Kpukpru Ntịn̄nnịm Ikọ Abasi Ẹyesu!
1 Mme Ntiense Jehovah ẹsinyene udọn̄ kpukpru ini ke ntịn̄nnịm ikọ Bible. Ntre nnyịn ima ikop nduaidem ndifiọk nte ke ibuotikọ mbono district eke 1999/2000 edidi “Ntịn̄nnịm Ikọ Abasi.” Nnyịn ima inyene ọkpọsọn̄ udọn̄ ndifiọk se Jehovah ekenịmde nte “udia ke edikem ini” ọnọ nnyịn. (Matt. 24:45) Enye ikokpụhu nnyịn.
2 Mme Akpan N̄kpọ Udọn̄ eke Mbono: Utịn̄ikọ ibuotikọ mbono ke Friday, “Biọn̄ Utọn̄ ke Ntịn̄nnịm Ikọ Abasi,” ama esịne nneme emi ekesịnde un̄wana ke mbụk edikpụhọde mbiet. (Matt. 17:1-9) Enye ama ọsọn̄ọ owụt nte ke idahaemi nnyịn imenen̄ede ikpere mfọnn̄kan ini koro nnyịn imenen̄ede ika anyan ke utịt ini, obufa editịm n̄kpọ odude ke n̄kpet n̄kpet ini iso! Ata akpan usụn̄ emi oyomde nnyịn ibiọn̄ utọn̄ ke Ikọ Abasi edi ndikot enye kpukpru ini. Nneme oro “Kop Idatesịt Ndikot Ikọ Abasi” ama ọnọ nti ekikere kaban̄a ndinam edikot Bible enen̄ede enyene ufọn ye inem.
3 Ke uwemeyo Saturday, nnyịn ima idụn̄ọde mme ntak ẹmi ikpenịmde nte ke nnyịn idu uwem ke ukperedem ini. Nte afo emekeme nditi kpukpru ẹmi? Ke usenubọk Sunday, ẹma ẹnam ntịn̄nnịm ikọ Habakkuk an̄wan̄a nte nnyịn ikekpepde nte ke eyo nnyịn enen̄ede ebiet eyo esie ye nte ke mme akpan n̄kpọntịbe ẹmọn̄ ẹtịbe ke mîbịghike ke ini Jehovah edisobode mme idiọkowo onyụn̄ anyan̄a nti owo. Nte afo ama ekpep akpan n̄kpọ oto drama Bible oro aban̄ade Jacob ye Esau? Ana nnyịn isịn ifịk ibịne mme edidiọn̄ Jehovah, ibiọn̄ọde edu unana udọn̄.
4 Edemede-Owo-Udọn̄ Obufa N̄wed: Nnyịn ikokop nduaidem didie ntem ndibọ obufa n̄wed oro, Nọ Ntịn̄enyịn ke Prọfesi Daniel! Nte eyịghe mîdụhe afo ke okot edemede-owo-udọn̄ n̄wed emi. Etịn̄ikọ oro okosiode enye ọkọdọhọ ete: “Ke ẹsiode ibat ibat edinam an̄wan̄a ẹfep, kpukpru ntịn̄nnịm ikọ ke n̄wed Daniel ẹmesu.” Nte oro iwụtke nte ini nnyịn edide usọp usọp?
5 Ndutịm mbono oro ama enen̄ede ọsọn̄ọ edinịm ke akpanikọ nnyịn nte ke kpukpru mme un̄wọn̄ọ Abasi ẹmi mîsụhu kan̄a ẹyesu. Ẹsịn udọn̄ ẹnọ nnyịn ndika iso ntan̄a ntịn̄nnịm ikọ Abasi nnọ mbon en̄wen!