‘Ẹnam Kpukpru N̄kpọ Ẹyom N̄kọri’

¹ Ke ndinam n̄kpọ ye nditọete nnyịn, nnyịn ikpenyene ndinam se ifọnde man mmọ ẹkọri. Emi ọwọrọ ndikere mban̄a ndikpeme mme udọn̄ n̄kpọ eke spirit mmọ. Edieke nnyịn inamde ndusụk orụk utom idịbi udia oro ẹbuanade edisịn udọn̄ nnọ n̄kpọ oro ẹsion̄ode ẹdi m̀mê utom, oyom nnyịn idu ke ukpeme mbak n̄kpọ ekededi oro nnyịn inamde edinam nditọete nnyịn ẹtuak ukot ẹduọn̄ọ.—2 Cor. 6:3; Phil. 1:9, l0.

² Ndusụk owo ẹsịn idem ke nsio nsio mbubehe, ẹdade mme ekemmọ Christian nte mbonurua. Ndusụk esop unyamurua ẹsịn udọn̄ ẹnọ mme andida ke ibuot mmọ ndida kpukpru owo nte mbon oro ẹkemede ndikabade ndi mbonurua—esịnede mbon ido ukpono mmọ. Ndusụk nditọete ẹsidiomi ikpọ mboho eke Mme Ntiense ye uduak edisịn udọn̄ nnọ mmọ ẹtiene ẹbuana ke unam mbubehe. Mbon en̄wen ẹsisịn udọn̄ ẹnọ mbubehe mmọ ebe ke ndinọ mme ibuotikọ, ndiye uduot n̄kpri n̄wed, m̀mê mme tape oro owo mîsịnke eben̄e iyom ẹsọk mme ekemmọ andinịm ke akpanikọ. Nte okpodot Christian ndida mme ebuana ukara Abasi nnam mbubịne ye nditọete esie eke spirit? Baba!—1 Cor. 10:23, 24, 31, 33.

³ Nditọete Ẹkpenyene Ndidu ke Ukpeme: Emi iwọrọke ite ke Christian ikemeke ndinam mbubehe ye eyenete. Oro edi mbubehe idemowo. Nte ededi, ndusụk owo ẹsitọn̄ọ ndutịm mbubehe oro esịnde udọn̄ ọnọ idiọkitọn̄, ndien mmọ ẹsịn udọn̄ ẹnọ mme ekemmọ andinịm ke akpanikọ ndikabade ndi nsan̄a mmọ m̀mê mme andisịn okụk. Ediwak ke otu mbubehe emi ẹsikpu, ẹtakde mme andibuana ata ediwak okụk. Okposụkedi ekemede ndidi udọn̄ edinyene usọp usọp udori okonụk mbon oro ẹkedụkde mbubehe oro, andidiomi ikpenyeneke ndikere ke imọ inyeneke nduduọhọ edieke mbubehe oro okpude. Enye ekpenyene ndibem iso ntịm n̄kere nte editụkde mfọnọn̄kpọ eke spirit ye eke obụkidem nditọete esie edieke mbubehe oro okpude. Mbon oro ẹkamade mme ifetutom ukara Abasi ẹkpenyene ndidu ke ukpeme akpan akpan mban̄a utom idịbi udia mmọ koro mbon en̄wen ẹkeme ndikpono mmọ nnyụn̄ nnyene akamba mbuọtidem ke idemmọ. Ikpọfọnke ndibiat mbuọtidem oro. Ẹkeme ndibọ eyenete mme ifet edisana utom edieke enye atabade ukpono mbon en̄wen.

⁴ Utịtmbuba nnyịn ekpedi ‘ndinam kpukpru n̄kpọ, nyom n̄kọri.’ (1 Cor. 14:26) Ana nnyịn ifep ndinam n̄kpọ ekededi oro esịnde udọn̄ ọnọ m̀mê adade edinam unyamurua esịn ke esop. Mme utọ n̄kpọ oro inyeneke n̄kpọ ndomokiet ndinam ye mme ntak N̄wed Abasi oro ẹnamde nnyịn isop idem ọtọkiet.—Heb. 10:24, 25.