Ekebe Mbụme

◼ Anie ọkpọbọn̄ akam ke mme mbono esop?

Akam ẹbọn̄de ke esop edi akpan ubak utuakibuot nnyịn. Ndibọn̄ akam ke ibuot mbon efen nnọ Jehovah edi ọsọn̄urua ifet ye ndodobi mbiomo. Ke ikerede nte edide akpan n̄kpọ, oyom mbiowo ẹda eti ubiere ẹnam n̄kpọ ke ini mmọ ẹbierede m̀mê ewe eyenete odot ndibọn̄ akam ke mme mbono esop. Nditọete iren oro ẹma ẹkena baptism ẹmi ẹdade ke ibuot esop ẹkpenyene ndidi mme asan̄autom Christian oro ẹkọride ẹsịm ọyọhọ idaha, ẹmi ẹdiọn̄ọde nte ẹnịmde nti uwụtn̄kpọ ẹnyụn̄ ẹnyenede ukpono ke esop. Mme ukpono ukpono akam uten̄e Abasi mmọ ẹkpenyene ndiyarade eti itie ebuana ye Jehovah Abasi. Ibuotikọ oro “Ndibọn̄ Akam ke Iso Mmọ Efen ye Esịt Nsụhọdeidem” ke nsiondi Enyọn̄-Ukpeme eke November 15, 1986, owụt mme akpan edumbet oro ẹdide n̄kpọ un̄wam akpan akpan ẹnọ mbon oro ẹbọn̄de akam an̄wan̄wa ke ibuot esop.

Mbiowo ididọhọke eyenete eren ọbọn̄ akam edieke ẹdiọn̄ọde enye nte enyenede edu uwem oro edemerede eyịghe m̀mê oro mîdaha n̄kpọ ke akpan n̄kpọ. Owo idimekke eyenete eren oro etiede idiọkesịt idiọkesịt m̀mê oro enyenede edu edida an̄wan̄wa akam nte usụn̄ editịn̄ mban̄a ọkpọkpọ ndutan̄uyo. (1 Tim. 2:8) Idem okposụkedi ekpri eyenete eren emi edide uyen anade baptism, mbiowo ẹyebiere m̀mê enye enyene ọyọhọ idaha eke spirit ndibọn̄ akam ke ibuot esop.—Utom 16:1, 2.

Ndusụk ini ekeme ndiyom eyenete an̄wan oro ama akana baptism ọbọn̄ akam ke mbono an̄wautom edieke eyenete eren oro odotde mîdụhe ndibọn̄ akam ke ibuot otu oro. Oyoyom enye ọbọbọ ọfọn̄ibuot oro odotde. Edieke etiede nte ke eyenete eren oro odotde ididụhe ndinịm mbono an̄wautom, mbiowo ẹkpenyene ndisio eyenete an̄wan ndida usụn̄.

Awak ndidi etieibuot okpokoro ke An̄wan̄wa Mbono Esop esibọn̄ akam ntọn̄ọ. Nte ededi, ke mme mbono esop eken, ke ini ediwak nditọete iren ẹmi ẹdotde ẹdude, ẹkeme ndidọhọ owo efen ke ẹsiode owo emi ebererede mbono esop m̀mê owo emi ẹnọde akpatre edinam ọbọn̄ akam ntọn̄ọ m̀mê eke ediberi. Ke idaha ekededi, ẹkpenyene ndibem iso nsian eyenete oro ẹdikotde edibọn̄ akam ke mbono esop man enye ekeme ndikọk ibuot ke se enye editịn̄de. Do enye ekeme ndibọn̄ in̄wan̄în̄wan̄, nnennen akam ofụri esịt oro odotde ke akpan mbono esop oro.

Iyomke mme utọ akam oro ẹneniọn̄. Ke ini eyenete eren ọbọn̄de akam an̄wan̄wa, nte ido edide se enye etịn̄de eyetịm an̄wan̄a edieke enye adade-da, etịn̄de ikọ ke uyo oro ọsọn̄de ekem, onyụn̄ etịn̄de ikọ an̄wan̄a. Emi ayanam kpukpru mbon oro ẹsopde idem ẹkop akam oro ndien ke utịt ẹsịn “Amen” ke ofụri esịt.—1 Chron. 16:36; 1 Cor. 14:16.