Diọn̄ọ Nditọete Fo
1 Bible etịn̄ aban̄a ata ufan nte enye emi eyịrede owo akan eyeneka, emi ọsọn̄ọde ada ke ima ye edinam akpanikọ esie, emi onyụn̄ an̄wamde ufan esie ke ini nnanenyịn. (N̄ke 17:17; 18:24) Nnyịn idinanake mme utọ ufan oro ke esop edieke nnyịn isịnde ukeme ndidiọn̄ọ nnyụn̄ mma kiet eken.—John 13:35.
2 Nti ifet ẹdu ndimehe ye nditọete nnyịn mbemiso ye ke mme mbono esop ẹsuanade. Ntak mûbakke ukesịm unyụn̄ ubet ke ẹsuanade man ekeme ndidara ufiop ufiop itie ebuana oro enyenede uwem? Yom nsio nsio nditọete ndida nnyene nneme, esịnede n̄kani owo oro ẹnyenede mbufiọk ye n̄kpri owo m̀mê mbon oro ẹkopde bụt.
3 Tọn̄ọ Nneme: Nam n̄kpọ kan n̄kukụre ndikọm nditọete fo enyọn̄ enyọn̄. Emekeme nditọn̄ọ nneme ebe ke ndibuana ifiọkutom an̄wautom, akpan n̄kpọ udọn̄ ke magazine eke ndondo emi, m̀mê nditịn̄ n̄kpọ mban̄a mbono esop oro osụk okụrede. Afo emekeme ndikpep ekese nto nditọete fo ebe ke ndidi eti andikpan̄ utọn̄, esịnde udọn̄ ọnọ mmọ nditịn̄ mban̄a mme ifiọkutom mmọ ye mme n̄kpọ oro mmọ ẹkpepde. Ndikam mbụp mban̄a nte owo akasan̄ade edidiọn̄ọ Jehovah ekeme ndiyarade ekese. Ndusụk owo ẹnyene ifiọk n̄kpọntịbe oro ẹsọn̄ọde mbuọtidem ke uwem mmọ, ke adan̄aemi edide idahaemi mbon en̄wen ke ẹyọ mme idaha oro ẹkemede ndidi ọkpọsọn̄ n̄kpọ nnọ ediwak owo ndikere mban̄a. Ndidiọn̄ọ emi ayan̄wam nnyịn, nte mme ata ufan, ndisọp n̄kụt nnyụn̄ nnam n̄kpọ mban̄a mme udọn̄ mbon en̄wen.
4 Nam Ufan ye Kiet Eken: Ke eyen esie ama akakpa, ekedi ọkpọsọn̄ n̄kpọ ọnọ eyenete an̄wan kiet ndikwọ mme ikwọ Obio Ubọn̄ oro ẹtịn̄de ẹban̄a ediset ke n̄kpa. Enye eti ete: “Ini kiet, eyenete an̄wan kiet oro eketiede nsakiso ye ami ama okụt nte ntuade. Enye ama ebe edi, edifat mi akama, onyụn̄ ọkwọ ikwọ oro osụhọde ye ami okụre. Mma n̄kụt nte ima ọyọhọde esịt mi aban̄a nditọete iren ye iban nnyụn̄ n̄kop inemesịt nte ke nnyịn ima idụk mme mbono esop, mfiọkde nte ke edi do ke un̄wam nnyịn odu, do ke Ufọkmbono Obio Ubọn̄.” Nnyịn ikpenyene ndinam ufan ye nditọete nnyịn ebe ke ndinọ mmọ nsụkesịt ke ini ẹyomde ye nsịnudọn̄ ke kpukpru ini.—Heb. 10:24, 25.
5 Nte akani ererimbot emi akabarede etie ufịk ufịk akan, ẹyak nnyịn ibiere ndidiọn̄ọ nditọete nnyịn ọfọn akan. Ata nsịnudọn̄ edem mbiba emi eyedi edidiọn̄ ọnọ kpukpru owo.—Rome 1:11, 12.