Nditọ—Mbufo Ẹdi Idatesịt Nnyịn!
1 N̄kparawa iren ye iban, nte mbufo ẹmemehe ye ewụhọ Jehovah oro nte yak ẹsịn mbufo ke mme edinam esop? (Deut. 31:12; Ps. 127:3) Edi n̄kpọ idatesịt ndinyene mbufo ke n̄kan̄ nnyịn nte nnyịn ituakde ibuot inọ Jehovah ọtọkiet! Mbufo ẹmesidat nnyịn esịt ke ini mbufo ẹtiede sụn̄ ke mme mbonoesop ẹnyụn̄ ẹtịmde ẹkpan̄ utọn̄. Esinen̄ede enem nnyịn esịt ke ini mbufo ẹdomode ndinọ ibọrọ ke mme ikọ idem mbufo. Ofụri esop ẹsidat esịt ke ini mbufo ẹnamde ikpehe oro ẹkenọde mbufo ke Ufọkn̄wed Utom Ukara Abasi, ke mbufo ẹdianade ye nnyịn ifịk ifịk ke utom an̄wautom, ye ke ini nnyịn ikopde ite ke mbufo ẹmenọ mme nsan̄a ufọkn̄wed ye mme andikpep mbufo ikọ ntiense uko uko.—Ps. 148:12, 13.
2 Nnyịn iyom mbufo ẹdiọn̄ọ ẹte ke nnyịn imesida mbufo itan̄ ase ke ini nnyịn ikụtde nti edu mbufo, usanaidem mbufo, edisana edu uwem mbufo, ye ukpono emi mbufo ẹnyenede ẹnọ ikpọ owo. Idatesịt nnyịn enen̄ede okpon ke ini mbufo ẹwụtde nte ke mbufo ke ‘ẹti Andibot mbufo’ ebe ke ndinịm mme utịtmbuba ukara Abasi nnọ idem mbufo.—Eccl. 12:1; Ps. 110:3.
3 Ẹsian Nnyịn Mme Utịtmbuba Mbufo: Ekpri eyeneren kiet edide isua itiaita ọkọdọhọ esenyịn district ete: ‘Akpa nyama ndina baptism, ekem nyama ndin̄wam ke esop ke ndinam utom ye ndutịm ukwak utịn̄ikọ ye ke ndikama ukwak utịn̄ikọ, ndidi adaidaha, ndin̄wam ye mme n̄wed, ndikot n̄wed ke mme ukpepn̄kpọ n̄wed ye ke Mme Ukpepn̄kpọ Enyọn̄-Ukpeme. Ndien nyama ndidi asan̄autom unamutom, ekem ebiowo. Nyonyụn̄ mma ndidi asiakusụn̄ n̄ko nnyụn̄ n̄ka ufọkn̄wed usiakusụn̄. Ekem nyama ndika Bethel, ndidi esenyịn circuit m̀mê esenyịn district.’ Nso eti esịtekọm ke enye okowụt ntem ke ifet edinam n̄kpọ Abasi!
4 Nte mbufo ẹnamde n̄kọri ke n̄kan̄ eke ikpọkidem ye ke n̄kan̄ eke spirit, nnyịn imenem esịt ndikụt mbufo ẹsịmde mme utịtmbuba mbufo. (Men Luke 2:52 domo.) Isua kiet kiet, ediwak tọsịn mbufo ẹmesikabade ẹdi mme asuanetop oro mînaha baptism ndien ekem ẹdot ndina baptism nte mme asan̄autom Jehovah oro ẹyakde idem ẹnọ. Idatesịt nnyịn esikọri ke ini nnyịn ikụtde n̄ko nte mbufo ẹnyanarede ẹbịne usiakusụn̄ unọ un̄wam idem ẹdụkde utom uyọhọ ini. Ke akpanikọ, nditọ, mbufo ẹdi idatesịt nnyịn ye utịbe utịbe ebiet emi itoro Ete nnyịn eke heaven otode. Jehovah akpakam ọdiọn̄ mbufo uwak uwak!—N̄ke 23:24, 25.