‘Kwọrọ Ikọ Usọp Usọp’
1 Edieke afo ọbọde n̄kpọ oro ẹwetde “USỌP USỌP” ẹdian, afo esise enye didie? Ikọ oro “usọp usọp” ọwọrọ “ndisọp nnam n̄kpọ mban̄a.” Ye eti ntak, apostle Paul ama ọnọ mme Christian item ete ‘ẹkwọrọ ikọ usọp usọp.’ (2 Tim. 4:2, NW) Nte afo amanam n̄kpọ aban̄a emi ebe ke ndinọ utom emi usọp usọp ntịn̄enyịn?
2 Ekeme ndidi ẹma ẹtọt Paul nte ke ndusụk nditọete ẹma ‘ẹtek ke ifịk mmọ’ nte mme Christian. (Rome 12:11) Emi ama osụhọde utịp utom mmọ ọkọrọ ye idatesịt oro mmọ ẹkpekenyenede ẹto ndin̄wam mbon en̄wen.
3 Nte Jesus Ekesede Utom Ukwọrọikọ: Jesus okokop idatesịt didie ntem ndinam utom ukwọrọikọ esie! Enye ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” Uwụtn̄kpọ Jesus ama onụk mme mbet esie, ẹmi enye ekesịnde udọn̄ ọnọ ke ndidọhọ ‘n̄kpọ ẹdat ke in̄wan̄ ẹma, ekem ini ukpen̄e.’ (John 4:34, 35) Ekikere esie kaban̄a nte ini edide usọp usọp ama ana in̄wan̄în̄wan̄ ke ini enye ọkọdọhodẹ mme mbet esie “ẹben̄e . . . Enyene-idọk ẹte, Enye osio mme anam-utom ọdọn̄ ẹdi ke idọk Esie.” (Matthew 9:38) Jesus ama ọfiọk ete ke utom imọ ekedi ndikwọrọ ikọ, ndien enye ama ebiere nditre ndiyak n̄kpọ ndomokiet ọbiọn̄ọ enye ndinam ntre.
4 Nso Kaban̄a Nnyịn? Mfịn, ini edi usọp usọp akan nte akanam edide ndikaka iso nnam utom ukwọrọikọ. Ke ediwak ikpehe ererimbot, mme n̄kpọ ẹdat ke in̄wan̄ ẹma ndikpen̄e. Idem ke mme idụt ẹmi ẹtiede nte ẹnọ ọyọhọ ọyọhọ ikọ ntiense, ediwak tọsịn owo esịna baptism ke isua kiet kiet. Ye emi utịt editịm n̄kpọ asan̄ade usop usọp ekpere mi, ‘ekese ẹdu ndinam ke utom Ọbọn̄.’ (1 Cor. 15:58, NW) Ke akande ini en̄wen ekededi, edi ata akpan n̄kpọ nte nnyịn isịn̄ede idem ọkpọsọn̄ ndibuana etop Obio Ubọn̄ ye mbon en̄wen.
5 Ẹyak nnyịn ikere iban̄a nte ikpadade eti mbụk isịm mbon en̄wen, edide ke ufọk ke ufọk ye ebiet efen ekededi emi ẹkemede ndikụt mme owo ke efakutom. Ebede ke ndibuana ọyọhọ ọyọhọ nte ikekeme ke utom ukwọrọikọ, nnyịn iwụt in̄wan̄în̄wan̄ nte ke nnyịn imenịm Obio Ubọn̄ akpa ke uwem nnyịn. (Matt. 6:33) Edinam akpanikọ nnyịn ke ndikwọrọ ikọ usọp usọp ayada ekese idatesịt ọsọk nnyịn.