọ do tutu enye ekewet ọnọ ekemmọ mme Christian ete: “Ẹma ẹberede usụn̄ akamba ẹnọ mi ndinam akwa utom do.” (1 Cor. 16:9) Paul ama aka iso ndinam utom ke efakutom oro onyụn̄ an̄wam ediwak mbon Ephesus ẹkabade ẹdi mme andinịm ke akpanikọ.—Utom 19:1-20, 26.
2 Mfịn, akamba usụn̄ adade esịm utom emeberede ọnọ nnyịn. Ẹnọ nnyịn ikot ndin̄wam mme esop oro mîkemeke ndinam utom mfọn mfọn ke kpukpru efakutom mmọ ke isua kiet kiet. Ke ntem mme ukeme nnyịn ẹkeme ndise mban̄a udọn̄ oro odude ke ndusụk ebiet.—Men 2 Corinth 8:13-15 domo.
3 Nte Afo Emekeme Ndinam Utom ke Ebiet Udọn̄ Okponde Akan? Nte afo emekere ke akam aban̄a m̀mê afo emekeme ndinam utom ke ebiet en̄wen? Afo emekeme ndin̄wam esop ke obio mbufo. Ntak mûnemeke ye esenyịn circuit uban̄a n̄kpọ emi unyụn̄ ukụt ekikere emi enye edinọde? Mîdịghe ekeme ndidi nte ke ediwak ibat owo ẹmi ẹdide inan m̀mê ẹsemde usem esenidụt emi owo ndomokiet mîkemeke ndise mban̄a ẹdu ke efakutom esop mbufo. Man ẹyụhọ udọn̄ emi, nte afo emekeme ndisịn idem ndikpep usem mmọ? N̄ko-n̄ko, eyedi otu m̀mê esop emi esemde usem en̄wen odu ekpere emi ‘eben̄ede Enyene-idọk ete ọnọ mme anamutom Obio Ubọn̄ efen efen.’ (Matt. 9:37, 38) Ke edide ntre, nte afo emekeme ndin̄wam?
4 Ke mme iduọk isua ndondo emi, mme ubon Christian ke mme itie tọsịn ẹmewọrọ ẹka mme idụt efen man ẹkenyene ọyọhọ ebuana ke utom idọk. Ebe ye n̄wan oro ẹkenamde emi ẹkedọhọ ẹte: “Nnyịn ikoyom ndinam n̄kpọ Jehovah ke ebiet emi nnyịn ikemede ndinen̄ede nnọ un̄wam.” Edieke afo enyenede udọn̄ emi onyụn̄ okụtde ke imekeme ndiwọrọ n̄ka ebiet efen ke idụt emi mîdịghe edieke odotde ndinam utom ke idụt efen, bem iso neme uduak fo ye mbiowo esop mbufo.
5 Edieke afo amade ndibụp N̄ka mban̄a ebiet emi udọn̄ odude, nọ Kọmiti Utom Esop leta owụtde akpan udọn̄ fo. Mmọ ẹyewet se mmọ ẹtịn̄de ẹdian ẹnyụn̄ ẹnọ ẹsọk N̄ka. Ke idaha ekededi, adan̄a nte akamba usụn̄ ndinam utom osụk anade in̄wan̄, kpukpru nnyịn ikpakam ika iso ndisịn idem ke utom Jehovah.—1 Cor. 15:58.