Ekebe Mbụme

◼ Ini ewe ke odot nditọn̄ọ otu Ukpepn̄kpọ N̄wed Esop efen?

Ẹkpenyene ndikere mban̄a nditọn̄ọ obufa otu ke ini oyomde man mme andidụk ẹdi n̄kpọ nte owo 15 m̀mê ekpride akan oro ke itie ukpepn̄kpọ n̄wed kiet kiet, esịnede Ufọkmbono Obio Ubọn̄. Ntak ẹsịnde udọn̄ ẹnọ emi?

Ke ini ibat mbon oro ẹdude ke otu Ukpepn̄kpọ N̄wed Esop mîwakke, ada ukpepn̄kpọ ekeme ndinọ eti ntịn̄enyịn ke idem owo kiet kiet emi odụkde. Adianade do, kpukpru owo ẹnyene akwa ifet edinọ ibọrọ ke idaha oro ọfọnde ndinam an̄wan̄wa uyarade mbuọtidem mmọ. (Heb. 10:23; 13:15, NW) Ndinyene n̄kpri otu ke nsio nsio ebiet ke ofụri efakutom esop anam edidụk Ukpepn̄kpọ N̄wed Esop ye mme mbono an̄wautom enen̄ede efere owo ke idem. Mme esop oro ẹnamde ibat otu ukpepn̄kpọ n̄wed esop mmọ ọkọri ẹkụt nte ke ibat mme andidụk ukpepn̄kpọ n̄wed ọkọri n̄ko.

Mme akpan idaha ẹkeme ndidu oro anamde ọfọn nditọn̄ọ otu efen, idem ọkpọkọm eyenen̄ede ekpri ke ibat. Emi ekeme ndidi ntre ke ebiet oro odude nsannsan m̀mê ke mme owo ẹwakde ẹkaha m̀mê ke n̄kpọitie mîkemke owo ke ebiet oro ẹnịmde idahaemi. Ke ini ẹyomde, ẹkeme nditọn̄ọ otu kiet emi ẹdinịmde uwemeyo ke ufọn mbonusọn̄, mme anamutom okoneyo, m̀mê nditọete iban emi ẹdọde mme ebe emi mîdịghe Mme Ntiense.

Ẹkpenyene ndideme nsio nsio asuanetop emi ẹsọn̄de idem ke n̄kan̄ eke spirit ẹnyụn̄ ẹnyenede ifịk ndọn̄ ke otu ukpepn̄kpọ n̄wed kiet kiet ọkọrọ ye ada ukpepn̄kpọ ye andikot n̄wed emi ẹdotde. Nditọete ẹkpenyene ndinam n̄kọri man ẹsịm se ẹyomde emi ke esop.

Mbiowo ẹkeme ndinam esop ọkọri ke ndikụt nte ke ibat otu ukpepn̄kpọ n̄wed oro ekemde odu ke esop, ke ẹtịm ẹse ẹban̄a ke n̄kan̄ eke spirit ye nte ke mmọ ẹsop idem ke mme ebiet oro ẹferede owo ke idem. Ke ini ekededi oro ẹnyenede ufọn, ẹkpenyene nditọn̄ọ mbufa otu man kpukpru owo ẹbọ ọyọhọ ufọn ẹto mme n̄wọrọnda ndutịm eke spirit emi. Nte emekeme ndinọ ufọk fo nte ebiet ndinịm ukpepn̄kpọ n̄wed? Ediwak mbon emi ẹkenamde oro ẹma ẹbọ mme edidiọn̄ eke spirit.