Ekebe Mbụme
◼ Ntak ikpọnọde san̄asan̄a ntịn̄enyịn ke usịnen̄kpọ ye ukamaidem nnyịn ke adan̄aemi ikade ndise mme itie utom N̄ka ke Brooklyn, Patterson, ye Wallkill, New York, ye mme ọfis n̄kọk itieutom ke ofụri ererimbot?
Ẹdori enyịn mme Christian ndisọn̄ọ mmụm nnennen eti edu n̄kama. Kpukpru ini usịnen̄kpọ ye ukamaidem nnyịn ẹkpenyene ndiwụt uyai ye uku oro odotde mme asan̄autom Jehovah Abasi. Emi enen̄ede edi ntre ke ini ikade ikese mme itie utom N̄ka ke New York ye ke mme n̄kọk itieutom ke ererimbot.
Ke 1998, ẹyenịm mme mbono district ye ikpọ mbono ofụri ererimbot. Ediwak tọsịn nditọete nnyịn ke ediwak ikpehe isọn̄ ẹyeka ẹkese ibuot itieutom N̄ka ke New York ọkọrọ ye mme n̄kọk itieutom ke mme idụt en̄wen. Idịghe sụk ke ini ikade ikese mme itieutom ẹmi edi n̄ko ke ini efen ekededi, oyom nnyịn ‘ke kpukpru usụn̄ iwụt ite ke idi ata mme asan̄autom Abasi,’ esịnede ọfọn̄ ye ukamaidem nnyịn oro odotde.—2 Cor. 6:3, 4.
Ke enemede ufọn nnennen usịnen̄kpọ ye ukamaidem, Ẹtịm Man Inam Utom Nnyịn Ima etịn̄ aban̄a nte oyomde usanaidem eke ikpọkidem, ọfọn̄ oro owụtde iso o-bụt, ye eti ukamaidem ke ini nnyịn ibuanade ke utom ukwọrọikọ inyụn̄ idụkde mme mbono esop Christian. Ekem, ke page 131, ikpehe ekikere 1, enye etịn̄ ete: “Ẹnyene ndinam ukem emi ke ini ẹkade ndise ufọkidụn̄ Bethel ke Brooklyn m̀mê mme ọfis n̄kọk itieutom N̄ka ekededi. Ti ete, enyịn̄ oro Bethel ọwọrọ ‘Ufọk Abasi,’ ntre usịnen̄kpọ, ukamaidem, ye eduuwem nnyịn ẹkpenyene ndidi ukem ye se ẹdoride enyịn ndikụt nto nnyịn ke ini idụkde mme mbonoesop kaban̄a utuakibuot ke Ufọkmbono Obio Ubọn̄.” Akpana mme asuanetop Obio Ubọn̄ n̄kann̄kụk ọkọrọ ye mbon oro ẹtode anyan usụn̄ ẹdi ndise nnyụn̄ mbuana ye mbon ubon Bethel ndinyụn̄ nse mme n̄kọk itieutom ẹnyene ukem n̄kokon̄ idaha oro.
Akpana usịnen̄kpọ enyene eti odudu ke idem mbon efen kaban̄a nte mmọ ẹsede utuakibuot akpanikọ Jehovah. Nte ededi, ẹma ẹkụt nte ke ini ẹdide ndise mme itieutom N̄ka, ndusụk nditọete iren ye iban ẹsinyene ntụhọ edinen̄ede ntie nsuahade nsuahade ke usịnen̄kpọ mmọ. Utọ usịnen̄kpọ oro idotke ke ini ẹkade ndise kiet ke otu ufọkidụn̄ Bethel. Ke afan̄ emi, kpa nte kpukpru ikpehe uwem Christian nnyịn eken, nnyịn iyom ndimụm mme ukem n̄kokon̄ idaha n̄kama ẹmi owụtde ikọt Abasi nte ẹdide isio ye ererimbot ebe ke nnyịn ndinam kpukpru n̄kpọ nnọ Abasi ubọn̄. (Rome 12:2; 1 Cor. 10:31) Onyụn̄ enen ineme ye nditọ ukpepn̄kpọ Bible nnyịn ye mbon en̄wen ẹmi ẹdikade ẹkese Bethel ke akpa ini inyụn̄ iti mmọ iban̄a nte edide akpan n̄kpọ ndinọ ntịn̄enyịn ke edisịnen̄kpọ ye ukamaidem oro odotde.
Ntre ke ini akade ndise mme itieutom N̄ka, bụp idem fo ete: ‘Nte usịnen̄kpọ ye ukamaidem mi owụt iso o-bụt?’ (Men Micah 6:8 domo.) ‘Nte enye etịn̄ n̄kpọ ọfọnde aban̄a Abasi oro ami n̄kponode? Ndi ukamaidem mi ọyọwọn̄ọde ntịn̄enyịn mbon en̄wen m̀mê ayayat mmọ esịt? Nte ami mmenịm eti uwụtn̄kpọ nnọ mbon en̄wen emi ekemede ndidi ẹdi ndise ke akpa ini?’ Akpakam nnyịn kpukpru ini, ebede ke usịnen̄kpọ ye ukamaidem nnyịn, “inam ukpepn̄kpọ Abasi Andinyan̄a nnyịn enyene uku ke kpukpru usụn̄.”—Titus 2:10.