Nte Afo Oyodụk?
1 Ntiense oro ama akanam utom ke anyan ini ọkọdọhọ ini kiet ko ete: “Edieke afo atabade akpa usen mbono, ke akpanikọ, afo amataba ekese n̄kpọ!” Ntak emi enye ekekerede ntre? Koro akpa usen edi ntọn̄ọ akwa usọrọ nti n̄kpọ eke spirit oro esop Jehovah etịmde ọnọ nnyịn. (Isa. 25:6) Nnyịn ndidu do ọtọn̄ọde ke ntọn̄ọ owụt ete ke nnyịn imenyịme ye ekikere andiwet psalm: “Mmọ eke ẹdọhọde mi, ẹte, ‘Nnyịn iyaka ke ufọk Jehovah,’ ẹdat mi esịt.”—Ps. 122:1.
2 Nte ededi, isua oko ke ndusụk Mbono District “Ntịn̄nnịm Ikọ Abasi,” ibat mme andidụk ke Friday ama enen̄ede osụhọde akan eke Saturday ye Sunday. Emi ọwọrọ ete ke ata ediwak nditọete nnyịn ẹma ẹtaba mme ikpehe mbono oro ẹkenọde akpan ntọt ẹban̄a mme ntịn̄nnịm ikọ. Mmọ ẹma ẹtaba n̄ko inem inem ebuana ye ekemmọ mme andinịm ke akpanikọ.
3 Kûyak Utom Idịbi Udia Edi N̄kpọ Ubiọn̄ọ: Ekeme ndidi ndịk editaba utom ekedi ntak emi ndusụk owo mîkodụkke ke Friday. Nte ededi, ediwak Ntiense ẹmekụt ẹte ke mme eteutom mmimọ ẹsinyịme ndibere ye mmimọ ke n̄kpọ emi edieke mmimọ inen̄erede ibak iben̄e ini nduọkodudu. Ọkpọsọn̄ ubiere eyenete an̄wan kiet edide asiakusụn̄ ndidụk kpukpru mbono esop ye mme mbono ama otụk eteutom kiet tutu enye abiat ofụri usen kiet ndidụk mbono ye enye!
4 Afo ukpenyeneke ndikere ke eteutom fo idinọhọ fi ini nduọkodudu, m̀mê ndikere ke nditre mbono usen kiet inamke n̄kpọ. Ye ọyọhọ uko, tịm idem ndida N̄wed Abasi ye mbufiọk n̄wụt eteutom fo ntak emi edidụk mbono edide akpan ubak utuakibuot fo. (Heb. 10:24, 25) Ekem kọn̄ ọyọhọ mbuọtidem fo ke mme un̄wọn̄ọ Jehovah, ọfiọkde ete ke ẹyenọ se ededi oro afo oyomde ke n̄kan̄ eke obụk edieke afo enịmde mme udọn̄ n̄kpọ eke spirit ata akpa ke uwem fo.—Matt. 6:33; Heb. 13:5, 6.
5 Akpan n̄kpọ edi ndiwụt esịtekọm kaban̄a “se ifọnde ikan.” (Phil. 1:10, 11; Ps. 27:4) Emi onụk nnyịn ndinam ndutịm man ibọ ọyọhọ ufọn ito akpan ndutịm emi otode Jehovah mi. Tọn̄ọ idahaemi ndinam mme ndutịm oro ẹnyenede iwụk, nyụn̄ biere ete ke afo oyodụk ofụri usen ita oro!