Sịm Mme Nsan̄a Oro Mîdịghe Ntiense
1 Edi n̄kpọ akwa idatesịt ke ini mme ọdọ ndọ ẹdianade kiet ke utuakibuot akpanikọ. Nte ededi, ke ediwak ubon kiet kpọt ke otu nsan̄andọ enyịme usụn̄ akpanikọ. Didie ke nnyịn ikeme ndisịm mme nsan̄a oro mîdịghe Ntiense nnyụn̄ nsịn udọn̄ nnọ mmọ ndidiana ye nnyịn ntuak ibuot nnọ Jehovah?—1 Tim. 2:1-4.
2 Fiọk Ekikere Mmọ: Okposụkedi ndusụk nsan̄a oro mîdịghe Ntiense ẹkemede ndibiọn̄ọ, ekese ini mfịna esito unana udọn̄ m̀mê ukwan̄ ifiọk. Owo ekeme ndikere ke ẹfụmi imọ mîdịghe efịbe ufụp aban̄a obufa udọn̄ eke spirit nsan̄a esie. “Ke ndude ikpọn̄ ke ufọk, mma nsikere ke ẹsịn mi,” ntre ke ebe kiet eti. “Ekesitie mi ke idem nte n̄kpọ eke n̄wan ye nditọ mi ẹkewọrọde ẹkpọn̄ mi,” ntre ke owo efen ọdọhọ. Ndusụk irenowo ẹkeme ndikere nte ke ido ukpono ọbọ mmimọ ubon ada. (Se Enyọn̄-Ukpeme, August 15, 1990, page 20-23.) Ntak edi oro etịmde ọfọn, ke ẹkemede, ndibuan ebe ye n̄wan esie ke ndutịm ukpepn̄kpọ Bible toto ke ntọn̄ọ.
3 Ẹnam Utom nte Otu: Ebe ye n̄wan ẹdide Mme Ntiense ẹma ẹnen̄ede ẹnam utom ọtọkiet ke ndin̄wam mme ọdọ ndọ ẹdụk akpanikọ. Ke eyenete an̄wan oro ama ọkọtọn̄ọ ukpepn̄kpọ ye n̄wanndọ oro, eyenete eren oro ama esika ekese ebe. Ediwak ini enye ama esikeme nditọn̄ọ ukpepn̄kpọ ye ebe.
4 Tie Ufan Ufan Nyụn̄ Tat Ubọk: Mme ubon ke esop ẹkeme ndin̄wam ebe ke ndinyene udọn̄ ke mme ubon oro mîdianake kiet kan̄a ke utuakibuot akpanikọ. Ediwaha ikafan̄ n̄kese ekeme ndin̄wam nsan̄a oro mîdịghe Ntiense okụt Mme Ntiense Jehovah nte mme Christian ẹmi ẹtiede ufan ufan, ẹkerede ẹban̄a, ẹmi ẹnyenede mfọnn̄kan udọn̄ kpukpru owo ke esịt.
5 Ke ini ke ini, mbiowo ẹkeme ndidụn̄ọde mme ukeme eke ndondo emi oro ẹsịnde ke ndisịm mme nsan̄a oro mîdịghe Ntiense ẹnyụn̄ ẹbiere n̄kpọ efen efen oro ẹkemede ndinam ye idotenyịn edida mmọ nsọk Jehovah.—1 Pet. 3:1, ikọ idakisọn̄, NW.