Anie Ekeme Ndinyịme Ukpepn̄kpọ Bible?

¹ Prọfet Amos ama etịn̄ ete ke akan̄ oyodu ke idụt Israel, “idịghe akan̄ udia, inyụn̄ idịghe nsat-itọn̄ mmọn̄, edi eke edikop ikọ Jehovah.” (Amos 8:11) Kaban̄a ufọn mbon oro ẹkopde biọn̄ ye nsatitọn̄ eke spirit, esop Jehovah asuan akpakịp n̄wed Bible ke ofụri ererimbot.

² Kan̄a ke emi, nnyịn imemịn̄ n̄wed Ifiọk miliọn 70 ye ediye uduot ekpri n̄wed Oyom miliọn 91. Nnyịn imowụt esịtekọm iban̄a mmemmem ye uforo uforo usụn̄ oro mme n̄wed ẹmi ẹkpepde owo akpanikọ. Nte ededi, ata ediwak owo ẹmi ẹbọde mme n̄wed nnyịn ikpepke Bible kan̄a ye nnyịn. Nso ke nnyịn ikeme ndinam mban̄a emi?

³ N̄wed Kiet Kiet Oro Inịmde Ekeme Ndidi Ukpepn̄kpọ ke Ini Iso! Kere ban̄a ifiọkutom asuanetop emi ọkọtọn̄ọde ukpepn̄kpọ ye n̄wan kiet ke akpa ini oro enye ekenyenede nneme ye enye ke enyịnusụn̄. N̄wan oro ama enyịme ukpepn̄kpọ ke ndondo oro. Ke ukperedem n̄wan oro ama ọdọhọ enye ete, “Afo edi akpa owo emi akanam ọdọhọde ke imọn̄ ikpep Bible ye ami.” Ke efakutom mbufo, owo ifan̄ oro ẹma ẹkenyenyene mme n̄wed nnyịn ẹkeme nditịn̄ ukem ntre? N̄wed kiet kiet oro inịmde eberede ifet ọnọ mfiakn̄ka ye ukpepn̄kpọ Bible.

⁴ Sia nnyịn isiwakde ndisobo mme owo oro ẹma ẹkenyenyene mme n̄wed nnyịn, didie ke nnyịn ikeme ndidemede mmọ udọn̄ ndikpep se isịnede ke mme n̄wed nnyịn? Ntiense kiet ama obụp enyeneufọk nnennen nnennen m̀mê enye enyene mbụme ndomokiet ke Bible, n̄kukụre ibọrọ esie ekedi, “Baba.” Eyenete an̄wan oro ama eyịre ete, “Ke akpanikọ afo emenyene ndusụk mbụme.” N̄wan oro ama enyene, ndien ukpepn̄kpọ ama ọtọn̄ọ. Ntak mûbụpke enyeneufọk m̀mê enye akpama ndifiọk ekikere Bible ke mbụme m̀mê n̄kpọ oro ebehede enye? Tịm idem man obụp mbụme oro edemerede udọn̄ edieke enye mînyeneke se obụpde. Mme utọ nneme oro ẹkeme ndiberede usụn̄ nnọ edikpep mme akpan ukpepn̄kpọ Bible ofụri ini.

⁵ Utom ukpepn̄kpọ Bible edi akpan n̄kpọ ke utom ukwọrọikọ nnyịn. Sia nnyịn mîfiọkke owo emi edinyịmede ukpepn̄kpọ, kûmen̄e ndidọhọ kpukpru owo ẹmi osobode ke imọn̄ itọn̄ọ ukpepn̄kpọ. Sian Jehovah n̄kpọ emi ke akam, nyụn̄ nam n̄kpọ ke n̄kemuyo ye mme akam fo. Ekeme ndidi ke mîbịghike afo oyokụt ke owo emi afo ọdọhọde ke imọn̄ ikpep n̄kpọ ye enye eyenyịme!—1 John 5:14, 15.