“N̄keme Didie ke Owo Mîtemeke Mi?”
1 Ke ini Philip ọkwọrọikọ okobụpde eunuch owo Ethiopia m̀mê se enye okokotde oto Ikọ Abasi ama an̄wan̄a enye, eren oro ọkọbọrọ ete: “N̄keme didie ke owo mîtemeke mi?” Philip ke idatesịt ama an̄wam ndinam eti mbụk aban̄ade Jesus an̄wan̄a enye, osụn̄ọde ke eren oro ndina baptism ke ndondo oro. (Utom 8:26-38) Philip akanam utom oro Christ ọkọnọde ete ‘ẹkenam kpukpru mme idụt ẹdi mbet, ẹnịm mmọ baptism ẹnyụn̄ ẹkpep mmọ n̄kpọ.’—Matt. 28:19, 20.
2 Ana nnyịn inam utom edinam mbet, ukem nte Philip akanamde. Nte ededi, owo isiwakke ndikụt orụk usọp usọp n̄kọri eke spirit oro eunuch owo Ethiopia akanamde ke otu mme owo ẹmi nnyịn ikpepde Bible. Eren oro, okpono Abasi ke ido mme Jew oro eketịmde emehe ye N̄wed Abasi, ama enyene edinyịme esịt ndien n̄kukụre se okoyomde ekedi ndinyịme Jesus nte Messiah oro ẹken̄wọn̄ọde. Edi n̄kpọ-ata edieke mbon oro nnyịn ikpepde n̄kpọ mîmeheke ye Bible, ẹdide se ẹkedade mme ukpepn̄kpọ nsunsu ido ukpono ẹtụn usụn̄, m̀mê ẹdide se n̄kpọsọn̄ ọkpọkpọ mfịna ẹfịkde. Nso idin̄wam nnyịn ndikụt unen ke ndida nditọ ukpepn̄kpọ Bible usụn̄ nsịm uyakidem ye baptism?
3 Tịm Fiọk Mme Udọn̄ N̄kpọ eke Spirit Eyen Ukpepn̄kpọ Bible: Nnyịn ikpakama ediye uduot ekpri n̄wed Oyom ye n̄wed Ifiọk ikpep owo n̄kpọ ebịghi adan̄a didie? Oyom ẹdomo idaha n̄kọri ukpepn̄kpọ oro nte ekemde ye mme idaha ẹdude ye ukeme eyen ukpepn̄kpọ oro. Nnyịn iyomke n̄kpọ etre ndin̄wan̄a eyen ukpepn̄kpọ ke ntak usọp. Eyen ukpepn̄kpọ kiet kiet oyom eti isọn̄ kaban̄a obufa mbuọtidem esie ke Ikọ Abasi. Ntem, owụt ifiọk nditre ndikụre se idude ke n̄wed Ifiọk itọk itọk ye ekikere edidomo ndikụre n̄wed oro ke ọfiọn̄ itiokiet. Ekeme ndiyom se iwakde ikan ọfiọn̄ itiokiet man ẹn̄wam ndusụk owo ndikọri nsịm idaha edina baptism. Nte afo enịmde ukpepn̄kpọ oro ke urua ke urua, biat ini ekededi oro oyomde ke ndin̄wam eyen ukpepn̄kpọ ọfiọk onyụn̄ enyịme se enye ekpepde oto Ikọ Abasi. Ke ndusụk idaha, ekeme ndiyom urua iba m̀mê ita man ẹkụre ibuot kiet ke n̄wed Ifiọk. Emi ayanam ini odu ndikot nnyụn̄ nnam ediwak itien̄wed oro ẹsiakde ẹsịn ẹn̄wan̄a.—Rome 12:2.
4 Nte ededi, nso edieke ke okụrede n̄wed Ifiọk, afo okụt ke oyom ọtọn̄ọ ntak anam akpanikọ etịm an̄wan̄a eyen ukpepn̄kpọ mîdịghe nte ke udọn̄ esie inen̄ekede idemede man ada ọnọ akpanikọ onyụn̄ ayak uwem esie ọnọ Abasi? (1 Cor. 14:20) Nso efen efen ke afo ekeme ndinam man ekpeme enye ke usụn̄ adade esịm uwem?—Matt. 7:14.
5 Yụhọ Mme Udọn̄ N̄kpọ eke Spirit Eyen Ukpepn̄kpọ Bible: Edieke uyarade odude nte ke owo oro ke anam n̄kọri, okposụkedi edide sụn̄sụn̄, ye nte ke enye ke ọkọri esịtekọm ọnọ se enye ekpepde, do ka iso ke ukpepn̄kpọ Bible ke udiana n̄wed ke ama okokụre ediye uduot ekpri n̄wed Oyom ye n̄wed Ifiọk. Ekeme ndidi idiyomke emi ke kpukpru idaha, edi ke ini oyomde, ka iso ke ukpepn̄kpọ ke n̄wed Ata Emem, n̄wed Ndidiana Kiet ke Utuakibuot, m̀mê n̄wed Edibọhọ. Ata ediwak asuanetop ẹnyene n̄wed ẹmi ọkpọkpọ ndikama edieke esop mînyeneke. N̄wed Ata Emem ye Edibọhọ ẹdi n̄kukụre n̄wed oro ẹkemede nditobo nto ọfis n̄kọk itieutom. Ke kpukpru idaha, ediye uduot ekpri n̄wed Oyom ye n̄wed Ifiọk ke ẹdibem iso ikpep. Ẹkpenyene ndibat ukpepn̄kpọ Bible, mfiakn̄ka, ye ini oro ẹbiatde ndika iso ke ukpepn̄kpọ oro idem edieke eyen ukpepn̄kpọ anade baptism mbemiso ẹkụrede udiana n̄wed.
6 Ndi emi ọwọrọ ke mbon oro ẹnade baptism ke ndondo emi edi ẹkekpepde n̄wed kiet kpọt ẹkpenyene ndibọ obufa un̄wam idahaemi ndikpep udiana n̄wed? Inen̄ekede idi ntre. Nte ededi, ekeme ndidi mmọ inamke utom aba mîdịghe ẹkeme nditre ndinam n̄kọri ke akpanikọ, ndien mmọ ẹkeme ndikere ke imoyom ọkpọkpọ un̄wam man inen̄ede ida akpanikọ isịn ke edinam ke uwem mmimọ. Ẹkpenyene ndisobo ye esenyịn utom mbemiso ẹfiakde ẹkpep n̄kpọ ye asuanetop oro ama akana baptism. Nte ededi, edieke afo ọfiọkde owo emi ekekpepde n̄wed Ifiọk ke ini edem edi mînamke n̄kọri isịm uyakidem ye baptism, ekeme ndidi afo ayanam usio-ukot ndise m̀mê mmọ ẹyema ndifiak n̄kpep Bible.
7 Edi idiọn̄ọ ima Christian ndinọ kiet kiet ke otu mbon oro ẹnyenede udọn̄ oro nnyịn ikpepde n̄kpọ ọkpọkpọ ntịn̄enyịn. Uduak nnyịn edi ndin̄wam eyen ukpepn̄kpọ enyene ifiọk oro enen̄erede okpon aban̄a akpanikọ eke Ikọ Abasi. Do enye ekeme ndida nnọ akpanikọ ke in̄wan̄în̄wan̄ usụn̄ oro esịnede ifiọk onyụn̄ ayak uwem esie ọnọ Jehovah, ayararede uyakidem oro ke baptism mmọn̄.—Ps. 40:8; Eph. 3:17-19.
8 Nte afo emeti se iketịbede ke ini eunuch owo Ethiopia oro ama akana baptism? “Enye ọnyọn̄ esie ke idatesịt” nte obufa mbet Jesus Christ. (Utom 8:39, 40) Nnyịn ye mbon oro nnyịn ikụtde unen ndida mmọ usụn̄ ke usụn̄ akpanikọ ikpakam inyene akwa idatesịt ke ndinam n̄kpọ Jehovah Abasi—idahaemi ye ke nsinsi!