Ndinam Ẹfiọk Enyịn̄ Jehovah ke Ofụri Isọn̄
1 Ke ini Jesus okosiode mme mbet esie ọdọn̄ ete ẹdi mme ntiense “tutu ẹsịm utịt ererimbot,” enye ama enenịm uwụtn̄kpọ ọnọ mmọ nditiene. (Utom 1:8) Ini ekededi ye ebiet ekededi oro enye okokụtde mme owo, enye ama esitịn̄ aban̄a uduak Abasi kaban̄a ubonowo. Ke ndikpebe Jesus, otu asan̄autom emi anamde akpanikọ ada ata ediwak nsio nsio usụn̄ ndinam ‘ẹfiọk enyịn̄ Jehovah ke ofụri ererimbot.’—Isa. 12:4, 5.
2 Se Ẹkenamde ke Eset: Ke mme isua ẹmi ẹbede, ẹkesimịn̄ ukwọrọikọ ke n̄wedmbụk n̄kpọntịbe; ẹma ẹsio ẹnyụn̄ ẹwụt ediwak miliọn owo “Photo-Drama of Creation”; ẹma ẹda ubomisọn̄ usuanetop ẹnam n̄kpọ; ẹma ẹnyụn̄ ẹda ukwak ubre usanikwọ ẹnam n̄kpọ ntatara ntatara, ẹnyụn̄ ẹda ekebe ukopikọ, ke esisịt ini—kpukpru ndida n̄kwọrọ eti mbụk. Nte ededi, ẹdori akpan nsọn̄uyo kpukpru ini ndisobo ọkpọkpọ ye mme owo man ẹkeme ndikọri udọn̄ emi ẹkụtde. Mmọdo, ẹkụt utom ukwọrọikọ eke ufọk ke ufọk nte uforo uforo usụn̄ ndinam ẹfiọk enyịn̄ Jehovah ke kpukpru ebiet.—Utom 5:42.
3 Se Ẹnamde ke Eyo Nnyịn: Ke emi mme ini ẹkade-ka iso ndikpụhọde, uwem ererimbot etie itọk itọk, ndien ke ediwak itie owo isiwakke ndikụt mme owo ke ufọk. Ibat ibat owo ẹnyene udọn̄ ndibiat ini n̄kot n̄wed nnyụn̄ ntie n̄kere mme n̄kpọ eke spirit. Ke ntre, ana nnyịn inam ukwọrọikọ nnyịn ada ekekem. Ke adianade ye edika iso n̄kụre efakutom to ke ufọk sịm ufọk, ẹsịn udọn̄ ẹnọ nnyịn ndika ebiet emi mme owo ẹdude ndinyụn̄ ‘mben̄e idem kpukpru ini’ ndiwụt ntak idotenyịn emi nnyịn inyenede. (1 Pet. 3:15) Emi ọwọrọ ndidomo ndikwọrọ ikọ nnọ mme nsan̄autom, mme nsan̄a ufọkn̄wed, mme owo ke efak ye ke itie unọ idem inemesịt m̀mê itie ubon n̄kpọisan̄, to ke ufọkurua sịm ufọkurua, ye ebiet efen ekededi oro ẹkemede ndikụt mme owo. Nnyịn imenen̄ede ikụt unen ke ukeme oro isịnde sia inyenede ibetedem Jehovah. Nte afo ke enyene ebuana ke ndisịm mme owo ke ebiet ekededi emi mmọ ẹdude?
4 Nnyịn owo kiet kiet ikpakam isịn ofụri ukeme ke ini edide edisịm edinam ẹfiọk enyịn̄ Jehovah ke efakutom nnyịn. Nnyịn imekeme ndinyene akamba uyụhọ ke ndinam utom nnyịn mma, nte nnyịn iberide edem ke Jehovah ndidụri mbon eti esịt ndi.—John 6:44.